Дэлхий дахиныг цочроосон зартай хүчирхийлэгч агсан Жеффри Эпштейний хэргийн баримт бичгийг америкчууд харах хүсэлтэй байгаа. АНУ-ын Ерөнхийлөгч Доналд Трамп баримт бичгүүдийг дэлгэхгүй гүрийж байснаасаа гэнэт ухарчээ. Ийм учир АНУ-ын Төлөөлөгчдийн танхим өнөөдөр /2025.11.17/ хуралдаан дээрээ Эпштейний баримт бичгийг хүчээр дэлгэх эсэх дээр санал хураах болсон байна. АНУ-ын Төлөөлөгчдийн танхимын спикер Майк Жонсон мэдэгдэл хийхдээ энэ санал хураалт нь Трамп Эпштейний хэрэгтэй холбоотой байсан гэх бүх яриаг үгүйсгэхэд тусална гэжээ.
Ням гарагт /2025.11.16/ Трамп өөрийн сошиал хуудас дээрээ бичихдээ “Төлөөлөгчдийн танхим дахь Бүгд найрамдах намын гишүүд Эпштейний баримт бичгүүдийг дэлгэхийн төлөө саналаа өгөх хэрэгтэй. Учир нь бидэнд нуух зүйл байхгүй” гэжээ. Тус баримт бичигт АНУ болон дэлхийн улс төрийн элитүүдийн нэр байгаа гэж хүмүүс боддог.
Өнгөрсөн амралтын өдрүүдээс өмнөхөн Трамп болон түүний захиргааны ажилчид Эпштейний баримт бичгээс нэмж дэлгэхийн эсрэг байсаар ирсэн. Өмнө нь АНУ-ын албан тушаалтнууд хэд хэдэн баримт бичиг дэлгэж байсан билээ. Гэвч баримтуудыг бүхэлд нь олон нийтэд ил болгохоос зайлсхийсээр байсан юм.
Эх сурвалж: Reuters
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.