Х.Нямбаатар: ЭТТ ХК-ийн удирдлагууд Монголын Оюутны холбоогоор дамжуулж, жагсаал турхирсан

Нүүрсний хулгайн гэх хэргийн мөрдөн шалгах ажиллагааны явцын талаар ХЗДХ-ийн сайд Х.Нямбаатар мэдээлэл хийлээ.

“Б.Ганхуяг нарын найман хүнийг хойшлуулшгүйгээр баривчилсан”

Тэрбээр “Мөрдөн шалгах ажиллагаанд дэмжлэг үзүүлэх штаб байгуулагдаж, өчигдөр анхны хуралдаанаа хийснийг та бүхэн мэдэж буй. Үүнээс хойш ажиллагаа нэлээд эрчимжсэн.

Тухайлбал, урд шөнө ЭТТ ХК-ийн Гүйцэтгэх захирал асан Б.Ганхуяг нарын найман хүнийг хойшлуулшгүйгээр баривчилсан. Үүнд “Хишиг арвин индустриал” ХХК-ийн Ерөнхий захирал Б.Хишигдорж, түүний хамаарал бүхий хоёр хүн багтсан. Үлдсэн тав нь Б.Ганхуягийн хамаарал бүхий хүмүүс.

Б.Ганхуягийг ЭТТ ХК-ийн Гүйцэтгэх захирлаар ажиллаж байхдаа өөртөө давуу байдал үүсгэсэн байж болзошгүй нотлох баримтууд цугларсан. Өнөөдөр холбогдох мөрдөн шалгах ажиллагаа үргэлжилж байна. Б.Ганхуягийн хамаарал бүхий хүмүүсийн гэр, “Хишиг арвин индустриал”-ын салбар оффисуудад үзлэг нэгжлэг хийж байна.

“Хишиг арвин индустриал” ХХК-ийн тухайд, ЭТТ ХК-ийн удирдлагуудтай хамтарч, дундаа компани байгуулан, төсөл хөтөлбөрүүд санхүүжүүлж байсан гэх баримтууд олдсон учраас мөрдөн шалгаж буй” гэлээ.

Үүний дээр ажлын хэсгийн бүрэлдэхүүнийг өргөтгөхийн тулд аймаг бүрээс гурван мөрдөгч татахаар болсон талаар мэдээллээ. Мөн өглөө 07.30 цагийн үед ажлын хэсгийн бүрэлдэхүүн болох мөрдөгч, МХЕГ-ын шинжээчид, ХХЕГ, ГЕГ-ын ажилтнууд Өмнөговь аймгийн Цогтцэций суманд байрлан ажиллахаар болжээ. Энэ хүрээнд “Иргэд, жагсагчдын нүүрсний асуулыг ил тод зарла гэсэн шаардлагын дагуу мөрдөн шалгах ажиллагаа эрчимжиж буйг хэлэх нь зүйтэй” гэж тодотголоо.

“Монголын оюутны холбоонд байсан ЭТТ ХК-ийн удирдлагууд оюутнууд руу мөнгө шилжүүлсэн”

Түүнчлэн жагсаалыг ЭТТ ХК-ийн зүгээс турхирсан талаар мэдэгдлээ. Тэрбээр “Талбай дээр үнэхээр зүрх сэтгэлийн дуудлагаар жагсаж буй иргэд байна, хажуугаар нь захиалгатай, улс төрийн тогтворгүй байдал бий болгохоор зорьж буй, шалгуулж буй хүмүүсийн жагсаал бий гэдгийг дуулгамаар байна.

ЭТТ ХК-ийн удирдлагууд Монголын оюутны холбоонд албан тушаал хашиж байсан намтартай байдаг. Б.Ганхуяг өөрөө МОХ-ны Ерөнхийлөгч байсан. МОХ-ны  дирдах зөвлөл, ажлын албанд ажиллаж байсан хүмүүс ЭТТ ХК руу олноор орсон байдаг. Тэгвэл, ЭТТ ХК дахь тэр хүмүүс Монголын оюутны холбоо болон их дээд сургуулиудын оюутны зөвлөл рүү их хэмжээний мөнгө шилжүүлсэн баримтыг ЭЦА-наас  шалгаж байна. Өөрөөр хэлбэл жагсаалыг сарниулах, тогтворгүй байдал үүсгэх, төрийн ордон руу дайрч, хямрал үүсгэх гэсэн жагсагчид байгаа гэдгийг олонг нийт маань мэдэж, хашир хандаасай” гэлээ.

Бүртгэлийн мэдээллүүдийг тулгажээ

Мөн хилээр гарсан нүүрсний тоо хэмжээ, бүртгэлийг тулгах үүднээс дараах шалгалтуудын дүнг нягталжээ.

Нэгдүгээрх нь: 2010-2011 оны хоорондох шалгалтаар 379 мянган тонн нүүрс хилээр бүртгэлгүй гарсан нь тогтоогдсон.

Хоёрдугаарх нь: УИХ-ын гишүүн асан Л.Энхболдын мэдээллийн дагуу хийсэн, 2013-2017 оны хооронд хийсэн шалгалтаар  2527 компанийн 17200 орчим нүүрс тээврийн автомашин урагшаа хоосон нэвтэрсэн. Энэ хүрээнд 260 мянган тонн нүүрс АМНАТ төлөлгүй, бүртгэлгүй хилээр гарсан нь тогтоогдсон.  

Гуравдугаарх нь: 2022.04.27-ноос 2022.05.03-ны хооронд Гашуунсухайт боомтод хийсэн шалгалт. Үүгээр их хэмжээний нүүрс бүртгэлгүй гарсан бөгөөд Монголын, БНХАУ-ын, далайн чинадын орнуудын статистик мэдээлэлтэй ч таараагүй байна.

Үүний дээр өмнө нь хэрэгсэхгүй болгосон байсан орон нутгийн Тавантолгой, мөргөцгийн асуудал бүхий хэргүүдийг сэргээн шалгаж байгаа талаар мэдээлэв.

ХЗДХ-ийн сайд Х.Нямбаатар нүүрсний хэргийн мөрдөн шалгах ажиллагааны талаар өдөр бүрийн 11.00 цагаас мэдээлэл хийх юм байна.

Г.САНСАРМАА

Энэ мэдээнд өгөх таны үнэлгээ

Share Tweet