Нэг дороос | Н.Өнөрцэцэг: Хэргээ хурдан шийдүүлж, үр хүүхдээ тэжээмээр байна

НЭМЭЛТ: 09.40 цаг

Шүүх хурлыг хойшлуулсны дараа сэтгүүлч Н.Өнөрцэцэг байр сууриа илэрхийллээ.

Тэрбээр, “Би хэргээ хурдан шийдүүлмээр байна. Үр хүүхдээ тэжээмээр, ажлаа хиймээр байна. Гэвч маш удаан хугацаагаар хойшлууллаа. Мөн зарим зүйл ч тодорхой харагдаж байна. Сонгуулийн дараа шүүхээр боллоо шүү дээ. Ц.Гарамжавын өмгөөлөгч хойшлуулах хүсэлт гаргасан. Хэрэгтэй бүрэн танилцахыг хүссэн. Хагас жил өнгөрөхөд хэрэгтэйгээ танилцаагүй явж байсан бололтой. Түүний хүсэлтийг хангаснаар, хуралдааныг хойшлуулчихлаа. Би ядаж таслан сэргийлэх арга хэмжээг өөрчилж өгөөч гэж хүссэн. Гэртээ хоригдох хүнд байна. Мод ногоорсныг ч мэдэхгүй дөрвөн сар болчихсон байсан. Энэ хүсэлтийг маань хэлэлцсэнгүй. Би цаашид ч шүүх хурлаа нээлттэй явуулах хүсэлт гаргасаар байх болно” гэлээ.

НЭМЭЛТ: 09.30 цаг

-Н.Өнөрцэцэгийг сонгуулийн дараа шүүхээр боллоо-

Н.Өнөрцэцэгийг шүүх хуралдааныг бүхэлд нь хаалттай зохион байгуулахаар шийдвэрлээд байв. Улмаар хуралдаан эхэлсэн. Гэвч удалгүй, шүүх хуралдааныг долдугаар сарын 1 хүртэл хойшлуулах шийдвэр гаргажээ. Энэ нь 2024 оны УИХ-ын сонгуулийн дараа таарч байна.

НЭМЭЛТ: 09.20 цаг

Б.Ганчимэг: Н.Өнөрцэцэг гэдэг шаазгайг шонд өлгөж харуулах машин ажиллаж байна

Сэтгүүлч, СГЗ Б.Ганчимэг шүүхийн гадаа очиж, байр сууриа илэрхийллээ.

Тэрбээр, "Н.Өнөрцэцэг гэдэг шаазгайг шонд өлгөж харуулах машин ажиллаж байна Сэтгүүлч, СГЗ Б.Ганчимэг байр сууриа илэрхийллээ. Тэрбээр “Н.Өнөрцэцэгт ШЕЗ гомдсон. Түүний дараа эрчилж, хуйлраад аваад явсан л даа. Гомдогч байгууллага өнөөг хүртэл байр сууриа илэрхийлээгүй. ШЕЗ өөрөө улс төрийн хань хамсаатан байгууллага болсноо хангалттай харуулсан. Энэ тохиолдолд олон сар ажиглахад, залхаан цээрлүүлэлт явагдаж байна. Бүх талаар. Шүүгдэгч өөрөө нээлттэй шүүлгэе гэж хүсэж байна. Энэ бол том байр суурь. Би бол захиалагчдыг, сонгууль өнгөртөл хойшлуулна гэдгээ тохирчихсон гэж харж байна. Эхэндээ аман байдлаар эх орноосоо урвасан гэдэг заалттай нэлээд хольж, хутгаж тараасан. Яах вэ, бид бүгдээрээ л өөрсдийн эх сурвалжтай шүү дээ. Судлахаар, гүйцэтгэх ажиллагааны явцад төрийн нууц гэгдээг байгаа цаасаа шургуулсан байж болзошгүй юм билээ. “Хэдэн гэнэн охид дээр тэгчихсэн ш дээ” гээд ярьж байсан тал бий. Намайг дуудах л байх. Энэ их хэвийн мэт санагддаг болчихлоо.

