Ерөнхийлөгч У.Хүрэлсүхийн нөөлгөөр авлигын хэргээ даруулсан элчин сайд Т.Бадралыг цаашид хэрхэх вэ

Дөрвөн жилийн өмнө Онцгой байдлын ерөнхий газрын дарга асан Т.Бадралыг БНХАУ-ын нийслэл Бээжин дэх Монголын элчин сайдын яам руу Онц бөгөөд Бүрэн эрхт Элчин сайдаар томилон явуулж байсан билээ. Онцгой байдлыг удирдаж байсан хошууч генерал цолтой хүнийг гэнэтхэн элчингээр томилоод явуулчихсан нь тухайн үедээ их сонин дүр зураг болсон.

Одоогийн ерөнхийлөгчийн дотны нөхөр гэгддэг Т.Бадрал нь салбартаа мэргэжилтнээс авхуулаад ажилласан олон жилийн туршлагатай гэгдэж түлхүүлсээр ерөнхийлөгчийг шадар сайд байх үед буюу 2015 онд ОБЕГ-ын дэд даргаас даргын албан тушаалд томилогдсон. Ажлаа аваад жил ч болоогүй байхдаа АТГ-ын мөрдөн шалгахаас түүнийг албан тушаалаа урвуулан ашигласан гэх үндэслэлээр шалгаж эхэлсэн юм.

Тухайн үед ОБЕГ-ын хэд хэдэн хүн түүнтэй хамт шалгагдаж байв. ОБЕГ-ын тендерүүдийг будлиантуулж хуучин автомашин нийлүүлсэн, гал унтраах аврах хэрэгсэл, галын хөөс зэрэг 400 орчим сая төгрөгийн иж бүрдлийг тендер зарлалгүй авсан, төсвийн хагас тэрбум төгрөгөөр хамтран ажиллагчийнхаа хүргэнд өгч гараж бариулсан, шаардлага хангахааргүй засварын ажилд 160 сая төгрөг зарцуулсан зэрэг нь шалгалтаар тогтоогдож, мөрдөн байцаалтаар батлагдаж байсан түүхтэй. Оросоос авчирч ОБЕГ-т нийлүүлсэн гэгдэх 50 мянга орчим ам.долларын машины асуудал ч мөн сөхөгдөж байгаад намжсан.

Хэргийн явц хоёр жил орчим хуулийн байгууллагаар эргэлдэж байгаад прокуророос нотлох баримт хангалтгүй гэх үндэслэлээр буцаагдсан байдаг.  Албан тушаалын хэрэг гэдэг одоогийн хуулиар цаасан дээр мөртэй болсон. Урьдынх шиг хэрэг хөөн хэлэлцэх хугацаа дууссан гэдэг үе ард хоцорсон, уг нь. Гэвч элчин сайд Т.Бадрал ерөнхийлөгч асан Х.Баттулга, Ц.Элбэгдоржтой ч ойр найзууд гэгддэг. Аль аль ерөнхийлөгчөөс томоохон үүрэг хүлээж гардаж биелүүлэхдээ ч  гарамгай хэмээн түүнийг сайшаах төдийгүй, өөрийнх нь ар талыг ч бат даадаг тэр зайны нөхөрлөлтэй хүн хэмээн ярих нь бий.

АТГ-т байнгын уяатай болсон хүнийг галаас холдуулж улмаар 2020 онд Засгийн газрын ээлжит хуралдаанаар Т.Бадралыг Хятадад элчингээр явуулах саналыг даруй дэвшүүлж, одоогийн ерөнхийлөгчид танилцуулснаар даруй дэмжигдсэн юм. Уг нь орос, англи хэлтэй Москва хотын Хилийн цэргийн командын дээд сургууль төгссөн хүнийг таг эсрэг тийш буюу Бээжин рүү элчингээр явуулчихсан.

Энэ жил түүний элчингээр томилогдон ажиллах хугацаа дуусч буй. Үүнийгээ сануулах мэт өнгөрөгч тавдугаар сард элчин сайд Т.Бадрал өөрийн анд нөхөр, Монгол Улсын Ерөнхийлөгч Л.Хүрэлсүхээс Сүхбаатарын одон гардаж авсан. Магадгүй үүрэгт хугацаа нь дуусахад түүнийг одоогийн ерөнхийлөгч дэргэдээ авах уу эсвэл салбарт нь томилох уу гэдэг одоогоор тодорхойгүй байна. Хэл ам татлаж, хуулийн хаалга сахисаны учир ОБЕГ-таа лав эргэж томилогдох нь юу л бол.

Ерөнхийлөгч У.Хүрэлсүхийн ивээлийг хүртэж авлигын хэргээс мултарсан энэ хүнээ элчингээр явуулж улс төрийн карьерийг нь гамнаж өгсөн ч буугаад ирэхэд нь улайм цайм төрийн өндөр албан тушаалд томилно гэж ширэн нүүрлэх вий дээ.

Т.БАТСҮРЭН

Энэ мэдээнд өгөх таны үнэлгээ

Хуваалцаарай Жиргээрэй