М.Бадарчийн В сорьц эерэг гарвал Ц.Бямба-Отгонд Улсын арслан цолыг шилжүүлэх нөхцөл бүрдэнэ

Улсын арслан М.Бадарч В сорьцоо өгөх 14 хоногийн хугацаа өнөөдөр /2023.09.04/ дуусч буй.

-М.Бадарч В сорьцоо өгөх хүсэлтээ гаргасан уу-

Монголын допингийн эсрэг үндэсний дүрэмд,

8.3.2 Тамирчин эсвэл допингийн эсрэг дүрмийг зөрчсөн бусад этгээд энэ мэдэгдлийг хүлээн авснаас хойш 15 хоногийн дотор, эсвэл мэдэгдэлд өөрөөр заасан хугацаанд маргаан үүсгээгүй бол хэрэг хянан хэлэлцүүлэхээс татгалзсан, зөрчлөө хүлээн зөвшөөрсөн, үндэсний допингийн эсрэг байгууллагаас оноох аливаа шийтгэлийг хүлээн зөвшөөрсөн гэж үзнэ хэмээн заасан.

Өөрөөр хэлбэл, А сорьцоо гардсанаас хойш 14 хоногийн дотор В сорьцоо өгөөгүй тул допинг хэрэглэснээ хүлээн зөвшөөрлөө гэж үзэн, нэрийг нь шууд зарлахаар дүрэмчилсэн байдаг. Түүнийг В сорьцын хүсэлтээ 14 хоногийн төгсгөл рүү гэнэт өгсөн гэх мэдээлэл байна.

М.Бадарчийн хувьд А сорьцоо тус яамнаас ирж гардах үеэрээ "Зүрхний эмчилгээ хийлгэсэн" гэх тайлбар хийсэн байдаг.

Эх сурвалжуудын түвшинд түүнийг Улсын Харцага цолны болзол хангахдаа Ц.Мөнхбаярын хэрэглэсэн нь тогтоогдсон, зүрхний эм хэрэглэлсэн гэгдэж буй. Энэ нь бүх цаг үед хориотой сэргээшийн төрөлд ордог бүтээгдэхүүний нэг аж.

-Архангайн УИХ-ын гишүүд М.Бадарчийн асуудалд оролцохгүй гэжээ-

М.Бадарч нь Архангайн "Нутгийн буян" группийн дэвжээний бөх. Түүнийг Улсын арслан цол хүртэхэд тус групп, УИХ-ын гишүүн асан Ж.Мөнхбат тэргүүтэй аймгийн "томчууд" нь тухайлан баяр хүргэж байв.

Архангай аймгаас УИХ-ын гишүүнээр түдгэлзээд буй Ж.Мөнхбат, намрын чуулганаар ХБ-ны зээлийн асуудлаар яллагдсантай нь холбогдуулан, УИХ-ын гишүүний бүрэн эрхээс түдгэлзэх Ё.Баатарбилэг, Г.Тэмүүлэн нар парламентад суудаг.

Ё.Баатарбилэгийн хувьд Ж.Хатанбаатар эмчийн гэр бүлээрээ удирддаг "Монголын Үндэсний допингийн эсрэг байгууллага"-д өөрийнхөө хүмүүсийг байршуулсан, тэнд нөлөө бүхий эрхэм юм.

Гэвч УИХ-ын гишүүдийн зүгээс М.Бадарчийн допингийн асуудалд төдийлөн оролцохгүй байгаа аж. Тухайлбал, УИХ-ын гишүүн Г.Тэмүүлэн оролцох боломжгүй, хуулийнхаа хүрээнд шийдэгдэг гэсэн байр суурь илэрхийлсэн гэгдэж байна.

-М.Бадарчийн Арслан цол Ц.Бямба-Отгон руу "шилжинэ"-

Харин М.Бадарчийн хувьд өнгөрөгч 14 хоногийн хугацаанд "Надад тодорхой мэдээлэл алга байна. Хөдөө байгаа, юун В сорьц яриад байгааг ойлгохгүй байна" зэрэг тодорхойгүй хариулт өгч байв.Тэрбээр хотод байхгүй, орон нутагт амарч байгаа гэдгээ тодотгоод байв. Тэгвэл өнөө өглөөний байдлаар В сорьцоо өгөх хүсэлтээ гаргажээ.

ХЗДХЯ-наас өгч буй мэдээллээр бол, тэр 14 хоногийн хугацаандаа В сорьцоо өгөөгүй тул нэрийг нь зарлахаар зэхэж байв.

Хэрвээ М.Бадарчийн В сорьц эерэг гарвал Улсын арслан цол Ц.Бямба-Отгон руу шилжих нөхцөл байдал шинээр үүсэх юм. Мэргэжлийн хүрээнд яригддагаар А сорьцоор допинг илэрсэн бол В сорьц дээр үгүйсгэгдэх магадлал бараг л байдаггүй гэгддэг.

Мөн "Монголын Үндэсний бөхийн холбоо"-ноос хуулийн хугацаа болоогүй байхад допингийн асуудлыг нийтэд задруулсан мөртөө өөрсдөө тодорхой тайлбар хийхээс зугтсан гэх үндэслэлээр "Монголын үндэсний допингийн эсрэг байгууллага" НҮТББ-ыг шүүхэд өгч буйгаа мэдэгдээд байгаа юм.

Г.ИТГЭЛ

Энэ мэдээнд өгөх таны үнэлгээ

Хуваалцаарай Жиргээрэй