"Болор цом"-ын эзэн М.Амархүү: Яруу найрагч ард түмэнд хүлээн зөвшөөрөгдөнө гэдэг асар том хүндэтгэл

40 дэх удаагийн "Болор цом"-ыг зураач, яруу найрагч М.Амархүү өргөлөө. Ийнхүү Архангай нутгийн яруу найрагч 17 жилийн дараа "Болор цом" өргөлөө. Харин удаах байранд "Болор цом"-ын эзэн Д.Галсансүх, О.Цэнд-Аюуш нар эзэллээ. Тусгай байранд Болор цом"-ын эзэн Л.Моломжамц, яруу найрагч Ц.Гончиг нар шалгарав.

Бид өнөө жилийн "Болор цом"-ыг өргөсөн М.Амархүүгийн баярын сэтгэгдлийг нь хуваалцлаа.

"Болор цом"-д хамгийн анх 1993 онд оролцож байсан. 20-иод удаа оролцож байгаа байхаа. Нарийн тоолж байсангүй. Тэгш ой дээр нь түрүүлсэндээ баяртай байна. Ойн одтой хүн юмаа би. Батлан хамгаалах яамны 100 жилийн ойн наадамд түрүүлж сэлэм авч байсан. Энэ жил "Болор цом"-ынхоо 40 жилийн ойд түрүүллээ. Баяртай байна.

Би байнгын бэлтгэлтэй хүн. Өнгөрсөн 4-5 жилд хот, хөдөөгийн найман наадамд тэргүүн байр эзэлсэн. Энэ бол миний ес дэх цом. Дотроо бол итгэлтэй байдаг. Гэхдээ өнөөдөр яг түрүүлнэ гэж бодоогүй. Энэ олон сайхан яруу найрагчдынхаа тоосон дунд ороод, сайхан шүлэг уншъя л гэж бодсон. Гэхдээ өөртөө итгэлтэй байсан, шүлэгтээ шүү дээ. Ер нь бол шүлэгтээ л итгэдэг.

Монголын ард түмэн язгуур түүхнээсээ бүгд яруу найрагч. Энэ цэцэн билигтэй ард түмний дунд яруу найрагч хэмээн хүлээн зөвшөөрөгдөнө гэдэг бол асар том хүндэтгэл. Өдий болтол залгамж халаа болсон хойч үеийн дүү нартайгаа, өөрийн үеийн болон дээд үеийнхээ яруу найрагчидтай "Болор цом"-ын тоосон дунд явж байгаадаа баярлаж байна. Цаашдаа яруу найргийн тулганд бадарч байгаа гал улам дүрэлзэн асах биз ээ."

Энэ мэдээнд өгөх таны үнэлгээ

Хуваалцаарай Жиргээрэй