Томилогдоод 400 хоносон Л.Наранбаатар 462 тэрбумын зөрчил гаргажээ

Одоогоос яг нэг жилийн өмнө буюу 2022 оны гуравдугаар сарын 25-ны өдөр Засгийн газрын ээлжит хуралдаанаар Хөтөлийн цемент, шохойн үйлдвэрийг хувьчилсан шийдвэрийг хүчингүй болгож, төрд буцаан авсан билээ. Улмаар захирлаар Л.Наранбаатарыг томилж байв.

Гэвч тэрбээр жилийн хугацаанд хөл дээр нь босгох биш эсрэгээрээ олон зөрчилд оруулж орхисон аудитын дүгнэлт ил болов.

Тодруулбал, Хөтөлийн цементийн үйлдвэр төрд бүрэн шилжсэний дараах есөн сарын санхүүгийн балансыг шалгажээ.

Ингэхэд, 2022 оны дөрөвдүгээр сарын 1-нээс 2022 оны арванхоёрдугаар сарын 31-ний өдөр хүртэлх санхүүгийн тайлангаас 462 тэрбум 551.8 сая төгрөгийн зөрчил илэрч, сөрөг дүгнэлт гарчээ.

Энэ нь Л.Наранбаатарыг даргаар очсоноос хойш долоохон хоногийн дараа санхүүгийн зөрчил үйлдэгдэж эхэлсэн гэсэн үг.

Хоёр акт: Хувийн хэрэглээгээ хангаж, наадам хийж, хайрхан тахиж, бумбын баярт оролцсон 59 сая

Аудитын байгууллагаас “Төрийн хэмнэлтийн хууль” зөрчсөн 64.1 сая төгрөгийн зөрчил илрүүлж, нөхөн төлүүлэх акт тавьжээ.

Эхний акт:

• Гүйцэтгэх захирлын хувийн зардалд 6.4 сая төгрөг,
• Улаанбаатар дахь оффисын үйл ажиллагаанд төлөвлөгөөнд тусгаагүй 26.9 сая,
• хайрхан тахиж, бумбын баярт оролцсон 5.9 сая,
• Сангийн сайдын тушаалаар баталсан хэмжээнээс илүү ажилчдын томилолтод 7.7 сая,
• баримтаар нотлоогүй ажилчдын хор саармагжуулах гэсэн гүйлгээний 11 сая төгрөг гэхчлэн нийт 58 сая төгрөгийн үргүй зардал гаргасан байна.

Удаах акт:

• Цемент шохой ТӨХК-ийн охин компани болох Хөтөл Энержи Дулаан ХХК-ийн удирдлагын томилолтын зардалд 2.5 сая төгрөг илүү зарцуулсан,
• урлагийн наамдын үйл ажиллагаанд 900 мянга,
• улсын баяр наадамд 789 мянга,
• барилгачдын баярт 1.8 сая гэхчлэн нийт 6.1 сая төгрөгийг зарцуулжээ.

-Хэмнэлтийн хууль зөрчиж 1.1 тэрбумын үргүй зардал цацаж тансаглажээ-

Төрийн хэмнэлтийн хуулийг хэрэгжүүлэлгүй зөрчиж, тэвчиж болох 1.1 тэрбум төгрөгийн үргүй зардал гаргасан гэж аудит үзжээ. Үүнд нь:

• 4-12 сарын хугацаанд яаралтай ашиглагдахгүй 816.9 сая төгрөгийн бараа материал худалдан авч, зарцуулагдаагүй байна.
• Гүйцэтгэх захирал, газар хэлтсийн дарга нарын 7 хүн Дархан  аймагт амьдрах байр түрээсэлж, 40.5 сая төгрөгийг байгууллагаас төлсөн.
• ТӨБЗГ-ын зөвшөөрөлгүй 206.4 м2 талбай бүхий байрийг 1м2-ыг нь 66.000 төгрөгөөр үнэлж түрээсэлсэн. Түрээсийн үнэ Засгийн газрын тогтоолоор баталсан үнэлгээнээс хэт өндөр 53.7 сая төгрөгийн илүү зардал гаргасан.
• Эдийн засгийн форумд 66.2 сая,
• урлагийн наадам 10.2 сая,
• хөлбөмбөгийн талбай тохижуулахад 25.6 сая,
• 3х3 сагсан бөмбөгийн талбай тохижуулахад 22.3 сая,
• Сэлэнгэ аймгийн жүдо бөхийн холбоо, 2-р цэцэрлэг, Орхон сумын ЗДТГ зэрэгт 26.1 сая,
• барилгачдын баярт 33.1 сая,
• хүлээн авалтын зардалд 14.4 сая гэсээр нийт 1.1 тэрбум төгрөгийн тэвчиж болох зардал гаргасан.

