Ронин: Васяг нас барах үед "Бодь даатгал" үүргээ биелүүлээгүй

Монгол Улсын хамгийн анхны даатгуулсан гэрийн тэжээвэр амьтан бол Вася муу глг билээ. Тэрээр нас бараад хэдийн хагас жил өнгөрсөн байна. "Бодь даатгал" ХК-аас гаргасан гэрийн тэжээвэр амьтны даатгалыг Санхүүгийн зохицуулах хорооноос анх удаа бүртгэсэн. Тэгвэл Вася муу глгийг нас барах үед нь тухайн даатгалын компани үүргээ биелүүлээгүй байна. Энэ талаар түүний эзэн Ронин буюу Н.Дэлгэрцогоос тодруулсан юм.

-Вася муу глг одоогоос нэг жилийн өмнө анхны даатгалтай гэрийн тэжээвэр амьтан болсон. Түүнийг нас барах үед нь даатгалын компани нь үүргээ биелүүлээгүй гэх юм?

-Тийм ээ. "Бодь даатгал" ХК-ийн Гэрийн тэжээвэр амьтны даатгалд даатгуулсан Монголын анхны даатгагдсан тэжээвэр амьтан байсан юм. Түүнийг нас барах үед нь даатгалдаа итгээд санаа амар байсан ч даатгал нь үүргээ биелүүлээгүй. Тухайн үед би мөнгөгүй байсан болохоор олон хүн буяны ажилд нь хандив өгснөөр эмнэлгийн үйлчилгээ, унтуулга, унаа тэрэг, чандарлах гэх мэт ажлуудыг хийсэн.

-Даатгалын гэрээнд юу тусгасан байв?

-Даатгалын нөхцөл үүсээд мэдэгдсэн боловч гэрээ хийгээгүй. Учир нь гэрээг хариуцсан ажилтан ажлаа хүлээлгэн өгсөн гэх зүйлийг тухайн үед хэлсэн. Тиймээс зөвхөн тарианы мөнгө л өгөх боломжтой гэх хариу тайлбарыг надад өгсөн юм.

Гэвч энэ батламж болон үг өгүүлбэр бүр нь даатгалын зүгээс хүлээх ёстой бүхий л үүргийг тусгасан гэрээ адил хүчин төгөлдөр зүйл гэж бодож байгаа. Учир нь энэ батламжийг гардуулаад "Та санаа зоволтгүй. Бид оршуулга, эмчилгээний зардал гэх мэт категорит нь тусгаад бүх бичиг баримтыг нь асуудалгүй болгоно" гэх зүйлийг хэлж байсан.

-Батламжин дээрээ даатгалд даатгуулсан гэсэн атлаа гэрээ хийгээгүй гэх шалтгаанаар даатгалын нөхөн олговор өгөөгүй байх нь ээ?

-Тийм ээ.

-Тэжээвэр амьтнаа даатгуулсан болохоор даатгалын мөнгө төлж байв уу?

-Анхны тэжээвр амьтан гэх утгаар мөнгө төгрөг авахгүйгээр даатгалд хамруулж байна гэж компанийн зүгээс хэлсэн. "Бодь даатгал" бидэнд түрүүлж энэ саналыг тавьсан юм.

-Холбогдох газруудад нь хандаж үзэв үү?

-Үгүй ээ. Огт хандаагүй. Гэхдээ даатгалын нөхцөл үүсэхэд даатгуулагчийн арыг даах ёстой үүргээ биелүүлээсэй гэж бодож байна. Үүргээ биелүүлээгүйд бухимдалтай байгаа. Зарим шаардлагатай тохиолдолд л холбогдох газар нь хандъя гэж бодож байна. Тухайлбал, миний эсрэг үндэслэлгүй тайлбар хийсэн тохиолдолд.

-Энэ даатгалаар даатгалын мөнгө авсан хүмүүс байв уу. Та судалж үзсэн үү?

-Одоогоор байхгүй байх. Энэ нь өөрөө шинэ бүтээгдэхүүн шүү дээ. Санхүүгийн зохицуулах хороо бүтээгдэхүүнийг бүртгэж авч, Вася анхны даатгалтай амьтан болсон юм. Гэрээ байхгүй ч "Бодь даатгал" ХК-ийнхний хэлснээр, өгсөн батламжаар даатгалтай л гэсэн үг.

-Ярилцсанд баярлалаа.

Энэ мэдээнд өгөх таны үнэлгээ

Хуваалцаарай Жиргээрэй