Билл Эндрью: Толгойн гоёлыг эхнэртээ авсан, мөн хэрвээ намайг даавал морь унамаар байна

Тулгар төрийн 2232, Их Монгол Улсын 817, Үндэсний эрх чөлөө тусгаар тогтнолоо сэргээн мандуулсны 112, Ардын хувьсгалын 102 жилийн ойн Үндэсний их баяр наадам тохиож буй.

Баяр наадам давхацсанаас гадна энэ жилийг аялал жуулчлалын жил болгосонтой холбоотойгоор Төв цэнгэлдэх хүрээлэнд жуулчдын хөдөлгөөн тасрахгүй байв. Энэ үеэр толгойндоо эмэгтэй гоёл зүүсэн хижээл насны эрийн зургийг хүмүүс сониучирхаж авч байсан юм. Түүнийг Билл Эндрью гэх бөгөөд Лос Анжелесээс манай улсыг зорин иржээ. Түүнтэй цөөн хором ярилцсан юм.

-Сайхан баярлаж байна уу. Анх удаа Монголд зочилж байна уу?

-Баяр сайхан болж байна. Монголд зочилж байгаа анхны тохиолдол маань юм.

-Ирээд хэр удаж байгаа вэ?

-Монголд ирээд одоогоор долоо хонож байна. Дахиад 3-4 хонох төлөвлөгөөтэй байгаа.

-Монголд ирэх болсон шалтгаанаасаа хуваалцаж болох уу?

-Аяллын жуулчдаас бүрдсэн бүлгээрээ Монголыг зорин ирсэн. Америкаас танилцах аяллаар ирсэн юм. Оператор маань "Mongolian Luxury Tours" компанийн н.Соёлоо гэх залуу бий. Тэрбээр уг аяллыг зохион байгуулж, бидэнд Монголыг танилцуулсан. Одоо бид ч өөрсдийн үйлчлүүлэгч нараа зуучилж, Монгол руу аялуулах боломжтой болно.

-Өчигдөр наадмын нээлтийн үйл ажиллагаа болсон шүү дээ. Танд ямар санагдсан бэ?

-Би долоон удаагийн аяллаар нийт 100 гаруй орноор аялсан. Өчигдрийн үйл ажиллагаа өмнө нь харж байсан бүх ёслолын үйл ажиллагаатай адилгүй, харьцуулшгүй байлаа.

-Монгол соёл, уламжлалтай танилцах боломж олгосон байх?

-Монгол Улс түүхээр баялаг юм. Миний мэдэхээр Чингис болон Хубилай хаадын эзэнт улс түүхэн дэх хамгийн том газар нутагтай байсан тул тэд маш гайхалтай захирагчид гэж би боддог. Тун хэрцгий тогтолцоотой байсан тухайн цаг үеийн хувьд нэг соёл нөгөөгөө дарж давдаг, уусах эсвэл сүйтгэх сонголт л байсан. Түүхэн дэх олон саад бартааг эрэлхгээр даван гарсан нүүдэлчид нь амьд үлдсэн дайчдын үр удам юм байна гэж бодсон.

-Наадмын баяраар хуушуур идэв уу?

-Мэдээж, Монгол үндэсний хоолыг их идлээ. Ирснээсээ хойш нэг л удаа "KFC" идсэн.

-Манай улсыг зорин ирэхдээ дотроо юу төсөөлж байсан бэ?

-Монголд ирэхээсээ өмнө сайтар судалгаа хийсэн. Хувцас, соёл, хот, говь зэрэг нь ямархуу байдгийг мэдсэн учраас ирсний дараа гайхаж хүлээж авах ямар нэгэн зүйл байгаагүй.

-Монголд хийхийг хүссэн зүйлээсээ хуваалцаач?

-Би Монголд ирээд морь унахыг ихэд хүссэн. Учир нь түүхэнд тэднийг маш өвөрмөц, гайхам хүчирхэг хэмээн бичсэн байдаг. Харамсалтай нь, 115 кг жинтэй учир намайг даахаар морьд байхгүй бололтой. Морьд нь их жижигхэн биетэй юм билээ. Жижиг биетэй хүмүүс унахад зориулагдсан байх. Гэвч би гэлтгүй хамт яваа аялагчид ч морь унаж үзэхийг хүсэж байгаа.

-Ярилцлагынхаа төгсгөлд нэг зүйлийг сонирхож асуумаар байна. Яагаад толгойн гоёл зүүснээ тайлбарлаач?

-Би энэ толгойн гоёлыг эхнэртээ авсан юм. Олон бүсгүйчүүд зүүгээд үзэсгэлэнтэй харагдаж байсан болохоор эхнэртээ бас уламжлалт гоёл авъя гэж шийдсэн. Зарж байсан эмэгтэй надад “Зүүлгээд өгөх үү?” гэхэд нь дуртайяа толгойндоо зүүсэн. Баяр ёслол болж буй энэ газарт цорын ганц толгойн гоёлтой эрэгтэй байгаа нь би бололтой. Толгойн гоёл зүүсэн нь монголчуудад хөгжилтэй санагдсан байх. Учир нь зарим нь миний зургийг дарж байсан.

-Танилцсандаа баяртай байна. Ярилцсанд баярлалаа

Энэ мэдээнд өгөх таны үнэлгээ

Хуваалцаарай Жиргээрэй