"Сургуульд хий цацсан охинд ах нь бие хамгаалах зорилгоор амьсгал боогдуулагч өгсөн"

НЭМЭЛТ: 21:00 ЦАГТ

Дархан-Уул аймгийн "Оюуны ирээдүй" цогцолбор сургуульд 12-р ангийн хоёр сурагч нулимс асгаруулагч хий цацсанаас 30 гаруй иргэн эмнэлгийн тусламж аваад байгаа.

Тэгвэл тухайн хоёр сурагчийн нэг нь эмэгтэй бөгөөд үеэл ах нь аюулгүй байдлыг нь бодож, бие хамгаалах зорилгоор тус хийг өгсөн байсан гэж мэдүүлжээ. Охин өмнө нь Улаанбаатар хотод суралцдаг байсан бөгөөд ингэхдээ халдлагад өртөж байсан байна.

ЦЕГ-аас нулимс асгаруулагч гэж мэдээлсэн ч энэ нь нэг төрлийн амьсгал боогдуулагч хий байсан байж болзошгүй байна.

НЭМЭЛТ: 14:10 ЦАГТ

ЦЕГ-аас үйл явдлын хүрээнд албан мэдээлэл өглөө.

Тус мэдээлэлд,

“Дархан-Уул аймаг, Дархан сумын … сургуулийн А байранд газ алдсан юм шиг байна" гэсэн мэдээллийг 11-р сарын 08-ны 11:05-д авч шалгалтын ажиллагааг явуулахад тус сургуулийн 12 дугаар ангийн сурагч эрэгтэй “С, эмэгтэй “Э” нар нь БНХАУ д үйлд вэрлэсэн байж болзошгүй хаяг шошготой харуул хамгаалалтын зориулалт бүхий нулимс асгаруулагч гэх цацлага их завсарлагааны үеэр нэг давхрын цайны газрын кордиорт нэг удаа цацсан байдал нь камерийн бичлэг болон эд мөрийн баримтыг хогийн саванд хаяснаа өөрсдөө зааж өгсөн байдлаар тогтоогдсон” гэж дурджээ.

НЭМЭЛТ: 13:20 ЦАГТ

ЭМЯ-наас Дархан-Уул аймгийн Оюуны ирээдүй цогцолбор сургуулийн асуудлаар "Нийт 31 хүүхэд, 6 том хүн эмнэлэгт хэвтүүлээд байна. Хоёр том хүн эрчимтэд хэвтсэн байна. Нэг нь ухаан балартсан ярьж чадахгүй байдалтай, нөгөө нь мөчид татаад байна толгой хүчтэй өвдөөд байна гэсэн байдалтай. 31 хүүхдэд эмчилгээ хийж байна. Бүх хүнд хоолой хорсох, толгой өвдөх зовиуртай байна" хэмээх тайлбар гаргалаа.

НЭМЭЛТ: 13:00 ЦАГТ

Дархан-Уул аймгийн цагдаагийн газар: Хүнд бэртсэн, хүүхэд түлэгдсэн тохиолдол гараагүй

Дархан-Уул аймаг дахь цагдаагийн газраас тодруулахад: "Дуудлага мэдээллийн дагуу ажиллаж байна. Одоогийн байдлаар хүнд бэртсэн, гэмтэж түлэгдсэн хүн байхгүй. Урьдчилсан байдлаар амьсгал боогдсон тохиолдол байсан. Ахуйн газ уу, хэрэглээний газ уу гэдгийг үргэжлүүлэн нягталж байна" хэмээх хариултыг өглөө.

-Дарханы сургуулийн захирал: Хий цацсан байж болзошгүй хоёр сурагчийг хайж байна-

Дархан-Уул аймгийн Оюуны ирээдүй цогцолбор сургуульд өнөөдөр 11 цагийн үед хүүхдүүд гаазнаас хордсон гэх дуудлага мэдээлэл бүртгэжээ.

Бид энэ талаар тус сургуулийн захирлаас тодруулахад “Хэвлэлүүдээр явж байгаа сургуулийн цайны газраас гааз алдсан гэх мэдээлэл худлаа. Манай сургууль дээр яг одоо аймгийн онцгой, цагдаа, мэргэжлийн хяналтын хамтарсан баг ажиллаж байна. Хүүхдүүдийн хэлж байгаагаар хоёр сурагч газ ч юмуу юу ч юм ямар нэг бодис цацсан гээд байгаа юм. Тухайн хоёр хүүхдийг хайж байна. Мөн манай нэг менежер хориод хүүхэд аваад эмнэлэг явсан. Нөхцөл байдал тун удахгүй тодорхой болчих байхаа” гэлээ.

Бид Дархан-Уул аймгийн БОЭТ, аймгийн ОБГ-тай холбогдож мэдээлэл авахыг хүссэн ч аль аль нь тодорхой мэдээлэл өгсөнгүй. Өөр бусад руугаа шилжүүлж, тэндээс ав, эндээс ав гэсэн байр суурьтай байна.

НЭМЭЛТ: 13:00 ЦАГТ

Харин Дархан-Уул аймгийн Засаг даргын орлогч н.Жавхлангаас тус аймгийн DBS телевиз тодруулахад "Одоогоор хэргийн газарт шүүх цагдаа, тагнуулын байгууллага ажиллаж байна. Эхний мэдээллээр ахуйн газ биш болох нь тогтоогдсон. Харин тус сургуулийн сурагч нулимс асгаруулж, амьсгал боогдуулагч бодис цацсан болох нь эхний шалгалтаар тодорхой болж байх шиг байна. Үргэлжлүүлэн цагдаагийн байгууллага ажиллаж байна. Бидний зүгээс Мэргэжлийн хяналтын байгууллагыг ажиллуулж, агаарын чанарт шинжилгээ хийлгэж, сургууль үргэлжлэн ажиллах боломжтой эсэхийг тогтоохоор ажиллана. Мэргэжилтнүүдийн ярьж буйгаар энэхүү бодис нь амь насанд нөлөөлөхүйц хор хөнөөлийг үзүүлэхгүй гэж байгаа ч эмч нар нарийн шинжилгээ, эмчилгээг шуурхай үзүүлж байна" гэжээ.

Энэ мэдээнд өгөх таны үнэлгээ

Хуваалцаарай Жиргээрэй