“МАК эсвэл У.Хүрэлсүх”

УИХ-ын гишүүн Н.Номтойбаярыг бүрэн эрхээс нь түдгэлзүүлэн шалгах прокурорын хүсэлтийг хүлээн авах эсэхийг өнөөдөр чуулганаар эцэслэн шийдвэрлэнэ.  Хуулиараа 48 цагт багтаан шийдвэрлэгдэх ёстой асуудал парламент дээр 14 хоног гацаж, Монголын хууль Н.Номтойбаяр гишүүнд үйлчилдэггүйг бид харав.

Асуудлын дэсийг эргэн сануулбал, УИХ-ын  гишүүний халдашгүй байдлын дэд хороо Н.Номтойбаяр гишүүнийг түдгэлзүүлэн шалгах нь зүйтэй гэж үзсэн. Харин УИХ-ын Хууль зүй, Төрийн байгуулалтын байнгын хороо  түдгэлзүүлэн шалгах шаардлагагүй гэж үзсэн. Тэгэхээр чуулганаар “Н.Номтойбаярыг түдгэлзүүлэн шалгах шаардлагагүй” гэсэн байнгын хорооны саналын томьёоллыг дэмжих эсэхээр санал хураалт явуулах юм.

Прокуророос хүсэлтээ нууцын горимоор УИХ-д хүргүүлсэн учраас  хаалттай дэгээр чуулган хуралдах учиртай. Гэхдээ УИХ-ын дэгийн тухай хуулиар нээлттэй горимоор чуулганыг хуралдуулах санал гишүүд гаргаж, дэмжих эсэхээр санал хурааж шийдэх нэг гарц бий. Н.Номтойбаяр гишүүн чуулганы хуралдааныг ил явуулах  ёстой  гэж үзэж буйгаа илэрхийлсэн.

Гэвч энэ нь Н.Номтойбаярт хамгийн ашиггүй хувилбар. Үүнийг эртнээс мэдэрсэн тул зориудын тактик ашиглаж, энэ сэдвийг хөндөж байгаа гэж хардаж болохоор. Илээр санал хураалт явуулах, нээлттэй  хуралдах нөхцөл байдал үүсвэл хөшигний ард тохироо хийх боломжид шууд хязгаар үүснэ. МАН-ын дарга У.Хүрэлсүх далд байдлаар Н.Номтойбаярыг хамгаалсан гишүүдийн мандаттай ярина гэдгээ анхааруулчихсан.

Дээрээс нь өчигдөр Н.Номтойбаяр гишүүнийг МАН-ын гишүүнчлэлээс хасчихлаа. Энэ нь намын харьяалалгүй гишүүний төлөө санал өгч, удирдлагын байр сууриас зөрлөө гэсэн үндэслэлээр сүүлд нь дэмжигчдийг “торгох” сайхан боломж юм.  Чуулганаас өмнө бүлэг хуралдаж, саналаа нэгтгэх үү, задгай саналтай ороод, хоёр талдаа гарцгаах уу гэдэг нь одоогоор тодорхойгүй байна.

Маш тодорхой байгаа зүйлүүд нь, МАН-ын хуваагдал одоо илүү хурцаар дахин яригдахаар болов.  Зуд болоход нохой зоолдог жишгээр МАН-ын түнжингүй байдлыг ашиглан, АН, ШИНЭ намынхан кнопоо зарч эхэлчихээд байна. Энэ сөргөлдөөнд МАК-ийн мөнгө ялах уу, У.Хүрэлсүхийн “дэглэм” ялах уу гэдгийг хүлээх л үлдлээ.

Энэ мэдээнд өгөх таны үнэлгээ

Хуваалцаарай Жиргээрэй