Хэрсүү харцгаая: Жагсаалыг ГАДНААС, ДОТООДООС ингэж турхирч, иргэдийг өдөөж байна

Бүгд хөөрцгөөж буй. Огшиж буй. Нэг сенсацаас нөгөөд тухайн өдрийнхөө оройд л шилжчихдэг. Тийм гэгэлгэн хөөстэй ард түмэн, бид. Тийм атлаа таван өдөр жагсчихлаа.

Гэхдээ л энэ жагсаалын ард яг юу болоод байна вэ? Иргэдийн органик жагсаалд ямар ямар бүлгүүд хүч нэмж, сүржнээр чимж, юуг хожихоор ажиллаж байж болох вэ?

Эл асуултуудад логик хөөмж, үйл явдлын нюанс, олон улсад мэдээлэгдсэн байдал зэргийг түшиглэн хариулт эрээд үзэцгээе. Тэгээд дор бүрнээ бас бодоцгооё. Юуны түрүүнд жагсаалыг турхирч байж болох ГАДААД, ДОТООД нөхцөл байдал юу байж болох вэ, өнөөгийн нөхцөлд.

ДОТООД НӨХЦӨЛ: Зорилтот оролцогчид, турхиран үймүүлэлт юу өгүүлэв

Жагсаал руу зорилтот зочдыг хэн хэн оруулах боломжтой вэ

Органик оролцогчид дээр дотоодоос нэмэгдэж буй зорилтот бүлгүүдийг ерөнхийд нь ингэж ангилж болохоор юм. Үүнд,

• "Нүүрсний хулгайчид" гэгдээд буй томчууд жагсаалд оролцогч нэмсэн хандлага. Тухайлбал, Өмнөговь аймгаас олноороо иргэд ирэв.

• АН-аас С.Эрдэнэ, Х.Баттулга, З.Энхболд нарын нэгдэл байж болохоор турхиралт.

• Б.Ганхуягт холбогдох МОХ-ны залуусын нэгдэл,

• МАН, Тагнуул, хүчний байгууллагынхан энгийн иргэдийн дүрээр жагсаалыг ажиглах, бутаргах тактикууд хэрэгжүүлж буй.

• МАН-ын генсекийн томилгоог хойшлуулах, тохироогоо нарийвчлах сонирхлоор жагсаалыг өдөөсөн байдал. Үүнд, МАН-аас Д.Амарбаясгалан, У.Хүрэлсүхийн талууд оролцсон байх боломжтой.

Жагсаалын органик оролцогчдыг өдөр бүр нэмэх арга хэрэгжиж байна

Ковидын нөхцөл байдал, монгол төгрөгийн сулрал зэрэг нь жирийн иргэдийн амьдралд үлэмж нөлөөлж, гурван хүн тутмын нэг нь ядууралд өртөөд байгаа тоон судалгаа гараад нэлээд удав. Эсрэг талд нь "Таван богд"-ын "Ланд-300" маркийн автомашины жилийн захиалга ердөө 14 хоногт дүүрдэг. Тийм өөр амьдралын түвшин монголчуудын дунд үүсээд байна. Тэр утгаараа бухимдсан иргэд өдрөөс өдөрт жагсаалд зорин ирсээр буй нь үнэн.

Тэднийг уриалан дуудах, хэт мэдлэггүй чигээр муйхарлан, төр засгаа хараан дайрах оролдлогуудад нөлөөлөгчид үлэмж ихээр ажиллаж буй нь жагсаалаас анзаарагдаж буй. Энэ нь эргээд төр тогтворгүй байдалд шилжих эрсдэл рүү ч хөтөлж буйг анзаарууштай.

Жагсаал энэ сарын дунд үе хүртэл үргэлжлэх төлөвтэй байгаа бөгөөд Их тэнгэрийн ам руу дайрах, иргэдийн хувийн өмчид халдах, дотоодын үймээн самуунд ухамсаргүйгээр шилжих боломжтойг холбогдох байгууллагууд сэрэмжлүүлсээр байна.

ГАДААД НӨХЦӨЛ: Бид юуг анхаарах ёстой вэ

Гаднын хэвлэлүүдийн тоймын ижил тал юу байв?

Жагсаалыг Al Jazeera, ВВС, ТАСС, News Corp болон ОХУ-ын сайтууд гэхчлэн нэлээд түгээмэл мэдээлсэн. Ялангуяа барууны хэвлэлүүд жагсаалыг нэлээд сайн анзаарч, деталь мэдээлэл бичжээ. Гэхдээ тэдний мэдээллийн ижил тал нь, "Иргэд нь шударга ёс нэхэж, авлигачдыг цээрлүүлэхийг Засгийн газраасаа шаардаж, Төрийн ордон руугаа халдаж байна" гэх нийтлэг агуулга байна.

