П.Сүхбат агсны зээ хүү Crum Kelby: Өвөөгийн өвөр дээр тоглодог байсан үе одоо ч сэтгэлд тод хэвээр

Саяхан болсон оюутны лигийн бүх оддын тоглолтын цагариган дээрээс довтлох тэмцээнд түрүүлсэн "Мон-Алтиус ДС Лионс" багийн тоглогч, Crum Kelby-тэй ярилцлаа. Тэрбээр Улсын гарди П.Сүхбат агсны зээ хүү бөгөөд дөрвөн настайдаа монголд ирж өвөө, эмээгийн гар дээр өсөж өндийжээ. Түүнтэй ярилцсан ярилцлагаа хүргэж байна.

Видео:

-Монголдоо тоглож дотоодынхоо сагсыг хөгжүүлэхийг хүсдэг-

-Таныг АНУ-д төрсөн гэж сонссон. Анх хэзээ, хэдэн настайдаа Монголд ирсэн бэ?

-АНУ-ын Дэнвер хотод төрөөд Лос Анджелес хотод өсөөд, дөрвөн настайдаа Монголд ирсэн. Одоог хүртэл амьдарч байна. Тухайн үед дөнгөж хэлд орж байхдаа ирсэн учраас Монголоор ярьж хэлд орсон. Одоо бол англи, монголоор дажгүй ярьдаг.

-Энэ жил анхны улирлаа оюутны лигт тоглож байгаа. Яагаад Мон-Алтиус сургуулийг сонгож сурах болов. Ямар мэргэжлээр сурч байгаа вэ?

-Ерөнхий боловсролын "Монгени" сургуулийг төгссөн. Одоо Мон-Алтиус сургуульд биеийн тамирын багшийн ангид элсэж анхны жилээ суралцаж байгаа. Сургуулиас сагсан бөмбөгийн шигшээд тоглох санал нь тавьсан нь таалагдаад орсон. Хичээлдээ суугаад давхар сагсны бэлтгэлээ хийгээд явж байна.

-Саяхан болсон оюутны лигийн бүх оддын тоглолтын "Slam Dumk" буюу цагариган дээрээс довтлох тэмцээнд түрүүлсэн. Тохолтуудаа хэдий хугацаанд бэлдэж орсон бэ?

-Бүх оддын тоглолт болохоос дөрвөн хоногийн өмнө манай найз тохолтын тэмцээнд орооч гэж хэлсэн. Дөрвөн хоногт бэлдээд орсон. Богино хугацаанд бэлдсэн учраас өөртөө итгэлгүй байсан. Гэтэл тэмцээний үеэр хийх ёстой зүйлээ хийж чадсан. Улмаар аварга болсондоо баяртай байгаа.

-Хоёр дах тохолт үзэгчдийг гайхшируулсан шүү дээ. Тохолтуудынхаа санааг хэрхэн олсон бэ. Нуруу намхан ч гэсэн тэсрэлт үнэхээр сайн санагдсан, анх хэдэн настайгаасаа тохож эхлэв?

-Тэмцээний үеэр хийсэн тохолтуудыг өмнө хийдэг байсан. Ер нь миний үндсэн тохолтууд гэх юм уу. Бэлтгэлийн дараа байнга хийдэг л дээ. Хүний дээгүүр давж тохох их дуртай. Анх 13 настайдаа сагсны шийдийн цагариг нь дээр л хүрдэг байсан. Дараа жилээс нь арай гэж тохдог болсон. Тухайн үед тохож сурах гэж нэлээд олон удаа буруу гишгэж гэмтэж шантарч байсан үе цөөнгүй. Өдөр тутамдаа бэлтгэлээ хийж бага багаар сайжирсан.

-Оюутны лигийн плей-оффын тоглолтууд өнөөдрөөс эхэлсэн. Танай багийн хувьд бүсийнхээ хоёрдугаар байраар улирлын тоглолтоо өндөрлүүлсэн сайн амжилт үзүүлсэн шүү дээ?

