“BOOM”: Сайн найзын үлгэрлэл, жудаг төгөлдөр начин Э.Энхбат

“Eguur.mn” сайт “Boom” буландаа Булган аймгийн Могод сумын харьяат бөх, улсын өсөх идэр, өргөн дэлгэрэх начин Эрдэнэбилэгийн Энхбат агсныг онцоллоо.

-Эрдэнэбилэгийн Энхбат 1984 оны 10 сарын 16-нд Булган аймгийн Могод суманд төрсөн.

-Бага байхад нь Б.Бат-Эрдэнэ аварга тэднийхээр буугаад морджээ. Тэр үед Э.Энхбат начны өвөө нь “Миний хүү улсын цолтой бөх болно” гэж хэлсэн гэдэг.

-Улмаар тэрбээр Б.Бат-Эрдэнэ аваргын үүсгэн байгуулсан “Аварга” дээд сургуульд элссэн.

-2005 онд Булган аймгийнхаа наадамд түрүүлж, аймгийн арслан болсон. Түүний амжилтын гараа ингэж эхэлж байлаа.

-2009 онд улсын начин цол хүртэн, өвөөгийнхөө хүслийг биелүүлсэн.

-Улсын начин цолоо 2012, 2013, 2019 онд баталсан нь давтахад бэрх амжилт.

-Улсын наадамд таван удаа дөрөв давсан.

-Төрийн наадамд дөрвөн удаа шөвгөрч, улсын начин цолдоо элбэг дүүрэн хүчтэн байлаа.

-Өсөх идэр, өргөн дэлгэрэх, улам нэмэх чимэгтэй.

-Э.Энхбатыг улсын начин цолоо ахиулаасай, дээшээ барилдаасай гэж дээлийнх нь захыг мушгисан хүн олон. Тэрбээр “Би улсын начин цолтой явсаар зодог тайлсан ч харамсахгүй. Гол нь цолдоо эзэн байх чухал” гэж байв.

-Заал, танхимын барилдаанд олон удаа түрүүлж, үзүүрлэсэн шилдэг начин.

-Хутгах, хөмрөх, хавирах, тохох, тонгорох, мордох дархан мэхтэй.

-Хариу мэхийг дадамгай хийдэг гоц чадвар, барилдааны мэдрэмжээрээ онцгойрдог байв.

-Э.Энхбат үндэсний бөхөөс гадна бөхийн цөөнгүй төрлөөр хичээллэсэн.

-Самбо, жүдо бөхийн шигшээ багийн тамирчин байв. Тив, дэлхийн олон тэмцээнд эх орноо төлөөлөн зодоглосон бөх.

-Жүдо бөхийн ОУХМ цолтой.

-Түүний дүү нь аймгийн заан Э.Энх-Амгалан.

-Э.Энхбатыг Н.Түвшинбаяргүйгээр, Н.Түвшинбаярыг Э.Энхбатгүйгээр төсөөлөхийн аргагүй. Монгол түмэн нөхөрлөлийн үнэ цэнийг тэднээс л үлгэрлэдэг байв.

-Н.Түвшинбаяр найзыгаа амжилтад хүрэхэд хамгийн их дэмжиж, түшсэн, тусласан хүн нь Э.Энхбат.

-Н.Түвшинбаяр алт, мөнгөн медаль хүртсэн 2008, 2012 оны олимпод бэлтгэл хангагчаар нь очсон.

-Найзыгаа олимпын аварга болоход нь дэвжээний хажууд уйлаад зогсож байлаа.

-Лондоны олимпод хөлөө бэртээхэд нь үүрээд гүйж байлаа.

-Хамгийн жудагтай тамирчин, төлөв даруу, эр хүн шиг эр хүн байлаа Э.Энхбат.

-2017 онд улсын наадмын тавын даваанд Н.Түвшинбаяр Э.Энхбатыг амлаж авсан. Тухайн үед “Одоо л улсын начин цолоо ахиулдаг цаг” гээд өөрөө амжилтын төлөө зүтгэж болох л байсан. Гэвч Э.Энхбат тэгээгүй. Н.Түвшинбаяр найздаа шууд элэг бүсээ тайлж өгч байв.

-Хамгийн сайн найзуудын үлгэрлэл болж явсан тэдний нөхөрлөл тэр нэгэн өдөр цэг тавигдсан.

-Н.Түвшинбаяр 2021 оны дөрөвдүгээр сард хамгийн сайн найзыгаа зодон, хүнд бэртээсэн.

-Э.Энхбат БНСУ-д эмчлүүлэхээр явсан ч ухаан ороогүй. Улмаар Монголдоо буцаж ирээд, хүнд гэмтсэнээсээ хойш найман сарын дараа өөд болсон. Тухайн үед хүмүүс “Найзгүй байх тийм ч муухай биш. Найзтай гэж андуурч явах л муухай” гэж байв.

-Н.Түвшинбаярт холбогдох шүүх хурал өчигдөр болж, түүнд 16 жил хорих ял оноолоо.

-Монголын спортын салбар тэр тусмаа жүдо, үндэсний бөх Э.Энхбат начнаар дутна. Яах аргагүй томоос том орон зайны эзэн тэр яах аргагүй мөн. Энэ сайхан Монгол орондоо эргэн төрөөрэй, Э.Энхбат начаан.