Мөн дараах зөрчлүүд илэрчээ.

Санхүүгийн тайлангийн эхний үлдэгдэлд:

• шүүхийн шийдвэр гараагүй маргаантай урт хугацаат банкны зээлийн өглөг болох 41.9 тэрбум,
• зээлийн хүүгийн өглөг 16.3 тэрбум
• хуучнаар Цемент шохой ХК-ийн удирдлага төрийн шийдвэрийг эс зөвшөөрч, хоёр тал хүлээлцээгүй урт хугацаат хөрөнгө оруулалтын өглөг 275.7 тэрбум
• нэмж төлөгдсөн капитал 420 сая төгрөг,
• эздийн өмчийн бусад хэсэг 2.8 тэрбум нийт 337 тэрбум төгрөг бүртгэлтэй байна.

Мөн тооцоо нийлсэн актаар баталгаажуулаагүй

• олон жилийн насжилттай авлага 42.9 тэрбум
• урьдчилж төлсөн тооцоо 758 сая
• урдчилж орсон орлого 171 сая
• богино хугацаат өглөг 238 сая гээд нийт 44.1 тэрбум төгрөгийг тайлагнасан байна.

-Томилогдсон цагаасаа алдаа гаргасан ч намын далбаан дор толгойгоо илүүлсээр суугч-

Тэрбээр эдийн засагч мэргэжилтэй хэмээн тодотгодог ч, уул уурхайн чиглэлээр илүү мэргэшсэн нэгэн гэгддэг. 2020 оны УИХ-ын сонгуульд "Зөв хүн электорад эвсэл"-ээс Дархан-Уул аймагт нэр дэвшсэн ч тухайн үед эсвлээс татгалзаж, “Сахигтун! Үндсэн хуулийн 19" эвслээс (БЗД) УИХ-ын 22-р тойрогт З.Энхболдтой өрсөлдсөн ч сонгогдож чадаагүй. Улмаар 2021 онд МАН-д гишүүнээр элсэж. Ийн МАН-д элсүүтээ намаар дамжин эл албан тушаалд очсон гэж хэлж болно.

2022 оны аравдугаар сард ЗГХЭГ-аас томилогдсон ажлын хэсгийн дүгнэлтэд, "Чулуунцарын үйлдвэр 2022 онд засварт 116 хоног зарцуулсан бол 2022 оны наймдугаар сарын 19-ны өдрөөс үйл ажиллагаа нь бүрэн сул зогссон 42 хоногийн хугацаанд 14.9 тэрбум төгрөгийн орлого алдсан байна. Чулуунцарын үйлдвэрийн үйл ажиллагааг зогсоосон шалтгааныг судалж үзэхэд 2022 онд таван удаагийн түр зогсолтыг хийж галд тэсвэртэй тоосгоны дулаалга хийсэн байгаа ч шаардлагатай тоосгоны нөөцийг цаг тухайд нь бүрдүүлж чадаагүйн улмаас 116 хоногийг засварт зарцуулсан. Улмаар завсар үйлчилгээний ажлыг хийж дуусгаагүйгээс үйлдвэр ажиллаж эхлэх боломжгүй болж ч байв.

Үйлдвэрийг бүрэн хүчин чадлаар нь авч явж чадахгүй байхад Засгийн газар нь ч, нам нь ч түүнийг эрхлүүлсээр өдий хүргэж ирж.

Л.Наранбаатарын тухай ажлын хариуцлагын асуудал дэгдэж байв. Тодруулбал, түүнийг арваннэгдүгээр сард долоон удаа, арванхоёрдугаар сард арав, нэгдүгээр сард тав, хоёрдугаар сард гурван удаа ажилдаа очсон байж болзошгүй тухай мэдээлэл цацагдаж байв.

Энэ мэдээнд өгөх таны үнэлгээ

Хуваалцаарай Жиргээрэй