-Манай баг энэ улирал дажгүй амжилт үзүүлсэн. Миний хувьд улирлын гурван тоглолтод л оролцсон байх. Нэг тоглолтод 12-13 оноо дундчилсан. Плей-оффын тоглолтуудад хүчтэй, чанга өрсөлдөөн үзүүлэхийн тулд багаараа хичээж байгаа. Анхны улирал гэхэд манай багийнхан их найрсаг, халуун дотноор хүлээж авсан. Баг биш оюутны лигийн тоглолтуудад дасах гэж багагүй хугацаа зарцуулсан. Одоо бол учраа олсон бэлтгэлээ сайн хийж хүчтэй өрсөлдөөн үзүүлнэ гэж бодож байна.

-Хувь тоглогчийн тань тухайд асуухад энэ улиралд ямар амжилт үзүүлэхээр зорьж байгаа вэ?

-Нуулгүй хэлэхэд аварга авах зорилготой. Анхны улирал учраас өөрийгөө юу хийж чаддагаа харуулахыг зорьж байна. Аль болох багийнхандаа тусалж, сургуульдаа аваргын цом авчрахыг зорьж байгаа.

-Таны хэтийн зорилго юу байна. Цаашдаа гадаадад тоглох уу, дотоодынхоо дээд лигт тоглох бодолтой байгаа юу?

-Дээд лигт тоглох гэж яарахгүй байгаа. Дээд лигийн ганц нэг багаас санал ирсэн, багуудын бэлтгэлд хамрагдаж хамт бэлтгэл хийсэн. Гэхдээ ах нарын зөвлөгөөгөөр доороос нь эхлэх нь зөв юм байна гэж бодсон. Эхний ээлжид "М" лиг буюу хөгжлийн лигийг сонирхож байгаа. Хэрэв гаднаас сургуулиудын санал ирвэл явж магадгүй. Гэхдээ монголдоо тоглож дотоодынхоо сагсыг хөгжүүлэхийг хүсдэг. Тэгэхийн тулд би өөрийгөө хангалттай харуулах ёстой.

-Өвөө бид хоёр богино хугацаанд олон дурсамж бүтээсэн-

-Хүмүүс таныг Улсын гарди П.Сүхбат агсны зээ хүү гэдгээр тань таньж мэддэг байх. Өвөөтэйгөө хамт бүтээсэн дурсамжийн тухай эргэн санавал. Гэр бүлийнхээ тухай?

-Үлгэр жишээ авч, урагш харах болгон минь өвөөтэй холбоотой. Урам зориг авдаг баатар, бурхан мэт хүн. Өвөө үргэлж надтай хамт байдаг, миний цээжинд "хадаатай" оршиж байгаа гэж би боддог. Монголд ирээд эмээ, өвөө хоёрын гар дээр өсөж өндийсөн хүүхэд. Эмээ миний хичээлийг давтуулдаг, өвөөтэй тоглож өдрийг өнгөрөөдөг байлаа. Асар богино хугацаанд олон дурсамжийг өвөөтэй бүтээсэн. Өвөөгийнхөө өвөр дээр тоглож байх үе одоо хүртэл сэтгэлд тод байдаг. Гэр бүлийн тухайд гэвэл манай ээж хоёр дүүтэй хамт Америкт ажиллаж амьдардаг. Би энд эмээ, нагац ахынхаа гэр бүлтэй хамт амьдарч байгаа.

-Таны өвөө улсын гарди цолтой бөх, эмээ тань ОУХМ, гар бөмбөгийн спортын тамирчин хүн байдаг спортын гэр бүл. Энэ нь таныг сагсан бөмбөг тоглоход нөлөөлсөн болов уу?

-Мэдээж тодорхой хэмжээнд нөлөөлсөн. Гэхдээ сагсан бөмбөгийг өөрөө дурлаж сонгосон. Анх манай гэр бүлийнхэн намайг барилдуулах гээд жүдо бөхөөр хичээллүүлсэн. Хоёр жил орчим жүдо бөхийн бэлтгэл хийж нэг тэмцээнээс алтан медаль аваад бөхийн спортоо өндөрлүүлсэн. Яалд ч үгүй сагсан бөмбөгт дуртай хайртай байсан учраас сагсаа тоглож байна даа.

