М.Бадарч, Э.Оюунболд нарын санаархал эцэслэн бүтэлгүйтэж, шүүх дээр Допингийн эсрэг үндэсний төв яллаа

Допингийн эсрэг үндэсний төвийн улсын бүртгэл дэх нэр гэнэтхэн, энэ оны хоёрдугаар сард өөрчлөгдчихсөн. Үүний цаана, өнөөгийн допингийн эсрэг байгууллагыг эрх зүйн чадамжгүй гэж үзэх нөхцөл байдал бүрдээд байв.

Тодруулбал, "2017 онд Удирдах зөвлөлийн гишүүн Н.Цогтсайханы гарын үсгийг хуурамчаар зурж, Ж.Хатанбаатарыг Гүйцэтгэх захирлаар томилсон" гэх агуулга бүхий гомдол УБЕГ-т ирсэн байдаг. Энэ дагуу, шүүхийн тогтоолгүйгээр, улсын байцаагч А.Мөнхцэцэгийн шийдвэрээр байгууллагын нэрийг 2017 оноос өмнөх хувилбарт аваачиж, өөрчилсөн.

Харин Допингийн эсрэг үндэсний төв шүүхэд хандсан.

Уржигдар буюу есдүгээр сарын 24-ний өдөр Нийслэл дэх Захиргааны хэргийн анхан шатны шүүхэд энэ асуудлыг хэлэлцлээ. Улмаар, Допингийн эсрэг үндэсний төвийн нэхэмжлэлийг бүрэн хангаж шийдвэрлэсэн байна. Өөрөөр хэлбэл, бүртгэл хуучин хэвдээ орлоо.

Шүүх Н.Цогтсайханыг анхнаасаа УЗ-ийн гишүүн байгаагүйг тогтоожээ

Шүүхийн урьдчилсан хэлэлцүүлгийн үеэр өөрийнх нь гарын үсгийг хуурамчаар зурсан гэж үздэг Н.Цогтсайхан хэрэгт гуравдагч тал болон оролцох хүсэлт гаргасан. Шүүх хүлээж авсан юм. Улмаар уржигдрын хуралдаанд Н.Цогтсайхан оролцжээ.

Түүнчлэн, допинг илэрсэн ч хүлээн зөвшөөрдөггүй М.Бадарч, Э.Оюунболд нарын өмгөөлөгч ч ирсэн байна.

Харин шүүх бүрэлдэхүүн Н.Цогтсайханыг анхнаасаа Удирдах зөвлөлийн гишүүн байгаагүйг тогтоожээ. Тодруулбал, ТББ-ын бүтцээр УЗ-ийн гишүүн ба Гүйцэтгэх захирал тусдаа. Харин анх Н.Цогтсайханыг зөвхөн Гүйцэтгэх захирлаар томилсон байсан. Гэвч Н.Цогтсайхан нь давхар, өөрөө өөрийгөө УЗ-ийн гишүүнээр бүртгүүлэх гэж квот зөрчин оролдсоныг шүүх эцэслэн тогтоосон аж.

Иймд "УЗ-ийн гишүүн Н.Цогтсайханы гарын үсгийг хуурамчаар дуурайлгаж..." гэж маргасан анхын гомдол бүхэлдээ үндэслэлгүй болсон байна.

Н.Цогтсайхан: Би өөрөө энэ байгууллагын Ерөнхийлөгч болмоор байна, шуудхан хэлье

Харин М.Бадарч, Э.Оюунболд нарын өмгөөлөгчийн хувьд хуралдааны үеэр "Энэ байгууллага угаас хүчин төгөлдөр бус. Хүчин төгөлдөр бус статустай болчихвол М.Бадарч, Э.Оюунболд нар шүүхэд ялчих, барилдах эрхээ сэргээчих байсан шүү дээ. Үүнийг бүгд ярьж байна. Э.Оюунболд шүүх дээр яаж ялагдсан билээ?" гэх агуулга бүхий зүйлсийг ярьсан нь анхаарал татаж байна.

Ч.Даваасүрэн нь М.Бадарч, Э.Оюунболдоос гадна Ч.Өсөхбаярыг ч өмгөөлж байсан. Дандаа допинг хэрэглэсэн нь тогтоогдсон бөхчүүд.

Харин Ч.Даваасүрэн өөрт хамааралгүй гэмээр энэ шүүх хуралдаанд өмгөөлөгчөөр оролцсон шалтгаанаа "Би М.Бадарч, Э.Оюунболд нарыг өмгөөлснөөр энэ асуудалд холбогдож эхэлсэн" гэх мэтээр тайлбарлажээ.

Түүнчлэн шүүх хуралдааны үеэр Н.Цогтсайхан "Шуудхан хэлэхэд би өөрөө энэ байгууллагын Ерөнхийлөгч болох хүсэлтэй. Шууд хэлчихье" гэж дуугарчээ.

