Н.Батсуурь допинг биш ёс зүйн зөрчлөөр Сар шинийн барилдаан ӨНЖЛӨӨ

Сар шинийн барилдаан эхэллээ. Даян аваргыг допингийн асуудлаас болж МҮБХ-ноос барилдуулахгүй хэмээх шийдвэр гаргасан. Тэгвэл Н.Батсуурь аваргын хувьд Бөхийн өргөөнд хүрэлцэн ирсэн байлаа.Улмаар цагаан сарынхаа барилдааныг маргаантай болоосой гэж хүсээгүй учир ухамсраараа гарсангүй.

МҮБХ-ны Тэргүүлэгчдийн хурлаар түүнийг энэ удаа барилдуулахгүй байх шалтгаан бүхий тогтоолыг гардуулж өгөв. Уг тогтоолын талаар МҮБХ-ны тэргүүн Ц.Магалжав хэлэхдээ “Н.Батсуурь аваргад МҮБХ-ны Тэргүүлэгчдийн тогтоолыг өгөөд явууллаа. Н.Батсуурь аваргын барилдах эрх аль хэдийн сэргэсэн. Харин энэ удаа барилдуулахгүй гэж тогтоол гаргасан нь ёс зүйн зөрчилтэй холбоотой.

Өнгөрсөн удаа Харцагуудын нэрэмжит барилдааны үеэр барилдаан тасалдуулсан, мөн гарч явах үедээ толь хагалсан учраас ёс зүйн хариуцлага хүлээлгэж, энэ удаагийн барилдаанд барилдуулахаас татгалзсан Тэргүүлэгчдийн тогтоол гарсан. Тиймээс энэ сар шинийн барилдаанд барилдуулахгүй. Дараагийн барилдаанаас барилдаж болно” хэмээв.

Харин Н.Батсуурь аварга хэлэхдээ “Өнгөрсөн Харцагуудын нэрэмжит барилдаан хойшилсны дараа гарч явахад миний дэмжигч, бөх сонирхогч толь хагалсан асуудал үүсгэсэн. Би хагалаагүй. Гэхдээ би хохирлыг бүрэн барагдуулна” хэмээсэн юм. Ямартаа ч энэ удаа Н.Батсуурь аварга допинг биш ёс зүйн зөрчил гаргасан асуудлаар Сар шинийн барилдааныг өнжиж байна

Энэ мэдээнд өгөх таны үнэлгээ

Хуваалцаарай Жиргээрэй