"Эзгүйд яаж байна аа"

Одоо улс төрийн хүрээндээ МАН-ын дарга Л.Оюун-Эрдэнэ, генсек Д.Амарбаясгалан нарын эв эвдрэх үү, тэд муудалцвал намын гишүүд нь хэрхэн хөдлөх вэ. Удаан хугацаанд хичээж, "нэг үеийн" агуулга дээрээ гар барьсан хоёр залуу ил цагаанаар улс төрийн хагарлаа зарлах уу гэхчлэн асуулт үүсээд буй.

Энэ гэвч яг шинэ сэдэв ч биш юм. Д.Амарбаясгалан Тусгаар тогтнолын ордонд генсекийн ажлаа хийж, Л.Оюун-Эрдэнэ Төрийн ордонд Засгийн газраа ахалж ажиллах үеэс хойш энэ өнцөг хэн бүхний сонирхлыг татсаар ирсэн.

Үүнийг дэвэргэх гэсэн мэт, Д.Амарбаясгалан Тусгаар тогтнолын ордонд УИХ-ын байнгын хороодын дарга нар, Засгийн газрын гишүүд нарыг дуудаж, хийх ажлынх нь төлөвлөгөөг сонсдог. Тусдаа Засгийн газар, парламентын эрх мэдлийг атгадаг гэх яриа ч нэлээд бодитой байв.

Д.Амарбаясгалангийн Засгийн газар, Парламент дамнасан эл эрх мэдлийг бататгах мэтээр зөвлөх Л.Чулуунзагдынхаа хамт ярьсаар ирсэн Цахим хөгжил, инновац агуулга УИХ дахь Байнгын хороо, Яам болтлоо өргөжсөнийг энэ жилүүдээс харж болно.

Л.Оюун-Эрдэнэ Засгийн газрын танхимаа шинэчлэх хүрээндээ Д.Амарбаясгаланг ЗГХЭГ-ын даргаар татчихсан нь, түүнийг Тусгаар тогтнолын ордонд тусад нь засаглуулахгүй байх, Ерөнхий сайд, намын даргын хувиар жинхэнэ том дарга нь байх үйлдлийг хийсэн гэж харагддаг.

Ингэж Төрийн ордонд намын дарга ба Ерөнхий сайдынхаа дор албан тушаалын хувьд МАН-ын генсек, ЗГХЭГ-ын дарга гэсэн нэг нэгж "доогуур" дэслэлд Д.Амарбаясгалан ирсэн. Тэдний нэгдэл "үе" агуулгаараа нэлээд амжилттай хэрэгжиж, Д.Амарбаясгалангийн олон жил судалгаан дээр ажилласан, цэгцтэй байдал танхимдаа ч хэрэг болсоор буй.

Гэвч нүүрсний дуулиан дунд улс төрийн хүрээндээ ил цагаан яригддаг тонн тутмын ам.долларын "хишиг", барилгын материал болгон мөнгө угаах байдлаар Х.Мандахбаяр тэргүүтнээр дамжуулсан төслүүд, зөвлөх Л.Чулуунзагдын ахын нүүрс угаах үйлдвэр, төрийн томилгоонд намын генсекийн хувиар албан бичгээр чиглэл өгсөн байдал зэрэг түүнд холбогдох үйлдлүүд нь шалгагдах ёстой гэсэн сэжүүрийг өгсөөр буй.

Ийм байдлаар авлига, хээл хахуулийн эсрэг тэмцэнэ гэсэн дүр үүсгэж яваа Л.Оюун-Эрдэнийн яг дэргэд хамгийн ихээр шалгагдах ёстой Д.Амарбаясгалан нь ирээд суучихсан. Түүнийгээ чухам хэрхэхээ мэдэхээ байсан. Улмаар Ерөнхийлөгчийн хуулийн хамгаалалт дор өнөөх нь орохоор түүнтэй хамт амарсан зэрэг логикууд харагдаад буй.

Намрын улс төрийн өнгө аяс иймэрхүү битүү байдлаар эхэлж байтал Д.Амарбаясгалангаар улс төрийн шүглээ авдаг ХҮН намынхан ногоон автобусны дуулиан эхлүүлж, Нийслэлийн МАН-ын хороо, хотын даргын суудалд өндөр амбицтай явсаар ирсэн генсек түүнийгээ эзгүй хойгуур Л.Оюун-Эрдэнэ хоёр чухал томилгоог шууд дангаараа хийх нөхцлөө бэлдчихэв.

Өнөөдөр Д.Амарбаясгалан ирсэн ч түүнийг гадаадад байхад Л.Оюун-Эрдэнэ хэдийнэ улс төрд итгэж болох, хамаг ажлыг нь нугалж яваа Х.Нямбаатарыг хот руу илгээж, түүнд багаа шинээр дэглэх эрхийг томилогдоогүй байхад өгчхөв. Улмаар Х.Нямбаатартай баг болгож, Монголд хувийн анхны төмөр замыг барьсан, гангийн үйлдвэрийн төсөл хэрэгжүүлж, буй, аж ахуйн технократ гэмээр Б.Дэлгэрсайханыг хоршуулах мэргэн санаа олжээ.

Х.Нямбаатар, Б.Дэлгэрсайхан нарын хэн нь ч яг тогтсон төрийн ажлын шугамаар хотыг удирдахгүй. Тэд дүрмийн бус, аж ахуйн аргаар ажлыг түргэвчлэх гэж яарна, ард нь гарах гэж өөрсдийнхөөрөө арга замаа тодорхойлж зүтгэнэ гэдгийг Л.Оюун-Эрдэнэ тооцоолж, "хүчээр" илгээлт хийж буй.

Энэ бүхэнд оролцоогоо үл шигтгэж, хотын удирдлага, Нийслэлийн МАН-ын хороог авах санаанаасаа бүрэн ухарсан байдлаар Д.Амарбаясгалан өнөөдрөөс оролцож эхлэх нь ээ.

Утгачилбал, Д.Амарбаясгалангийн эхлүүлсэн байж зорилтот акцыг Л.Оюун-Эрдэнэ яг өөртөө ашигтай хэлбэр болгоод, шуудхан хэрэгжүүлчхэж байгаа юм. Д.Амарбаясгалан энэ тохиолдолд гаднаа маш тайван харагдаад, дотроо хувь хүнээрээ баахан тухгүй л байна байх.

Уг агуулгаарх өмнөх тойм:

"Д.Амарбаясгалаан баяртай, ах нь анзаарч байгаа шүү" агуулгыг ЭНД ДАРЖ уншина уу.

Энэ мэдээнд өгөх таны үнэлгээ

Хуваалцаарай Жиргээрэй