Баримт: ЗГ-ын Авто баазын дарга Г.Чинзориг албаны машин хувьдаа ашиглаж, мөнгө шамшигдуулжээ

Засгийн газрын авто бааз УТҮГ энэ онд 88 дахь жилтэйгээ золгож буй. Тэдний хувьд төрийн үйлчилгээний ажлыг тасралтгүй, найдвартай, түргэн шуурхай хүргэх чиг үүрэгтэй байгууллага юм. Сүүлийн үед тус байгууллага хөл хөдөлгөөн ихтэйгээс гадна халаа сэлгээ ч чамгүй явуулж байгаа. Өчигдөрхөн гэхэд л 30 гаруй жил ажилласан жолоочоо ажлаас нь халсан гэх мэдээлэл байна.

Уг байгууллагад өрнөж буй гол асуудал нь жолоочид дарга удирдлагынхаа авлига, албан тушаалаа урвуулан ашигласан явдлыг хуулийн дагуу шийдвэрлүүлэх гэсний улмаас ийнхүү ажилгүй болж буй. Тэр дундаа авто баазын захирлын албыг хашиж буй Г.Чинзориг дээрх асуудлуудтай холбоотой гэх асуудлыг хөндөж эхэлсэн сурагтай.

-Ерөнхий сайдтай нэг нутгийнх бөгөөд түүний дотны хүн гэгддэг байна-

Г.Чинзоригийн хувьд: Одоогийн албан тушаалаа 2020 оны наймдугаар сард авсан буюу ковидын хуулийг баталсны дараагаар томилогдсон байна. Түүнийг эл байгууллагыг удирдсанаас хойш ашиг сонирхлын зөрчил гаргах, ажилчидтайгаа зүй бусаар харьцах, мөнгө завших, байгууллагын машиныг сольж унах зэрэг үйлдлүүд гаргасан гэгдэж буй юм.

Эх сурвалжийн мэдээлж буйгаар тус байгууллагад Хэнтий аймгийнхан ажилд орох нь олширчээ. Учир нь авто баазын дарга Г.Чинзориг нь тус аймгийнх гэгдэх бөгөөд Ерөнхий сайд Л.Оюун-Эрдэнийн дотны хүн хэмээн ярьж явдаг гэх.

Эл үгийн халхавчаар төрийн үйлчилгээний үйл ажиллагааг өөрийн дураар явуулж, улсын хөрөнгийг хувьдаа ашиглаж, мэргэжлийн ур чадвар бүхий жолоочдыг үзэмжээрээ сэлгэн, хамаарал бүхий этгээдүүдээ ажилд авах зэрэг асуудлууд гаргаж байж болзошгүй тухай мэдээллүүд байна.

-ЗГХЭГ-аас Г.Чинзоригийг хууль тогтоомж зөрчсөн хэмээн үзжээ-

Нэн түрүүнд Г.Чинзоригтой холбоотой асуудлаар Засгийн газрын хэрэг эрхлэх газрын дарга Д.Амарбаясгаланд жолооч нарынх нь төлөөлөл хүсэлт хүргүүлжээ.

Улмаар хүсэлтийн дагуу Төрийн өмчийн, бодлого зохицуулалтын газрын даргын тушаалаар байгуулсан ажлын хэсэг төлөвлөгөөт бус хяналт шалгалтыг хийсэн байна. 19 хуудас бүхий шалгалтын тайлантай танилцсаны үр дүнд ЗГХЭГ-аас Засгийн газрын авто бааз УТҮГ-ын удирдлага хууль тогтоомж зөрчсөн, ажил үүргээ хангалтгүй биелүүлсэн зэрэг үйлдэлд хууль тогтоомжийн дагуу арга хэмжээ авч шийдвэрлэх албан бичгийг ТӨБЗГ-т гуравдугаар сарын 15-нд өгчээ.