Бүр хачирхалтай нь, талбай дээр гадагшаагаа мэдээлэл бэлтгэх "хөрс" бэлдэж, бичлэгийн үеэр англиар чөлөөтэй ярьдаг залуусыг яриулсан. ВВС агентлаг тусгай сурвалжилга бэлдсэн талаар бичигдсэн. Барууны хэвлэлүүд хүний амь эрсдэж, онц хүнд хохирол амсаагүй л бол гаднын улсуудаас аливаа жагсаалын мэдээ авахыг төдийлөн сонирхдогггүй.

Харин энэ удаа баруунд ч, хоёр хөршид ч жагсаалын мэдээлэл түгэж, Хятадууд "Монголчуудыг нүүрсний хулгайч нартайгаа тэмцвэл бид мэдээллээр хангана" гэж хэлснийг ТАСС онцолсон зэрэг нь манайдаа анхаарахуйц кэйс болж байна.

Ц.Оюунгэрэл, Ц.Элбэгдорж нарыг гаднын санхүүжилтээр турхирч байна гэх хардлага

Хүний эрх, эрх чөлөөг түгээмэл байдлаар ярьж, баруунаас ардчиллыг бэхжүүлэх чиглэл дэх төсөл, хөтөлбөрүүд, ил далд санхүүжилтийг хамгийн их авдаг хүмүүсээр дээрх хоёр эрхэм нэрлэгддэг.

Ц.Элбэгдоржийн Укрианы дайны хөлд үрэгдэж буй буриадуудад хандсан мэдэгдлийг барууныхан онцолж, энд монголын шатахууны крант хаагдах шахсан.

Манай улс ТББ-ын хуулиа хоёр хөршийн "захиалгаар" чангалахад гаднаас хөрөнгө оруулалт татдаг Ц.Оюунгэрэл нар хамгийн их бухимдсан нь нийтэд ил өрнөсөн процесс юм.

Энэ удаагийн жагсаал гаднын тусгай албадын оролцоонд өртөж, ажиглалтын талбар болоод байгааг Ерөнхий сайд ч мэдээллийнхээ үеэр онцолсон.

Тагнуулын байгууллагад ирсэн мэдээллээр, гаднын тусгай албадын гар хөл жагсаалыг дэвэргэж байж болзошгүй баримтууд ч цуглараад байгаа аж. Тэд үүнд Ц.Оюунгэрэлийг хардаж буй бөгөөд тэрбээр өдөр бүр жагсагчдыг эргэж, "Органик жагсаал" гэсэн агуулгаар шууд дамжуулалт хийж буй.

Шинжээчид жагсаал удаан үргэлжилвэл Арабын хувьсгал шиг нөхцөл байдал үүснэ гэж сэрэмжлүүлжээ

Тодорхой эрхэлсэн ажилгүй 26 настай залуу өөрөөс нь авлига нэхсэн албан тушаалтныг эсэргүүцэн, өөрийгөө шатааснаар "Арабын хавар" нэртэй олныг хамарсан эсэргүүцлийн жагсаал болсон түүхтэй. Органик эсэргүүцэгчид ядуурал, ажилгүйдэл, амьдралын түвшин ярин тэмцсэн авч эцэстээ Ливи, Сири, Ирак зэрэг орнууд руу хүрээгээ тэлж, иргэний дайны хөлд умбасан. Ард түмний эсэргүүцлээр унаж, шинээр тогтоогдсон дэглэм нь тэдний түүхийг улам муутгасан билээ.

Саяхны жишээ гэхэд, Укрианд "Ард түмэнд үйлчлэгч" нэртэй олон ангит киноны гол Ерөнхийлөгч болж, улсаа дайны хөлд үйв. Арабын хувьсгалд ч, Укрианы дайнд ч гаднын гар хөлүүд өндөр байж, тэд жинхэнэ хагалан бутаргах, улсыг улс биш болгох тоглолтод гүнзгий оролцсоор ирэв.

Манай Тагнуул, олон улсын шинжээчид ийм нөхцөл байдал үүсэж болзошгүйг хөшигний ард сануулсаар байгаа аж. Эдүгээ монголд болж буй жагсаалд оролцогч органик иргэдийг ихээр хөөрөлд автуулах, үүндээ нийгмийн сүлжээг өргөнөөр ашиглах зэрэг гаднынхны арга хэлбэрүүд өргөн ашиглаж буй анзаарууштай.

Арабын хаварт ер дотоодын ялагч байгаагүй шиг нөхцөл монголд давтагдах вий гэх айдас ингэж үүсээд байна. Яг ийм болгоомжлол бодтой үүсжээ.

Энэ мэдээнд өгөх таны үнэлгээ

Share Tweet