Хүнс, хөдөө аж ахуй, хөнгөн үйлдвэрийн яамны харьяа “Хөдөө аж ахуйн бирж” ТӨХХК анх удаа амьд малын дуудлага худалдаа болон амьд малын спот гэрээний туршилтын арилжааг амжилттай зохион байгуулжээ. Арилжаанд худалдагч талаас Говь-Алтай аймгийн Баян-Уул сумын "Санжин Богд" хоршоо, худалдан авагч талаас мал, мах боловсруулах үйлдвэрүүд цахимаар оролцсон байна.
"Санжин Богд" хоршооноос 200 толгой төлгөн хонь, нас гүйцсэн 50 толгой эм хонь дуудлага худалдаагаар зарах захиалга ирүүлж, худалдан авагч тал цахимаар холбогдсон байна. "Зайсан инвест агро" ХХК худалдан авах хамгийн дээд үнийн санал өгч дуудлага худалдааны ялагч болжээ.
Мөн тус өдөр амьд малын спот гэрээний арилжаанд "Санжин Богд" хоршоо нас гүйцсэн эр 100 толгой мал худалдах санал ирүүлснээс "Зайсан инвест агро" ХХК нэг удаагийн хэлцлээр 20 толгой нас гүйцсэн эр хонь худалдан авсан байна. Ингэснээр цаашид малчдын хоршоо, үйлдвэрүүд Хөдөө аж ахуйн биржээр дамжуулан амьд малыг дуудлага худалдаагаар оруулж худалдах, худалдан авах боломж бүрдэж байна.
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.