Ж.Ганбаатар сайдыг ЗГ-т танилцуулах үүргээ биелүүлэхгүй, “эс үйлдэхүй” үзүүлсэн гэж АТГ дүгнэжээ

-Гомдол мэдээллийн дагуу хоёр хуулийн заалтаар хянан шалгажээ-

АТГ-т хэд хэдэн компаниас УУХҮ-ийн сайд Ж.Ганбаатарыг “Шүүхийн хүчин төгөлдөр шийдвэрийг биелүүлэх асуудлыг Засгийн газарт уламжлахгүй хясан боогдуулж байна” гэх агуулгатай гомдол гаргажээ.

Гомдол мэдээллийг хүлээн авсан Авлигатай тэмцэх газар нь

• Авлигын эсрэг хуулийн 9.9.2 дахь хэсэг,
• Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуулийн 26.4 болон 28.1.2 дахь заалтыг үндэслэн хянан шалгажээ.

-11 компанид нөхөн олговор олгох тухай гурван шатны шүүхийн шийдвэрийг Засгийн газрын хуралдаанаар оруулж танилцуулаагүй, эс үйлдэхүй үзүүлжээ-

Дэлгэрүүлбэл,

• Захиргааны хэргийн анхан шатны шүүхийн шийдвэр,
• Захиргааны хэргийн давж заалдах шатны шүүхийн магадлал,
• Улсын дээд шүүхийн хяналтын шатны тогтоолоор

1. "Жи Эн Ти Эл" ХХК,
2. "Аж Эксплорэйшн" ХХК,
3. “Монгол Ураниум ресурс" ХХК,
4. “Алтан динар" ХХК,
5. "Ганган гялбаа" ХХК,
6. "Бэрх ресорсиз" ХХК,
7. "Эн Си Ар Ай" ХХК,
8. "УУНК" ХХК,
9. "Итгэлт хүлэг" ХХК,
10. "Өгөөмөр тариа" ХХК,
11. "Жи Би Ди Эн" ХХК нарын тусгай зөвшөөрлүүдтэй талбайг улсын тусгай хэрэгцээнд буюу төрийн мэдэлд шилжүүлсний улмаас үйл ажиллагаа явуулах боломжгүй болсон үндэслэлээр нөхөн олговор авах хүсэлтийг нь хуульд заасан журмын дагуу шийдвэрлэхийг Монгол Улсын Засгийн газар, Ашигт малтмал, газрын тосны газарт даалгаж" шийдвэрлэжээ.

Гурван шатны шүүхийн шийдвэр хүчин төгөлдөр байна. Гэвч Шүүхийн шийдвэр гүйцэтгэх газрын шүүхийн шийдвэр биелүүлэх удаа дараагийн мэдэгдлийн дагуу тодорхой арга хэмжээ авахгүй байгаа аж.

Засгийн газрын хуралдаанаар хэлэлцэх асуудлын тухай саналаа Засгийн газрын холбогдох гишүүнээр уламжлан тавьж болох зохицуулалттай.

Өөрөөр хэлбэл Ж.Ганбаатар сайд шүүхийн шийдвэртэй холбоотой нөхөн олговрын асуудлыг Засгийн газрын хуралдаанаар оруулж танилцуулахгүй байгаа эс үйлдэхүй үзүүлжээ.

Энэ нь Нийтийн албанд нийтийн болон хувийн ашиг сонирхлыг зохицуулах ашиг сонирхлын зөрчлөөс урьдчилан сэргийлэх тухай хуулийн 3.1.11-д заасан "олон нийтийн зүгээс ашиг сонирхлын зөрчилтэй гэх ойлгогдохуйц" нөхцөл байдлыг үүсгэсэн.

Улмаар Авлигын эсрэг хуулийн 7.1.3 "албан үүргээ гүйцэтгэхдээ хууль бусаар ... бусдын эрхийг хязгаарлах" гэснийг зөрчсөн гэж үзэх үндэслэлтэй гэж дүгнэжээ.

-Ж.Ганбаатар сайд хуулийн хэрэгжилтийг хангуулахыг сануулсан бичиг авчээ-

Иймд АТГ-аас Ж.Ганбаатар сайдад хандаж “Монгол усын Засгийн газрын гишүүн Уул уурхай, хүнд үйлдвэрийн сайдын эрхлэх асуудлын хүрээнд дээрх хууль, холбогдох шүүхийн шийдвэрийн биелелт болон Ашигт малтмалын тухай хуулийн 9 дугээр зүйлийн 9.1.13 дахь заалтын хэрэгжилтийг хангах зорилгоор бүрэн эрхийн хүрээнд тодорхой арга хэмжээ авч хэрэгжүүлэн үр дүнгийн талаар Авлигын эсрэг хуулийн 6 дугаар зүйлийн 6.6 дахь хэсэгт заасны дагуу хариу мэдэгдэнэ үү” хэмээх бичиг илгээжээ.

Үүнийг 2024.04.12-нд АТГ-ын Тамгын хэлтсийн дарга, эрхэлсэн комиссар З.Баасанням хуулийн хэрэгжилтийг хангуулах тухай албан бичгийг Ж.Ганбаатар сайдад хүргүүлсэн байна.

Энэ мэдээнд өгөх таны үнэлгээ

Хуваалцаарай Жиргээрэй