Мартын 8-ны хэлэлцүүлэг: Эмэгтэйчүүд давуу эрх эдлэх ёстой юу, эрчүүдийн эрх илүү зөрчигддөг үү

Өнөөдөр Мартын 8. Олон улсын эмэгтэйчүүдийн эрхийг хамгаалах өдөр. Барууны ертөнцөд анх "Эмэгтэйчүүд ч гэсэн хүн, эрчүүдийн ажил ажиллаж, хөдөлмөрлөх эрхтэй" гэсэн тэмцэл өрнөснөөс үүдэлтэй баяр.

Харин Монголд эрчүүд нь эмэгтэйчүүдээ бэлэг өгч баярлуулдаг, бүсгүйчүүд ямар нэгэн байдлаар эр хүнээс бэлэг хүлээдэг л болохоос эргээд жендерийн тэгш байдлын тухай бодолцох нь ховорджээ.

Тийм учраас Eguur агентлаг Мартын 8-ны өдөрт зориулж, "Эмэгтэйчүүд давуу эрх эдлэх ёстой юу, эсвэл эрчүүдийн эрхийг эмэгтэйчүүд зөрчсөөр байна уу" сэдэвт хэлэлцүүлэг зохион байгууллаа. Хэлэлцүүлэг таван эмэгтэй, нэг эрэгтэй зочинтой.

Хэлэлцүүлгийн зочид:

• Б.Наранцацралт
• Ж.Үйлст
• Л.Эрдэнэ
• Э.Чаминцэцэг
• Ж.Уранчимэг
• П.Ундармаа

ХЭЛЭЛЦҮҮЛГИЙГ БИЧЛЭГ:

Хэлэлцүүлэг гурван үе шаттай өрнөсөн юм. Эхний үед зөвхөн эмэгтэйчүүдээс ер Мартын 8-ны өдөр бэлэг хүлээдэг үү, баярлахыг л урьтал болгодог уу, эрхийн зөрчлөө яг тодорхойлж чаддаг уу гэх мэт асуулт асууж, чөлөөт ярилцлага өрнүүлсэн.

АСУУЛТУУД:

1. Мартын 8-наар баярлахыг л урьтал болгодог уу. Энэ өдөр нөхрөөсөө бэлэг, халамж хүлээдэг үү?
2. Та бүхэн яг эрхийн зөрчлөө тодорхойлж, танин мэдэж чаддаг юм уу?
3. Феминизм нь угтаа эрчүүдийн ч асуудлыг хөнддөг ойлголт гэдгийг мэддэг үү?

Харин хоёр дахь үед хэлэлцүүлгийн цорын ганц эрэгтэй зочин болох Б.Наранцацралт өөрийнхөө бодлыг хуваалцсан. Жендерийн тэгш байдал хэрхэн алдагдаж буй, эмэгтэйчүүд өөрсдийн хэвшмэл ойлголтоос болж эрчүүдийн эрхийг зарим үед зөрчиж буй болон ер эрчүүдийн эрхийн асуудлыг хөндөж тавих цаг болсон талаар тэр ярьсан.

Ингээд гуравдугаар шатанд хэлэлцүүлгийн бүх зочид нэг эгнээнд орон зогсож байгаад, редакцаас бэлтгэсэн томъёоллыг уншиж өгөх үед "Тийм" эсвэл "Үгүй" хэмээж буйгаараа ялгарсан юм. Тайзыг хоёр хуваасан. "Тийм" гэсэн бол нэг талд, "Үгүй" гэсэн бол нөгөө талд гарч зогсоод, тэд мэтгэлцсэн.

ТОМЪЁОЛЛУУД:

1. Эмэгтэйчүүд хүүхэд төрүүлснээрээ давуу эрх эдэлнэ, ямар ч ааш авир гаргасан бай эрчүүд түүнийг тэвчих ёстой.
2. Үнэндээ эмэгтэйчүүдийн бус эрчүүдийн асуудлыг илүү хөндөж ярих шаардлагатай.
3. Багаасаа охид хөвгүүдэд давуу байдал үзүүлж дасах нь зөв.

Хэлэлцүүлгийн үеэр оролцогч Э.Чаминцэцэг, П.Ундармаа нар эмэгтэйчүүд хүүхэд төрүүлсний дараа хэцүүхэн ааш авир гаргах нь бий, гэхдээ эмэгтэй хүн услаад байвал ургаад л байдаг цэцэг шиг, эр хүн ойлгож, тэвчих нь зөв хэмээн нэг талд гарсныг та дээрх зургаас харж байна. Гэвчиг "Эмэгтэйчүүдийн бус эрчүүдийн асуудлыг илүү хөндөж тавих хэрэгтэй" гэсэн томъёололд зөвхөн сэтгэл зүйч Ж.Үйлст "Үгүй" талд зогсон мэтгэлцсэн.

Ерөнхий дүр зургаараа алдааг өөрөөсөө эрэх, эхнэр нөхрүүд хоорондоо ярилцаж ойлголцох, хэн хэнтэйгээ хүндэтгэлгүй харилцахаас зайлсхийх, эрчүүдийн эрхийн талаар бодолцож үзэх шаардлагатай гэдэгт санал нэгдэцгээсэн юм.

ХЭЛЭЛЦҮҮЛГИЙГ 12:00 ЦАГААС EGUUR NEWS ФЭЙСБҮҮК ХУУДСААР ХҮЛЭЭН АВЧ ҮЗЭЭРЭЙ.

Энэ мэдээнд өгөх таны үнэлгээ

Хуваалцаарай Жиргээрэй