-Танай хамаатан, саданууд дунд үндэсний бөхөөр хичээллэж байгаа хүн бий юу?

-Манайхан ер нь спортын гэр бүл. Нэг үеэл маань хөл бөмбөг тоглодог мөн сагс тоглож байгаа. Яг үндэсний бөхөөр хичээллэж байгаа хүн одоогоор байхгүй байна.

-П.Сүхбат агсан Баянхонгор аймгийн хүн. Өвөөгийнхөө нутгаар очдог уу?

-Жилдээ заавал нэг удаа зорьж очин хөшөөг нь эргэдэг. Тэмдэглэлт ой болон, наадмаар манай гэр бүлд урилга ирдэг. Биднийг очиход нутгийн иргэд үргэлж халуун дотноор хүлээж авдаг.

-П.Сүхбат агсны арслан цолыг нөхөн олгох тухай яригддаг. Танай гэр бүлийнхний хувьд энэ талаар ямар бодолтой байдаг бол?

-Нарийн ширийн асуудлыг нь сайн мэдэхгүй байна. Гэхдээ ерөнхийдөө эмээ, ээжээс сонссон л доо. Хамгийн муухай нь амьд байхад нь огт яриагүй мөртлөө байхгүй болсон хойно нь яриад байгаа. Тиймээс манай гэр бүлийнхэн сэтгэл дундуур байдаг учраас тэр талаар төдийлөн яриад байхыг хүсдэггүй. Бөхөөр барилдахгүй ч гэсэн өөр спортоор амжилт гаргаж өвөөгийнхөө нэрийг гаргана гэж боддог.

-Бөхийн хүрээнийхэн П.Сүхбат агсныг гэнэн итгэмтгий, цагаан цайлган, хүүхэд шиг зантай, хөгжилтэй нэгэн байсан гэж дурсан ярьдаг. Тэр зан чанаруудыг та дуурайсан байх?

-Би ер нь өөрийгөө адилхан гэж боддог. Манай найзууд намайг хөгжилтэй, гэнэн гэдэг. Гэхдээ манай нагац ахын дотоод хүн яг өвөө байдаг. Дуу хоолой, зан ааш, царай төрх нь ялгахын араггүй адилхан. Заримдаа өвөөтэй байгаа мэт санагддаг.

-Манай найзын эмээ нь намайг "борко, божин бор" гэж дууддаг-

-Монгол улсынхаа юугаар нь бахархдаг вэ?

-Манай монголын бүх зүйл нь таалагддаг хоол нь ч хүртэл амттай. Соёл иргэншил, түүх бол гайхалтай. Монгол хүмүүс эелдэг, халуун дотно санагддаг учраас энд байх илүү дуртай.

-Ээж дүү нь АНУ-д амьдардаг гэсэн. Цаашдаа хаана амьдрах бодолтой байгаа вэ?

-Сагсан бөмбөг хаана байна би тэнд байх болно. Гэхдээ аль болох монголдоо амжилт гаргаад ээжийгээ энд авчирч хамтдаа амьдрахыг хүсэж байгаа.

-Таны нэрийг хэн өгсөн бэ, ямар утгатай нэр вэ. Монгол нэр эсвэл гэр бүл найзуудын тань дууддаг нэр бий юу?

-Миний нэрийг аав өгсөн гэдэг. Утгыг нь сайн мэдэхгүй байна. Сайн төлөвшилтэй, сайн хүн болоорой гэж өгсөн гэж эмээ хэлсэн. Монгол нэр байхгүй, багын найзын маань эмээ нь намайг "борко, божин бор" гэж дууддаг.

-Дуудах нэрийг тань аав нь өгч байж. Аавынхаа тухай яривал?

-Манай аав цэргийн хүн байсан. Намайг дөрвөн настай байхад бурхан болсон. Аавтай холбоотой дурсамж бага, сайн мэдэхгүй ч гэсэн хийж бүтээсэн үйл хэрэг, хөдөлмөрийг нь мэднэ.

Сэтгэгдлээ илэрхийл

Share Tweet