Энтони Хопкинс: Үнэндээ тийм чухал зүйл гэж байдаггүй юм байна лээ, өөрийнхөөрөө л амьдраарай

Оскарын хоёр удаагийн шагналт жүжигчин Энтони Хопкинс "The Talks" сэтгүүлд өгч байсан ярилцлагыг орчуулж хүргэе.

Ноён Хопкинс, та “Амьдралыг илүү их мэдрэх тусам бүх зүйл зүүд шиг санагдаж эхэлдэг” гэж хэлж байсан. Амьдрал чинь бодит байдалтай зөрчилдсөн юм шиг санагдсан тодорхой мөч байсан уу?

Сүүлийн 30 орчим жил маань яг л тийм байлаа. Багадаа мөрөөдөж, хүсэж байсан бүхний үр дүн, биелэл нь болсон мэт. Би үүнийг 30 жилийн өмнө ойлгосон. “Энэ бүгд үнэхээр жинхэнэ гэж үү? Бүх зүйл бараг л төсөөлж байснаар минь болжээ” гэж бодсон. Миний амьдрал бүхэлдээ л тийм байсан. Бид бүгд амьдралаа өөрсдөө бүтээдэг, тэгэх хүч чадал хүн болгонд байгаа. Тэгж бодохоор гайхширдаг.

Жүжигчид, кино бүтээгчид илүү хүчтэй дотоод ертөнцтэй байдаг гэж та боддог уу? Хүмүүс жүжигчид их мэдрэмтгий, сэтгэл хөдлөл ихтэй байдаг гэж ярьдаг шүү дээ.

Жүжиглэх тал дээр бол урлаг гэдэг үгэнд би нэг их итгэдэггүй. Мах, төмс шиг энгийн, эгэл жүжигчин байхыг үргэлж илүүд үздэг. Жүжиглэл гэдэг өндөрт өргөгдсөн, гоц зүйл биш ээ гэж би боддог. Гэхдээ яах вэ, жүжиглэх нь бүтээлч процесс. Найруулах ч тэр, хөгжим бүтээх ч тэр. Өөрийгөө ч би бүтээлч хүн гэж тооцдог. Гэхдээ бүтээлч хүн заавал жүжигчин, хөгжимчин, зураач байх албагүй. Харин бүтээлч мэргэжилтэй бол илүү хурц мэдрэмжтэй байдаг болов уу. Гэхдээ бүтээлч мэргэжил чамайг онцгой хүн болгодоггүй.

Олон жүжигчин өөрсдийгөө онцгой мэтээр авч үзэж, аашилдаг.

Тэгж бодохоос болгоомжлох хэрэгтэй. Хэрвээ өөрийгөө тусгай хүнд зориулсан онцгой хүчилтөрөгчөөр амьсгалж байна гэж итгэж эхэлбэл аюулын ирмэгт тулжээ гэсэн үг. Тийм бодол галзуурал руу хөтөлнө. Студид ч ийм хүмүүс олон бий. Өөрсдийгөө онцгой гэж итгэдэг. Жүжигчид бол, тийм ээ, магадгүй илүү мэдрэмжтэй байдаг. Энэ нь дээрээс өгсөн ивээл ч байж болно, хараал ч байж болно. Гэхдээ энэ мэдрэмжийг зөв ашиглах л хэрэгтэй. Тэгээд л боллоо. Тийм байлаа гээд хэн нэгнээс дээр, илүү гэсэн үг биш. Зүгээр л тархи маань тийм байдлаар ажилладаг гэсэн үг.

Таны сэтгэлийг гүн хөдөлгөж, урам өгч байсан найруулагч бий юу?

Нэлээд хэдэн найруулагч бий. Тэд бүгд өөр өөрийн өвөрмөц арга барилтай. Би Оливер Стоун, Спилберг зэрэг олон шилдэг найруулагчидтай ажилласан. Үүгээрээ азтай байсан гэж боддог. Харин би кино найруулахдаа аль болох өөрийн гэсэн өвөрмөц өнгө төрхтэй байлгахыг хичээдэг. Мэдээж өөрийн эрхгүй нөлөөлөл авна. Оливер Стоун бол агуу найруулагч. Гэхдээ би өөрийнхөө төсөөллөөс ургуулан бүтээхийг хичээдэг. Тогтсон дүрмийг эвдэж, зүгээр л хөгжилтэй байхын тулд бусдаас өөр кино хийе гэж боддог.

