У.ХҮРЭЛСҮХИЙН ОРОНД ГОРИЛОГЧИД: Л.Оюун-Эрдэнэ “Ногоон гэрлээр”, бусад нь хүслээ хазаарлахаас өөр замгүй

МАН-ын их хурал зургадугаар сарын 24-нд болно. Маргааш нь энэ намын одоогийн дарга У.Хүрэлсүх Монгол Улсын Ерөнхийлөгчийн тангараг өргөнө. Ингэж тэр намын дарга ч, УИХ-ын гишүүн ч байхаа болино.

Хэнтийн тойрог дахь УИХ-ын гишүүний суудалд холбогдох асуудлыг өчигдөр бичсэн. Харин өнөөдөр МАН-ын даргын суудал нь хэнд очих вэ гэдэг агуулга руу өнгийж үзье.

Л.ОЮУН-ЭРДЭНЭ АСУУДАЛГҮЙ НАМЫН ДАРГАА АВНА

МАН-ын тогтсон соёлд Засгийн тэргүүн нь намын даргаа адилхан авдаг жишиг бий. Энэ утгаар Ерөнхий сайд Л.Оюун-Эрдэнэ МАН-ын дарга болох ёстой ч У.Хүрэлсүхийг тангараг өргөх хүртэл үйл явц хүлээгдлээ. Үнэндээ МАН дотор дарга болох хүсэлтэй “хөгшин, залуу” хүмүүс бий. Тийм ч учраас тэдний нөлөөлөх оролдлогууд энэ хугацаанд хийгдсэн биз.

Мөн Ерөнхийлөгчийн сонгуулийн дүн яаж гарахыг нэг талдаа хүлээцгээсэн. Харин У.Хүрэлсүх сонгогдсоноор хүч, эрх мэдэл байгаа бүлэглэлээ дагаж, Л.Оюун-Эрдэнэ ингэж хүлээн зөвшөөрөгдөв. Дотоод эх сурвалжууд зургадугаар сарын 24-нд МАН их хурлаа маш жентельмэн хийж, Л.Оюун-Эрдэнийг даргаа болгоод, маргааш нь экс даргаа Ерөнхийлөгчийн тангараг өргүүлэх талаар ярьж байна.

Д.АМАРБАЯСГАЛАН ЯРИГДСАН Ч ТЭР Л.ОЮУН-ЭРДЭНЭТЭЙ ТОХИРООНД ХҮРЧЭЭ

Их удаан МАН-ын Ерөнхий нарийн бичгийн даргын ажлыг хийж, тэндээс сайд ч бай, УИХ-ын гишүүн ч бай зад загнан байранд нь тавьдаг, сайн стратегич Д.Амарбаясгалан мөн намын даргад хэлэлцэгдсэн. Гэхдээ тэр Л.Оюун-Эрдэнэтэй нэгэн тохироонд хүрч, ийш зүтгэхээс татгалзсан байна.

Потенциалаараа нэгэнт хүлээн зөвшөөрөгдсөн Д.Амарбаясгалан одоо генсекийн суудалд, тэр далд оршихоо больж, улс төрийн томоохон албан тушаалууд хашиж эхлэх цаг нь ч болсон, өөрөө ч хүсэж буй. Харин 2024 он хүртэл сонгуульт албан тушаал байхгүй тул тэр Л.Оюун-Эрдэнэд намын даргаа өгөөд, өөрөө сайд болох тохироо хийсэн болов уу гэж харж байна.

Уг нь энэ үйл явц хуучин цагт эсрэгээрээ яригддаг байсан. Юу гэвэл, Д.Амарбаясгалан намын дарга, Ерөнхий сайдаа авч, намар хоёр яам шинээр байгуулахдаа нэгийг нь Л.Оюун-Эрдэнэд өгнө гэх утгаар. Гэвч одоо энэ хоёр хүний байр солигдсон болов уу гэхээр уншигдаж байна. Намар Эдийн засгийн хөгжлийн яам, Инновац-цахим хөгжлийн яам гэсэн хоёр яам байгуулагдана.