Гэвч өнөөдрийг хүртэлх хугацаанд дээрх асуудалтай холбоотойгоор хуулийн дагуу арга хэмжээ аваагүй бөгөөд Г.Чинзориг ажилчдаа ар араас нь халсаар байгаа аж.

-Албан тушаалаа урвуулан ашигласан баримтууд-

Г.Чинзоригийг хувийн ашиг сонирхлоо тэргүүнд тавьсан гэх хэд хэдэн баримт бий.

БАРИМТ1: Автомашинуудыг хувьдаа ашигласан

Засгийн газрын тогтоолоор хурааж, татан төвлөрүүлсэн, туулах чадвар сайтай, он залуу, үзэмжтэй том оврын машинуудыг өөрийн хэрэгцээнд сэлгэж хэрэглэдэг байжээ.

Эдгээр машинуудыг хувьдаа ашиглаж байгаад ямарваа нэгэн төрийн өмчийн тогтоолгүйгээр орон нутаг руу, тэр дундаа Хэнтий аймаг руу машин шилжүүлсэн аж. Энэ нь ч хуулийн дагуу нотлогдсон бөгөөд үүний төлөө дөрвөн сая төгрөгөөр торгуулсан аж.

БАРИМТ2: Томилолтын зардал

Тус байгууллагын жолоочдод 2022 оны аравдугаар сарын 21 хүртэл томилолтын зардал хэмээн 28500 төгрөгийг тооцон олгосоор байв. Ингэхдээ байр болон хоолны зардлыг нийлүүлж дээрх мөнгөн дүнг олгодог байна.

Гэвч Сангийн сайдын 2022 оны зургаадугаар сарын 2-ны өдөр 120 тоот тушаалаар Албан томилолтын зардлын тарифыг шинэчлэн баталсан байдаг. Уг тушаалд төрийн албан хаагчийн албан томилолтын хоолны зардлыг суманд 24, аймгийн төвд 28, Улаанбаатар, Эрдэнэт, Дархан хотод 32 мянган төгрөг байхаар тус тус шинэчилсэн. Мөн байрны зардлыг суманд 40, аймгийн төвд 90, Улаанбаатар, Эрдэнэт, Дархан хотуудад 110 мянган төгрөг байхаар баталсан байдаг.

Товчхондоо Сангийн сайдын тушаалыг дөрвөн сарын хугацаанд дагаж мөрдөөгүй хэрэг. Хэрэв энэ хэмжээний томилолтын зардлыг жолооч бүрд олгодог хэмээн тайландаа бичсэн бол бодит байдалд дээрх мөнгөний зөрүү хайчсан нь тодорхойгүй гэсэн үг.

БАРИМТ3: Даатгал

2021 оны тавдугаар сарын 6-8-ны өдрүүдэд тус авто баазын 0026 УБЗ, 0126 УБЗ улсын дугаартай автомашинууд нь Өмнөговь аймагт явж байхдаа хүчтэй шороон шуурганд өртсөн байна.

Улмаар автомашины эвдрэл гэмтэл нэрийдлээр даатгалын нөхөн төлбөрт 100 орчим сая төгрөгийг Монгол даатгалаас гаргуулжээ. Ингэхдээ Монгол даатгалд албан бичиг явуулж “Очух” ХХК-ийн данс руу шилжүүлэн авсан бөгөөд үүнийхээ 18 орчим сая төгрөгийг Засгийн газрын авто баазын данс руу хийсэн байна.

Уг хоёр автомашины салхины шилийг сольсноос өөрөөр засвар үйлчилгээг хийгээгүй ажээ. “Очух” ХХК нь Засгийн газрын авто баазтай хамаарлын бус байгууллага бөгөөд гүйцэтгэх захирлаар нь Д.Энхжаргал гэх хүн ажилладаг байна. “Очух” ХХК нь дараах чиглэлээр үйл ажиллагаагаа явуулдаг байна.

