ҮАГ-аас Д.Загджавыг сонгуулиас өмнө явуулж, Б.Бундхоролыг дотроос томилох спикерийн хувилбар

Улстөрийн намуудын мөрийн хөтөлбөр, санхүүжилтийг хянах үүрэг бүхий СЕХ-ны даргын дараа сонгуульд нөлөөтэй ажиллах субъект бол Үндэсний аудитын газрын дарга. Сонгуульд нэр дэвшихээр оны өмнө ажлаа өгсөн Д.Занданбатаас хойш Д.Загджав орлож сууна. Чухамдаа тэр хаан, заан мэт авирлах болсон тухай дуулдсаар буй.

Сонгуулиас өмнө УИХ-ын дарга Г.Занданшатар томилгоо хийх эсэх нь асуулт дагуулаад байна. Хуулиараа спикер ҮАГ-ын даргыг санал болгон нэрлэж, УИХ-аар хэлэлцэн томилдог.

Харин ҮАГ-ын даргын орон тоон дээр нээлттэй сонгон шалгаруулалт зарлах уу, дотроос нь томилгоо хийх үү гэдэг хувилбар яригдаж байгаа бололтой. Ямартай ч УИХ-ын ээлжит сонгуулиас өмнө буюу ирэх долоо хоног юм уу, дөрөвдүгээр сарын эхээр томилгоо хийгдэх чигтэй байна.

Дотоодоосоо гэх хувилбарт Б.Бундхорол гэх ганцхан нэр яригдаж буй. Тэрбээр,Үндэсний аудитын газрын Хөгжлийн бодлого, төлөвлөлтийн газрын захирал, Тэргүүлэх аудитор юм. Бүр тодруулбал, УИХ дахь МАН-ын бүлгийн дарга Д.Тогтохсүрэнгийн эхнэрийнх нь дүү гэдэг мэдээлэл бий.

Гаднаас Төрийн албаны зөвлөлийн дарга асан Б.Баатарзоригийн нэр ч яригдаж байгаа аж.

Харин дэд даргаар суулгачхаад гарсан Д.Занданбатын найз Д.Загджавыг спикер амбицынхаа хувьд сонгуулиас өмнө явуулах чигтэй байна. Гэвч Д.Загджавын гол амбиц сонгууль дуусгах чиглэлээр спикерээс гуйх агуулга дуулдав.

Д.Загджавын хувьд, 1985 онд НАХЯ-ны Цэргийн дээдийг төгсөөд 1987 онд хүртэл Дорноговь аймагт хоёр жил цагдаагаар ажилласан. 1997 оноос нам дагаж, улс төрд орж ирсэн. Уул, уурхайн дэд сайдад болтлоо мандсанаас хойш Засгийн газрын агентлагуудын даргын суудлаас буухаа болиод удаж байна. Ц.Анандбазарын бизнесийг хамгаалагч, ажлын ямар ч дүргүй түүнийг Ерөнхий сайд байхдаа У.Хүрэлсүх ШШГЕГ-ын даргаар томилж, олныг жинхэнэ утгаар нь гайхшируулж байв. МАН ялах бүртээ Д.Загджавт албан тушаал өгч, өнөөх нь ч сайн муу лоббигоор үргэлж албан тушаалтай байж ирсэн нэгэн.

Энэ мэдээнд өгөх таны үнэлгээ

Хуваалцаарай Жиргээрэй