Гэвч Д.Амарбаясгалан ингэж Л.Оюун-Эрдэнийн цэрэг болох эсэх нь эргэлзээтэй. Гэхдээ удахгүй энэ Засаг задрах асуудал яригдаж байгааг ч мартаж болохгүй.

БУСАД НЬ: СҮ.БАТБОЛД, Г.ЗАНДАНШАТАР БАС Т.АЮУРСАЙХАН...

Харин намын даргад зүтгэж үзэх оролдлогыг урт хугацаандаа хийж, бодож боловсруулж яваа бусад хэдэн хүний тухай бичихэд ийм байна.

СҮ.БАТБОЛД: Тэр болон түүний фракц намаа авах оролдлогыг идэвхийлэн хийнэ, Л.Оюун-Эрдэнийг шахна гэдэг яриа нэг бус удаа сонсогдож байсан. Гэхдээ дотоод эх сурвалжууд түүнийг хүч, нөлөө багатай суугаа хэмээж буй. Уг нь тэр намын даргад удаан тэмүүлж, үүрүүд дээр их хэмжээний мөнгө гаргах  хэлбэрээр бэлтгэлээ базаасан нэгэн гэгддэг. Гэхдээ МАН-ын эмзэг цэгүүдийн нэг нь тэр болчхоод буй. Тийм ч учраас Сү-г удирдах аппарат руу аль болох ойртуулахгүй байх чиглэлийг У.Хүрэлсүхийн бүлэглэл баримталж байна.

Г.ЗАНДАНШАТАР: УИХ-ын дарга намын даргад заалнаас нэр дэвшинэ гэж хэд хэдэн уулзалт хийсэн гэгдсэн. Гэхдээ энэ нь парламентын спикерийн суудлаа хамгаалж үлдэх гэсэн оролдлого уу, үнэхээр хувь улс төрчийн хүсэл зориг уу. У.Хүрэлсүх Д.Тогтохсүрэнг болгоно гэж дуугарсан ч Ерөнхийлөгч Х.Баттулга зүтгэсээр түүнийг УИХ-ын даргаар тавиулж байв. Одоо энэ хүн Ерөнхийлөгчөөс буусны нь дараа Г.Занданшатарын спикерийн суудалд горилогсод цөөнгүй гарч ирнэ. Ийм ч учраас “За, намын даргаа больё, УИХ-ын даргаараа үлдье” гэсэн хамгаалалт хийсэн байж болох. Үнэндээ тэр маш сайн стратегич гэгддэг билээ.

Т.АЮУРСАЙХАН: Ил түвшинд төдийлөн яригдаагүй ч Т.Аюурсайханы цээжинд ийм хэмжээний эмээлтэй, хазаартай морь багтаж яваа гэх мэдээлэл бий. Түүний УИХ-ын дарга болох, “Эрдэнэс Таван толгой” ХК дахь нөлөөллөө сайтар хадгалж үлдэх зэрэг амбицууд нь ил уншигдсаар ирсэн. Харин намын даргад ч үзэхээр бэлдэж, мөнгө цаас, бэл бэнчингийн бэлтгэлээ базаасан гэх яриа байх юм.

Ямартай ч энэ удаад Л.Оюун-Эрдэнэ “Ногоон гэрлээр” МАН-ын дарга болж, бусад горилогчид хүслээ хазаарлах хэрэгтэй болжээ. Гэхдээ Ерөнхийлөгчийн сонгуулийн дараа Засгийн газар угаас задрах хүлээлттэй. Н.Энхбаярын талын дөрвөн сайд орж ирнэ, тэр бүү хэл Л.Оюун-Эрдэнэ ч унана гэх яриа бий. Гэхдээ унасан ч У.Хүрэлсүхийн бүлэглэлийн хүн Ерөнхий сайдад гарч ирэх нь тодорхой. Гэвч дотор нь Сү-гийн фракц, Н.Энхбаярыг бараадах хууччуул гээд тусдаа баганууд боссоор байна. Өөрөөр хэлбэл, төдий удалгүй МАН-ын дотоод улс төр улам ээдрээтэй өрнөхийг ч үгүйсгэхгүй юм.

Энэ мэдээнд өгөх таны үнэлгээ

Хуваалцаарай Жиргээрэй