"Эмоци"-ын Д.Түвшинтөр: Т.Бадамжав, Б.Номин хоёр ямар асуудалд орсныг мэдэхгүй байна

"Эмоци" продакшны жүжигчин Б.Номин "Baji&Ylalt" влогийн 201 дэх дугаарт зочноор уригдаж, ярилцлагынхаа үеэр "Оюутан байхдаа доод үеийнхнийгээ дээрэлхэж байгаагүй" хэмээн ярив. Гэвч нэвтрүүлгийн дараа жүжигчин Т.Бадамжав, Б.Мишээл, Б.Номин нарын доод курст нь сурч байсан охин СУИС-ийн оюутан байх үедээ бусдыг дээрэлхдэг байсан тухай нь хэлж, шүгэл үлээсэн юм.

Нийгмийг талцуулаад буй дээрэлхэлтийн эл асуудлаас үүдэн тус жүжигчидтэй хамтран ажилладаг байгууллагууд гэрээгээ цуцлах, иргэд хамтрагч байгууллагуудад нь хамтралаа цуцлахыг санал болгох хандлага ажиглагдаад байна. Тиймээс "Эмоци" продакшны захирал жүжигчин Төтө буюу Д.Түвшинтөрөөс продакшны нь жүжигчин болох Т.Бадамжав, Б.Номин нар уг асуудалд нэр холбогдож буйд ямар байр суурьтай байгаа талаар тодрууллаа.

Тэрбээр "Юу болоод байгааг мэдэхгүй байна. Би хөдөө явж байна. Танай продакшны жүжигчид гэж хэн хоёр, юу болсон юм бол оо" гэдэг хариултыг өгөв.

Ташрамд дурдахад, мэргэжил нэгт дүү нараа дээрэлхдэг байсан гэх жүжигчид энэ мэдээллийг үгүйсгэж, хууль хяналтын байгууллагад хандаж, нэр төрөө сэргээлгэхээ илэрхийлээд байгаа. Олны анхаарлыг татаад буй энэ сэдвийн хүрээнд СУИС-ийг тойрсон олон асуудал, тэр дундаа курсийн ялгаа, дээрэлхэлт их гардаг гэх мэдээлэл цахим орчинд давлагаа үүсгээд байна.

Энэ мэдээнд өгөх таны үнэлгээ

Хуваалцаарай Жиргээрэй