Боловсролын үнэлгээний төв сурагчдыг нууц амрагийн тухай эх дээр ажиллуулжээ

Монгол Улсын дээд боловсролын сургалтын байгууллагад элсэн суралцагчдын эх хэлний боловсролын чанар, хэрэглээ, иргэдийн харилцааны соёл, эх хэлний дархлааны түвшин тогтоох зорилгоор элсэлтийн ерөнхий шалгалтад оролцох сурагчид Монгол хэл бичгийн шалгалт өгдөг. Хэрэвзээ тус шалгалтад тэнцээгүй буюу 400 дээш оноо аваагүй шалгуулагч элсэлтийн ерөнхий шалгалт өгөх боломжгүй. Гэхдээ хэл бичгийн шалгалтыг хэдэн ч удаа өгөх боломжтой бөгөөд тэнцсэн буюу 400 дээш оноо авсан тохиолдолд ЭЕШ өгөх эрхтэй болдог.

Хэл бичгийн шалгалтыг Боловсролын үнэлгээний төвөөс зохион байгуулдаг бөгөөд энэ сарын 9, 10-нд боллоо. Тэгвэл тухайн шалгалттай холбоотой асуудлууд цахим сүлжээгээр хөврөв. Жилийн бүрийн ЭЕШ болон хэл бичгийн шалгалт араасаа ямар нэгэн асуудал чирдэг жишиг тогтох нь. Энэ жилийн тухайд 12-р ангийн шалгалтын "А" болон "B" вариантад ижил эх зохиол орж ирсэн нь Төрийн шагналт зохиолч Ц.Доржготовын "Нохой гэрт хүн урдаггүй" өгүүллэг байв. Тус өгүүллэг нь сурагчдын нас, сэтгэхүйд огт тохирохгүй болохыг багш нар, эцэг эхийн төлөөллүүд шүүмжлэв.

Энэ талаар салбарын сайд Л.Энх-Амгалан "тус өгүүллэгийг бүтнээр нь оруулаагүй, зөвхөн уран яруу хэллэгтэй хэсгийг нь сонгон авсан. Арай ч нөгөө айхтар хэсэг рүү нь ороогүй юм байна" хэмээн цахим хуудаснаа мэдэгдсэн. Тэгвэл шалгалтад орсон тус эх "Өдөржин хамт архидсан нөхдөөсөө Түгжав гэнэт салж, тууврын мал тууж одсон Донойнх өөд яралзуулахад, ухаа зээрд морь нь оройн наранд гал адил цоролзож байна" хэмээн эхэлнэ. Цаашилбал "Донойн гэргий Хандмаа гэрээсээ гарч нохойгоо хорихоор гүйх замдаа үс гэзэг, дээл хувцсаа янзалж явна. Тэрбээр нохой руугаа гүйж очоод "Хол яв! Байтлаа гэрт хүн буулгахгүй нь уу" гэж зандрахад хар нохой арга буюу нохойн ёсоор эзнийхээ өмнө газар хэвтээд хүлцэнгүйгээр гийнан мөлхөх авч үзэн ядсан уур нь багтаж ядан хахаж цацна. Түгжавыг уяанаас морио уяад гэр өөд явахад хар нохой хүзүүвчнээсээ зуурсан Хандмааг чирч хоолой хяхтнуулан зүтгэхэд эзний хормой ярагдаж хоёр урт цагаан гуя гялалзан урагш хөвчлөн жийгээд нойтон газар онгилон улдав" хэмээн үйл явдал үргэлжилнэ.

Угтаа тус өгүүллэгт гэрийн эзэн Донойг эзгүй хойгуур Түгжав нууц амраг болох Хандмаа дээрээ очиж буй тухай өгүүлэх аж. Үүнийг сурагчид уншиж 10 асуултад хариулах бөгөөд тус бүр хоёр оноотой юм байна. Нийт 50 оноотой тус шалгалтын 20 оноог өгөгдсөн эхийг уншиж асуултад хариулж авах даалгавартай. Энэ талаар шалгалт өгсөн сурагчаас тодруулахад "Чамд ширүүлэхгүй бол өөр хэнд ширүүлэх вэ гээд зургар хар нүдээ маяглуулав" хэсгээр дүрийн сэтгэлийн ямар өнгө аяс илэрч байна вэ" гэсэн асуулт байсан. Мөн "Түгжав дүрийн мөн чанарыг хамгийн сайн тодотгож өгсөн хэсгийг сонго" гэсэн асуултууд ирсэн. Эхийг уншиж гүйцэтгэх даалгаврууд нийт 20 оноотой. Энэ шалгалтын бараг 50 хувь атал эх зохиол нь ойлгомжгүй, сонин агуулгатай байсан" гэлээ.

Нийт 50 оноотой шалгалтын 20 оноог авах боломжтой даалгаврын эх сурагчдын насанд тохироогүй нь багш, эцэг эхчүүдийн шүүмжлэлийг хүртээд байна. Ц.Доржготовын өөр олон сайн зохиол байхад БҮТ мэдрэмжгүй хандаж тохиромжгүй өгүүллэг сонгожээ. Жил бүрийн хэл бичгийн шалгалт болон ЭЕШ хэл ам дагуулдаг нь тус газар ажлаа муу хийж буйтай холбоотой. Шалгалтын эхээс гадна сурагчдын суудлын хуваарь цөөн хоногийн өмнө өөрчлөгдсөн нь асуудал үүсгэсэн байна. Улмаар хүүхдүүд шалгалтаасаа хоцрох эрсдэл гарсан тухай эцэг эхчүүд илэрхийлжээ. Мөн хүүхдүүд ирээдүйн мэргэжлээ сонгох чухал шалгалтууд үргэлж асуудал гардгийг багш, сурагчид шүүмжилж буй юм.

Б.АЗЖАРГАЛ

Өөрийн сэтгэгдлээ илэрхийл

Share Tweet