Дэлхийн Эрүүл Мэндийн Байгууллага /ДЭМБ/-ын тэргүүн Тедрос Адханом Гебрейесус хэлэхдээ, 2022 он нь коронавируст цар тахлын сүүлчийн жил байх боломжтой, гэсэн ч дэлхийн улс орнууд вакцины нийлүүлэлт шударга бус, тэгш бус байгааг зогсоож чадвал дуусах боломжтой гэв.
Гебрейесус шинэ жилийн мэндчилгээндээ “Омикрон” хувилбарт халдвар гарах болсон шалтгааныг “Зарим улс орнууд хэт явцуу үндсэрхэг үзэл, вакциныг хэт ихээр нөөцөлсөн”-тэй холбон тайлбарлав.
Сүүлийн үед ард иргэддээ гурав дахь нэмэлт вакцин буюу бүүстер тунг заавал хийлгэхийг санал болгож байгаа дэлхийн баян чинээлэг орнуудыг ДЭМБ удаа дараа шүүмжилсээр ирсэн. Гэсэн ч дэлхийн олон улс оронд хүн амын нэлээд хэсэг нь вакцины эхний тундаа ч хамрагдаагүй байгааг онцлов.
ДЭМБ-ын тэргүүний хэлснээр, энэ нь “Омикрон” гарах нөхцөлийг бүрдүүлсэн гэлээ. Шударга ёсны зарчим зөрчигдөх тусам энэ аймшигт вирус цаашид улам тархах эрсдэл өндөр байх болно, тиймээс бид урьдчилан сэргийлэх, таамаглах боломжгүй” гэж тодотгов.
Коронавирусийн цар тахалд нэрвэгдсэн энэ гурван жилийн хугацаанд дэлхий нийт 8.5 тэрбум гаруй тун вакциныг гаргаж, олон сая хүний амийг аврахад тусалсан гээд ковидын эсрэг олон арга хэрэгслийг боловсруулсан гэж Гебрейесус тэмдэглэв. “Одоо, бид одоо цар тахлын гурав дахь жил рүү орж байна. Энэ жил бид түүнийг дуусгах болно гэдэгт би итгэлтэй байна, гэсэн ч бид үүнийг хамтын хүчээр даван туулна. Тодруулбал, бид шударга бус явдлыг зогсоовол тахал өвчнийг эцэслэж чадна” гэв.
Өмнө нь, ДЭМБ дэлхийн бүх улс орны хүн амын 40-өөс доошгүй хувийг вакцинд хамруулах зорилт тавьж байсан ч Африкийн ихэнх орнуудад энэ зорилтод хүрч чадаагүй байна. Одоо тус байгууллага тахал өвчнийг зогсоохын тулд 2022 оны долдугаар сар гэхэд дэлхийн нийт хүн амын 70 хувийг вакцинд хамруулах шаардлагатай гэж үзэж байна.
Жонс Хопкинсийн Их Сургуулийн мэдээлснээр, дэлхий даяар 288.3 сая хүн коронавирусийн халдвар авч, 5.4 сая хүн нас бараад байна.
(Эх сурвалж: Interfax)
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.