М.Бадарч, Э.Оюунболд нарын Арбитрт маргахаар зэхсэн үндэслэл энэ байв

Допингийн эсрэг үндэсний төвийн бүртгэл хууль зөрчин өөрчлөгдсөнөөс хойш манай редакц энэ асуудлаар цаг тутам мэдээлэл бэлтгэж буй.

Н.Цогтсайханы хувьд тус байгууллагыг эрх зүйн чадамжгүй болгох чиглэлд М.Бадарч, Э.Оюунболд нартай хамтран ажилласан гэгдсээр ирсэн нэгэн юм. Харин уржигдрын шүүх хуралдаанд энэ эрх ашгууд хамтдаа нэгдэж оролцжээ.

Хамгийн гол нь, Н.Цогтсайхан нарын зүгээс гаргаж тавьсан гомдлоор Допингийн эсрэг үндэсний төвийн 2017 оноос хойших шинжилгээ бүгд хүчингүй болох нөхцөл үүсээд байв.

Харин М.Бадарч чухам үүний дараа буюу, улсын бүртгэл дэх нэр өөрчлөгдсөний дараа Арбитрын шүүхэд хандсан байдаг. Хандахдаа, өөрийнхөө шинжилгээний хариутай биш, харин Допингийн эсрэг үндэсний төвийг буруутгасан. "Эрх зүйн чадамжгүй байгууллага юм биш үү. Иймд миний барилдах эрхийг сэргээ" гэдэг аргумент дэвшүүлсэн. Гэвч Арбитрын шүүх дээр ялалт байгуулж чадаагүй.

Эх сурвалжуудын мэдээлж байснаар, М.Бадарч хэрэв энэ аргументээр ялалт байгуулж чадвал, араас нь Э.Оюунболд шүүхдэхээр бэлтгэж байв.

Тэмдэглэл:

Энэ жилийн Үндэсний их баяр наадмын хүрээн дэх хүчит бөхийн барилдааны допингийн шинжилгээг Допингийн эсрэг үндэсний төвөөр биш, БНХАУ-ын лабораториор хийлгүүлье гэдэг санааг ч Н.Цогтсайхан дэвшүүлж байв. Улмаар Баяр наадам зохион байгуулах хороонд хүсэлт тавьсан байдаг.

Үүнийг нь хүлээж аваагүй.

Н.Цогтсайханы хувьд олон жилийн өмнөөс Допингийн эсрэг үндэсний төвд тодорхой эрх ашгийн үүднээс хандаж, хэвлэлийн бага хурал хийж ирсэн. Харин М.Бадарч, Э.Оюунболд нарын эрх ашигтай энэ нь давхцаж, улмаар "2017 онд миний гарын үсгийг дуурайлгаж, томилгоо хийсэн" хэмээн гомдол гаргах санаа сэдсэн гэж харагддаг. Угтаа өөрөө УЗ-ийн гишүүн биш тул түүний гарын үсгийг дуурайлгах замаар асуудал шийдэх ямар ч боломжгүйг шүүх тогтоочихлоо.

Ямартай ч, хоёрдугаар сараас хойш Допингийн эсрэг үндэсний төвийн бүртгэл 2017 оныхоос өмнөх байдалд шилжчихээд байсан нь үнэн ч М.Бадарч, Э.Оюунболд нар барилдах эрхээ сэргээж чадсангүй. Шинжилгээ бол шинжилгээ. Арбитрын шүүх зөв шийдвэр гаргасан.

Баяр наадам зохион байгуулах комисс ч Н.Цогтсайханы хүсэлтийг хүлээж аваагүй нь ч улсаа бодсон шийдвэр болсон юм. Энэ бүхний цаана, Дэлхийн допингийн эсрэг байгууллагын Монгол дахь эрх хэрэгжүүлэгч МОНАДА өөрөө 2017 оноос хойш хүчин төгөлдөр бус шинжилгээ авч ирсэн гэдэг нөхцөл байдал тогтоогдчих юм бол Олимпод цагаан туган дор оролцох эрсдэл өндрөө авах байв.

Тийм эрсдэл байсан уу, байсан. ЗГХЭГ-ын даргын хэмжээнд төвлөрч ажиллан, Допингийн эсрэг үндэсний төв буюу МОНАДА ч олон улсаас тавьсан шаардлага, даалгаврыг тухай бүрд биелүүлснээр энэ жил монголчууд Олимпод ч, Паралимпод ч амжилттай оролцож чадсан.

Харин уржигдрын шүүх хурал М.Бадарч, Э.Оюунболд нарын болон Н.Цогтсайхан гэгчийн ашиг сонирхлын нэгтгэлийг ил болголоо.

М.ТЭНГИС

ЭНЭ АГУУЛГААРХ РЕДАКЦЫН ӨМНӨХ НИЙТЛЭЛҮҮДТЭЙ ТАНИЛЦАНА УУ.

Өөрийн сэтгэгдлээ илэрхийл

Share Tweet