Тодруулга: Үйлдвэр зогсоогүй, "Эрдэнэт үйлдвэр"-ээс цалин зээлсэн гэдэг худал

Цахим орчинд "Дарханы төмөрлөг үйлдвэр" ХХК-ийн талаар гараад буй мэдээллүүдийг холбогдох албаныхнаас нь тодрууллаа.

-Цахим орчинд ажилчдынхаа цалинг өгөхгүй удаашруулсан гэдэг гомдол мэдээлэл гарсан. Мөн “Эрдэнэт үйлдвэр”-ээс зээлж цалингаа тавьж байгаа гэх мэдээлэлд товч тайлбар өгөөч?

-“Дарханы төмөрлөгийн үйлдвэр” ХХК-д өнөөдрийн байдлаар 1536 ажилтан ажиллаж байна. Ажилчдын дундаж цалин 2,9 сая төгрөг байдаг. 2022 оны 4-р сараас хойш буюу концессын гэрээ цуцлагдаж төр өмчөө буцаан авснаас хойш цалин хугацаанаасаа хожимдох, сараар өнжих, хойшлох нэг ч тохиолдол гараагүйг хариуцлагатайгаар хэлье. Цалинг сар бүрийн 5, 20-ны өдрүүдэд олгодог. 2023 оны 7-р сард олгогдох сарын эцсийн цалин 8-р сарын 5-ны өдөр олгогдох байсан боловч 8-ны өдөр 3 хоногийн хоцрогдолтой олгогдсон асуудал гарсан.

Үүний шалтгаан нь амралтын өдөр таарсан болон гэрээт компаниудтай борлуулалтын тооцоо хийх ажлуудад “Дарханы төмөрлөгийн үйлдвэр” ХХК-иас шалтгаалахгүйгээр удааширсан асуудлаас шалтгаалж ийнхүү гурав хоногоор хожимдсон асуудал гарсан.

Ажилтнууд маань үүнд хүлээцтэй хандаж асуудлыг ойлгож хандсан. “Эрдэнэт үйлдвэрээс зээл авч цалингаа тавьж байгаа ..” гэсэн танай мэдээллийн тухайд энэ ор үндэсгүй худал мэдээлэл. “Эрдэнэт үйлдвэр” ТӨҮГ-тай “Дарханы төмөрлөгийн үйлдвэр” ХХК нь ган бөмбөлгийн бэлдэц нийлүүлэх гэрээтэйгээр ажилладаг. Гэрээгээр хүлээсэн үүргээ манай компани цаг тухайд нь биелүүлээд ган бөмбөлгийн бэлдэцээ нийлүүлж борлуулалтын орлогоо авдаг. Энэ жил бид 20 гаруй мянган тонныг нийлүүлэх гэрээтэй, гэрээнийхээ дагуу хоёр компани хамтран ажиллаж байна. Зээл авсан асуудал огт байхгүй.

-Техникийн засвар нэрийдлээр сул зогсолт хийгээд байгаа гэдэг үнэн үү?

-Сул зогсолт хийсэн асуудалгүй байхгүй. Гангийн үйлдвэрийн 3 цехэд тухайлбал Бэлдэц үйлдвэрлэх цех, Цувимал үйлдвэрлэх цех, Үйлдвэрийн шугам сүлжээний цехэд 56 засварын ажлыг төлөвлөгөөний дагуу хийж байна. Түүнчлэн өвөлжилтийн бэлтгэлийг хангах 116 ажил хугацаандаа хэвийн үргэлжлээд явж байна.

-Баяжуулах үйлдвэрийн нэг зургаадугаар сарын 01-нд зогссон. Нөгөөхийг нь аравдугаар сарын 01-нд зогсооно гэх мэдээлэл бий. Ямар нэгэн доголдол, саад бэрхшээл үүсээд байгаа юу?

-Доголдол, саад бэрхшээл үүсээгүй. Ямар ч компани, тэр дундаа уул уурхай, хүнд үйлдвэрүүд тодорхой ажлын төлөвлөгөөтэйгөөр төлөвлөгөөнийхөө дагуу л үйл ажиллагаагаа явуулдаг. Төмөрлөгийн хамт олон бизнес төлөвлөгөөндөө компанийн ашигт ажиллагааг хангах төлөвлөлтийг хийж, үйлдвэрлэлийн хэвийн аюулгүй ажиллах нөхцлийг хангаж ажиллах бүх төлөвлөлтөө тусгаад түүнийгээ үйл ажиллагаагаараа хэрэгжүүлээд явж байна.

Энэ ажлын төлөвлөгөөнийхөө дагуу аль үйлдвэрээ хэдийд засварлах алийг нь хэзээ ажиллуулах нь компанийн дотоод асуудал. Компанийн уул уурхай болон гангийн үйлдвэрлэл хэвийн үйл ажиллагаагаа үргэлжлүүлэн явуулж байгааг дахин хариуцлагатайгаар хэлж байна.

Энэ мэдээнд өгөх таны үнэлгээ

Хуваалцаарай Жиргээрэй