БАРИМТ4: Мөнгө шамшигдуулсныг нуун дарагдуулсан

Тус баазын инженер Л.О нь Ланд круйзер 200 маркийн автомашины мотороос хоёрыг худалдан авсан мэтээр санхүүгийн албанаас мөнгө гаргуулж авсан байна. Угтаа бол хоёр биш нэг мотор худалдан авсан байжээ. Харин нэг моторын мөнгийг хувьдаа завшсан байж болзошгүй асуудал үүссэн байна. Уг хэргийг захирал Г.Чинзориг нь мэдсэн ч арга хэмжээ аваагүй аж.

БАРИМТ5. Хувьдаа ашигласан шатахууны өрөө жолоочийнхоо нэр дээр гаргасан

Г.Чинзориг 2022 онд баазад зургаан тонн 700 литр шатахууны өртэй байжээ. Эл өрөө өөрийнхөө жолоочийн нэр дээр өр болгон гаргасан байна.

-Автомашины засварын нэрийн дор их хэмжээний мөнгө хувьдаа завшсан байх магадлалтай-

Түүнээс гадна хувьдаа улсын хөрөнгөнөөс завшсан ч байж болзошгүй хоёр тохиолдол байгаа юм.

Нэгдүгээрт. Автомашины сэлбэг, засвар үйлчилгээний зардлаас хувьдаа завшсан байж болзошгүй

Засгийн газрын авто бааз УТҮГ-ын автомашины сэлбэг худалдан авалт хариуцан ажилладаг байсан н.Цогтбаяр нь солонгос сэлбэгийг “Сод интернэйшнл” ХХК, япон сэлбэгийг “Ланд хан төгөл” ХХК-аас авч нийлүүлдэг гэх боловч хямд чанаргүй сэлбэгүүд нийлүүлсээр ирсэн гэх мэдээлэл байна.

Түүнийг Г.Чинзоригийн хадам талын хамаатан гэх. Сэлбэгтэй холбоотой асуудал үүсэх үеэр түүнийг ажлаас нь чөлөөлсөн аж. Түүнчлэн “Ланд хан төгөл” ХХК-ийг Г.Чинзоригийн эхнэрийн хамаарал бүхий компани гэгдэж байна.

Улсын бүртгэлийн мэдээлэлд Ч.Мэргэнбай гэх хүний нэр дээр уг компани бүртгэлтэй байгаа юм. Мөн авто кузов засварын үйл ажиллагаа эрхэлдэг “Буянт-Оч” ХХК-ийн дансаар их хэмжээний мөнгө дамжуулж авдаг байсан гэх. Ингэхдээ засварт ороогүй автомашинуудыг засварт орсон хэмээн тооцон мөнгө шилжүүлдэг байж болзошгүй байна.

Хоёрдугаарт. Баазын малыг хувьдаа авсан байх магадлалтай

Засгийн газрын авто баазын нэр дээр байх малыг Төв аймгийн Баян сумын нутагт малладаг бөгөөд үүнийг Г.Чинзориг өөрийн нутаг болох Хэнтий аймгийн Галшар сумын нутагт шилжүүлэн өөрийн хувийн мал аж ахуйтай нийлүүлсэн байх магадлалтай ажээ.

Ингэхдээ малчных нь цалинг авто баазаас гаргуулах бөгөөд мал маллаж буй гэх нэрийдлээр байгууллагын мөнгөөр өөрийн эзэмшлийн хашаандаа малын хивэг авч, контейнэрт хураалгасан гэх эх сурвалжийн мэдээлэл ч бий.

Энэ мэтээр тус байгууллагын дотор удирдах албан тушаалтны авлига, албан тушаалаа урвуулан ашигласан нөхцөл байдал үүссэн бөгөөд жолоочдын төлөөлөл АТГ-т үндэслэл бүхий хүсэлтээ өгсөн байна. Одоогоор АТГ-аас хэргийн бүртгэл нээн шалгаж байгаа ажээ. Бид уг асуудлын талаар эргэн мэдээлэх болно.

Энэ мэдээнд өгөх таны үнэлгээ

Хуваалцаарай Жиргээрэй