Ардчилсан нам: “Ах нар”-гүй гуравдагч тал ялах уу, ялагдах уу

Ерөнхийлөгчийн сонгуулийн халуурал буцалсан энэ өдрүүдэд өнгөн дээрээ С.Эрдэнэ, Ц.Туваан гэх нэртэй ч, начир дээрээ Ц.Элбэгдорж, Х.Баттулгын гэх зодооноор цуу татуулсан Ардчилсан нам дотор юу болж байгаа нь эрхгүй сонирхол татна. Гэвч эдгээр “ах нар”-ын алины ч биш, бие даасан гуравдагч тал ялж чадах эсэхээс тус намын ирээдүй хэрхэн үргэлжлэх нь хамаарна.

С.ЭРДЭНЭ ИДЭВХЖИХГҮЙ

У.Хүрэлсүх У.Хүрэлсүхтэйгээ л өрсөлдөж байгаа мэт уур амьсгалаар  өрнөж буй энэ удаагийн Ерөнхийлөгчийн сонгууль АН-ынхны хувьд хамгийн гачлантай. Эн тэнцүү үзэлцээд ихэнхдээ ялсан түүхтэй тэд энэ сонгуулийг хэрхэхээ мэдэхгүй байсаар дуусгах бололтой. АН-ын өмнөөс мандат өвөртөлсөн С.Эрдэнэ орон нутгуудаар явж буй нэртэй боловч “Ардчилал ялсан аймгуудыг орхино” гэх тайлбараар лав 10 орчимд аймагт очих төлөвлөгөөгүй байгаа гэгдэж байна. Х.Баттулгын эсрэг гэх малгайн дор хүсэл шунал, хүлээлт ялагдлаа нуугаад  намдуухан, ядруухан өрсөлдөөд дуусах дүр зурагтай. Хотод ч энд тэнд эрээвэр хураавар самбар тавьснаас өөрөөр сонин ч үгүй, дэмжигч ч үгүй аргалсаар тэр сонгуулийг дуусгах төлөвтэй.

Х.БАТТУЛГА ЭРГЭН ИРЭХДЭЭ БЭЛДСЭЭР

Өнгөрсөн аравдугаар сард өдөр өнжилгүй аймгууд хэсэж, алдарт эхийн одон тарааж явсан лугаа адил үйл явдлууд өдгөө Төрийн ордонд үргэлжилж буй. Энэ бол долоо дахь Ерөнхийлөгч шан хүртээх сүүлчийн цуваандаа шагнал гардуулж буй өдөр хоногууд. Түүнээс хэдхэн хоногийн өмнө тэр бас АН ялсан гэх аймгийн засаг дарга нарыг дуудаж “Амь халуун” яриагаа дэлгэсэн гэгдсэн.

Түүний хувьд ихдээ л сар илүү хугацааны дараа гудамжнаас, энгийн иргэний хувиар дараагийн улс төрөө эхлүүлнэ. Титэм үгс бичиж, эсвэл “Монгол тулгатны 100 эрхэм” нэвтрүүлгийн дуусаагүй дугааруудаа үргэлжлүүлж биш намдаа нөлөөгөө тогтоон, буцан “Авирах” их хүсэл түүний дотор нуугдаж буй нь лавтай.

О.ЦОГТГЭРЭЛ САНААЧИЛГЫГ ГАРТАА АВАХААР ОРОЛДСООР

О.Цогтгэрэлийг “Женко”-гийн дэмжлэгтэй гэж хүмүүс ойлгодог. Харин намынхан нь О.Цогтгэрэл, Х.Баттулга нарын харилцаа таатай биш гэдгийг сэм ярилцдаг ч гэх. АН-ын даргын сунгааны үеэр Х.Баттулга нь Д.Пүрэвдаваа, О.Амартүвшин нарыг илт дэмжиж байсан гэх бөгөөд намын даргын сонгуулиас хойш О.Цогтгэрэл “Женко”-той очиж уулзаагүй, утсаар ч яриагүй гэгдсэн. Удалгүй АН-ын Хэрэг эрхлэх газрын даргаас Ерөнхийлөгчийн хүн гэгддэг П.Нүрзэдийг 01 тоот тушаалаараа чөлөөлсөн нь ч анхаарал татсан. Мөн Ерөнхийлөгч АН-ын аймгийн дарга, засаг дарга нарыг дуудаж уулзахад нь ч О.Цогтгэрэл байгаагүй гэх.

Тэгэхээр О.Цогтгэрэлийн хувьд нам талдаа Х.Тэмүүжин, Л.Гантөмөр, З.Нарантуяа тэргүүтэй хэсэг нөхөдтэй нийлэн “Ах нар”-аасаа намаа салгаж авах гуравдагч хэсгийг бүрдүүлж байх магадлалыг үгүйсгэж боломгүй. УИХ дахь АН-ын бүлгийн гишүүд, тэр дундаа 1970-аад оны залуу гишүүдийн зарим хандлага “Ах нар”-гүй АН-ын төлөө байгаагаа мэтээр ойлгогдсон. Тэд нэгдэж ерөнхийлөгчийн сонгуульд Х.Тэмүүжинг дэвшүүлэхээр сунгаанд оролцуулсан ч, Ерөнхийлөгчийн шахаасаар Дотоод сонгуулийн хороо нь Н.Алтанхуяг, С.Ганбаатар тэргүүтнийг бүртгэн өрсөлдүүлж, “Өрвөлзөх” хэрэггүй гэдгийг нь сануулсан.

СЭТГҮҮЛЧИЙН ТЭМДЭГЛЭЛ: Би л биш бол хэн ч биш гэх сэтгэлгээгээр Ерөнхийлөгчийн сонгуульд АН-ыг оролцсон нэр зүүлгэхээр С.Эрдэнэ тэргүүтэй хэсэг нөхөд тэнд бүдчиж яваа. Ерөнхийлөгчийн сонгуулийг хяналтаасаа бүрэн алдсан Х.Баттулга аль хэдийн дараагийн нүүдэл рүүгээ шилжжээ. Чингэхдээ намын даргаар М.Тулгатыг ч, О.Цогтгэрэлийг ч бүртгүүлэхгүй гэж ийш тийш утас цохиж суугаа гэх. Эвгүй байрлалд очиж зогссон, эргэх газаргүй болсон М.Тулгат С.Эрдэнийг царайчлан чимээгүй л суусаар байна. АН-ыг залуусын мэдэлд нь авчирч, Ц.Элбэгдоржгүй, Х.Баттулгагүй, С.Эрдэнэгүй, Х.Алтанхуяггүйгээр урагш ахиулах гарцыг хайж О.Цогтгэрэл тэргүүтэй гуравдагч тал оролдож буй дүр зураг үүнээс уншигдаж болох юм.

Г.ИТГЭЛ

Энэ мэдээнд өгөх таны үнэлгээ

Хуваалцаарай Жиргээрэй