Олон түмний мэдэх эрх дээр дуугарч буй харанга, том өсгий. Тал талдаа, өөр өөрийн араншин, өөр өөрийн боломжоор дуугарах хэрэгтэй байна. Энэ бол занаатай шүүх хурал. Занаанд орохгүйн тулд зам тойроод гүйх үү, мөнхийн айдастай, бөөрөнхий бөмбөрч амьдрах уу. Сэтгүүлчид өөрсдөө мэргэжлийн оршихгүй бол доншуучид индрийг эзэллээ. Багаараа орж ирээд даналздаг. Би Н.Өнөрцэцэгтэй 10 минут тухтай уулзаж үзээгүй. Шинэ үеийн сэтгүүл зүйн үзэгдэл мөн үү, мөн. Заримдаа мэргэжлийн чиг хандлагаас хадуурсан уу, хадуурсан. Хамгийн олон хандагчтай хэвлэл, мэдээллийн хэрэгслийг байгуулсан уу, байгуулсан. Машин бол ажиллаж байгаа юм байна. Өнөрцэцэг гэдэг шаазгайг шонд өлгөж харуулах гэж байна. Харцгаая даа” гэлээ.

ЭХЛЭЛ: 09.00 цаг

-Н.Өнөрцэцэгийг шүүх хурлыг хаалттай хэлэлцэхээр боллоо-

Шүүгдэгч Н.Өнөрцэцэгт холбогдох хэргийн гэм буруугийн шүүх хуралдаан Сүхбаатар дүүргийн Эрүүгийн хэргийн анхан шатны шүүхэд 2024 оны 06 дугаар сарын 04-ний өдрийн 09.00 цагт товлогдсон. Улмаар зарим хэвлэл мэдээллийн байгууллага шүүх хуралдааныг нээлттэй явуулах талаар хүсэлтүүд гаргаад буй юм.

Шүүгдэгч Н.Өнөрцэцэгт холбогдох хэргийн урьдчилсан хэлэлцүүлгийн шүүх хуралдаан яллагдагчийн өмгөөлөгч нараас гаргасан хүсэлтийн дагуу 2024 оны 05 дугаар сарын 28-ны өдөр болсон бөгөөд урьдчилсан хэлэлцүүлгийн шүүх хуралдаанаас яллагдагчийг шүүхэд шилжүүлсэн.

Шүүхийн урьдчилсан хэлэлцүүлгийн шүүх хуралдаанд прокурорын зүгээс гэм буруугийн буюу үндсэн шүүх хуралдааны төрийн болон хувь хүний нууцтай холбоотойгоос бусад хэсгийг нээлттэй явуулах талаар хүсэлт гаргасныг шүүх Эрүүгийн хэрэг хянан шийдвэрлэх тухай хуулийн 34.4 дүгээр зүйлийн 2 дахь хэсгийн 2.1 дэх хэсэгт заасан үндэслэлээр хүлээн авахаас татгалзаж, шүүгдэгч Н.Өнөрцэцэгт холбогдох хэргийн гэм буруугийн шүүх хуралдааныг бүхэлд нь хаалттайгаар хянан хэлэлцэхээр болсныг үүгээр мэдэгдэж байна гэж СБД-ийн эрүүгийн хэргийн анхан шатны шүүхийн тамгын газраас мэдээллээ.

Хуулийн тайлбар:

34.4 дүгээр зүйл. Шүүх хуралдааныг нээлттэй явуулах

• 1.Шүүх хуралдааныг нээлттэй явуулна.
• 2.Шүүх хуралдааныг дараахь тохиолдолд бүхэлд нь, эсхүл зарим хэсгийг хаалттай явуулна:
• 2.1.төрийн болон албаны нууц, байгууллагын нууц, хүний эмзэг мэдээлэлтэй холбоотой хэргийг хянан шийдвэрлэх;

Б.ХАШ-ИЛД

Энэ мэдээнд өгөх таны үнэлгээ

Хуваалцаарай Жиргээрэй