Жүжиглэл эрч хүчээ хадгалж, залуу байхад тусалдаг уу?

Тийм ээ. Би чинь одоо ч залуу байна шүү дээ. Бүтээлч байж, оюунаа завгүй байлгах нь маш зөв зүйл. Хэрвээ тэгэхгүй бол удаанаар үхэж эхэлнэ. Заримдаа ядарч, болих ёстой юм болов уу гэж боддог ч бүрмөсөн тэтгэвэрт гарахыг хүсдэггүй. Одоогийн надад байгаа бүх зүйл их таалагддаг. Чадахгүй болох хүртлээ зогсолтгүй үргэлжлүүлнэ гэж боддог.

Та одоо ч жүжиглэлд дурлан, автдаг уу?

Өмнө нь жаахан донтох маягтай байсан. Харин одоо тийм биш. Одоо бол бүр илүү тааламжтай байгаа. Илүү амархан болсон болохоор юм болов уу? Театрт ажиллаж чадахгүй. Театр надад хэт ноцтой, хоригдож буй мэт мэдрэмж төрүүлдэг. Тэр салбарт ажиллаж чадаж байгаа хүмүүсийг би үнэхээр хүндэлдэг. Харин би өөрийнхөө амьдралаа амьдраад, дундаа жаахан жүжиглэж байвал болчихно гэж боддог.

Одоогийн таны амьдрал ямар байна вэ?

Би төгөлдөр хуур тоглодог. Миний хамгийн дуртай зүйл. Бас ном уншдаг, зурдаг, хөгжим бичдэг. Маш бүтээлч амьдралтай. Гэхдээ энэ нь бүтээлч байдалд автсан гэсэн үг биш л дээ. Зүгээр л би зурах дуртай. Сайн зурдаг эсэхээ мэдэхгүй, гэхдээ ямар ч байсан зурдаг. Маш хурдан зурдаг. Акрил будгаар зурдаг, акрил будгаар зурж чаддаг юм шиг санагддаг юм. Хөгжим бичиж, төгөлдөр хуур тоглож, ном их уншдаг. Амьдрал сайхан байна. Жүжиглэх бол зүгээр л “завсрын” ажил минь юм.

Та өөртэйгөө эвтэй найртай байж сурсан бололтой

Харамсалтай нь би залуу байхдаа одоогийн мэдлэгээ, өөртэйгөө ийм эвтэй байх талаар мэддэггүй байж. Залуудаа хамаагүй илүү ширүүн, бүх зүйлийг хэтэрхий чухалчилж авч үздэг байлаа. Гэтэл эргээд харахаар яагаад тэгж бодсон юм бол? Гэх бодол орж ирдэг. Үнэндээ тийм чухал зүйл гэж байдаггүй юм байна лээ. Өөрийнхөөрөө л амьдраарай. Бид энэ дэлхий дээр тун хоромхон хугацаанд амьдарна гэдгийг ойлгох хэрэгтэй.

Тэгэхээр нас өндөр болох нь таалагддаг гэсэн үг үү?

Тийм ээ. Би өөрийгөө эрүүл байлгахыг хичээдэг. Толь руу харахаар үрчлээснүүд харагддаг ч надад огт хамаагүй. Сайхан байна. Яагаад ийм сайхан байгааг нь би ч хэлж мэдэхгүй. Гэхдээ үнэхээр сайхан байна. Үхэл гэдэг бол аврагч мэт зүйл. Бүх юмнаас чамайг чөлөөлдөг. Тиймээс л амьдрал утгатай болдог байх. Карл Юнгийг унш. Амьдралыг илүү гүн гүнзгий өнцгөөс хардаг болгож өгнө. Яагаад гэвэл амьдрал бол бүхэл бүтэн тоглоом шүү дээ. Бид хаашаа очихоо мэдэхгүй. Тэр нь л хөгжилтэй.

Танд амьдралдаа хүссэн бүхнээ хийж амжсан юм шиг мэдрэмж төрдөг үү?

Тийм ээ, бүр хэтэрхий их. Би маш их азтай хүн. Өмнө нь асуудалтай, зовлон бэрхшээлтэй байсан ч хүн даваад л гардаг. Би гайхалтай амьдралаар амьдарсан. Үүндээ маш их талархдаг.

Эх сурвалж: The Talks

Энэ мэдээнд өгөх таны үнэлгээ

Хуваалцаарай Жиргээрэй