“Эрт зарлавал зугтчихна”: Гэмт хэрэгтэн гэнэдүүлэн барих гэж байгаа биш дээ, Засаг дарга аа

Өнөөдрийн /2021.03.17/ 06.00 цагаас эхлэн Баянзүрх дүүргийн 26-р хороонд хязгаарлалт тогтоож буй. Тус хороо хамгийн их оршин суугчидтайгаас гадна халдварын тохиолдлууд ойр давтамжтай илэрсээр байгаа. Ийм ч учраас мэргэжлийн байгууллагынхан тус хороонд хатуу хөл хорио тогтоох чиглэл өгсний дагуу дүүргийн ЗДТГ-аас ингэж зохицуулжээ.

Гэвч иргэд нь өнөө өглөө сэрээд л хөл хорионд орсноо мэдэж, бухимдацгаасан гэх. 26-р хорооноос гадагш иргэдийг гаргахгүйгээр гэрт нь байлгаж, бүх оршин суугчдыг PCR шинжилгээнд хамруулах тул тэдний төлөвлөсөн ажил мухардаж байгаа юм.

Түүнчлэн тус 26-р хорооны засаг даргад сар гаруйн хугацааны турш ажлаа өг гэсэн дарамт ирж байсан, эцэст нь ажлаас чөлөөлөгдөх хүсэлтээ хэд хоногийн өмнө өгсөн гэх. Тийн шинэ хорооны засаг даргатай болоод удаагүй байхад нь ингэж хатуу хязгаарлалт тогтжээ. Иргэд, оршин суугчдын зүгээс үүнд бухимдаж буйгаа илэрхийлж байна. Тэд хуучин засаг дарга Г.Отгонбаатарыг авч үлдэх агуулгаар гарын үсэг цуглуулсан юм байна.

Баянзүрх дүүргийн Засаг дарга Н.Баярмөнх өнөө өглөө хязгаарлалт  тогтоож буй  тухай мэдээлэл хийсэн. Ингэхдээ “Иргэд хөл хорио тогтооно гэхээр зуслан руугаа гэхчлэн гараад, гараад явчихдаг. Ингэхээр тандалт, судалгааны ажил үр дүнгүй болно. Эрт зарлахаар ингэдэг. Тийм ч учраас тулгаж мэдээлсэн” гэж ярьжээ.

Мөн асуулт асуусан сэтгүүлчдэд “Юу гэсэн үг юм, энэ ажлын үр дүн гарна” гэх мэтээр уцаарлангуй хандаж байв. Хэдий иргэдийн эрүүл, аюулгүй байдлыг хамгаалах гэж буй ч гэлээ ардчилсан тогтолцоот нийгмийн удирдах албан тушаал хашиж байгаа гэдгээ ухамсарладаг юм болов уу гэдэгт нь эргэлзмээр. Гэмт хэрэгтэн гэнэдүүлэн барих гэж байгаа юм шиг “Эрт хэлэхээр зугтчихна, тийм болохоор тулгаж зарласан” гэж мэдэгдсэн нь асар хариуцлагагүй үйлдэл биш үү.

Г.САНСАРМАА

Энэ мэдээнд өгөх таны үнэлгээ

Хуваалцаарай Жиргээрэй