Иргэн: Эгч минь СЭМҮТ-ийн хяналтад байдаг. БНХАУ-аас эрэн хайхад улсаас нэг ч төгрөг аваагүй

Цагдаагийн байгууллагад 2023 оны гуравдугаар сарын 5-ны өдөр иргэн “Т”-ээс “Миний дүү 51 настай Т /эм/ нь оршин суух газраасаа сураггүй алга болсон” гэх гомдол, мэдээлэл гаргаж Нийслэлийн Сонгинохайрхан дүүргийн цагдаагийн газрын нэгдүгээр хэлтсээс эрэн сурвалжлах ажиллагааг зохион байгуулсан байна.

Эрэн сурвалжлах ажиллагааны явцад иргэн “Т” нь Монгол Улсын хилээр БНХАУ-ын нутаг дэвсгэрт зорчсон нөхцөл байдал тогтоогджээ.

Улмаар Эрүүгийн цагдаагийн албанаас Дорноговь аймгийн цагдаагийн газар, БНХАУ-ын ӨМӨЗО-ны Эрээн хот хооронд 2013 онд байгуулсан "Харилцан ойлголцлын санамж бичиг", мөн Монгол Улсын ЦЕГ-ын Эрүүгийн цагдаагийн алба, БНХАУ-ын ӨМӨЗО-ны Хөх хотын Нийгмийг Аюулаас Хамгаалах Тэнхим хооронд 2017 онд "Гэмт хэрэгтэй тэмцэх чиглэлээр байгуулсан санамж бичиг"-үүдийн хүрээнд Гадаад харилцааны яамны Kонсулын газар, ЦЕГ-ын Интерполын Үндэсний Төв Товчооний Ажлын Албатай хамтран мэдээ, мэдээлэл солилцоо хамтран ажиллаж эрэн сурвалжилж байсан иргэнийг Бээжин хотоос олж тогтоон эх оронд нь авчрах ажиллагааг зохион байгуулж, ар гэрт нь хүлээлгэн өгсөн ажээ.

Тэгвэл уг хэргийн талаар 51 настай иргэн "Т"-гийн дүүгээс тодруулсан юм. Тэрбээр "Бид эгчийгээ Монголд 20 орчим хоногийн турш хайсан. Дараа нь Хил хамгалаах ерөнхий газарт цагдаагийн байгууллагаар хүсэлт гаргуулснаар БНХАУ-д байгааг мэдсэн. Эгчийгээ сураггүй болсноос хойш нийт 40 орчим хоногийн дараа олсон. Түүнийг Бээжингийн нисэх онгоцны буудлаас эсэн мэнд олсондоо баяртай байна. Эгчийгээ эрэн хайхад бид улсаас нэг ч төгрөг гаргуулаагүй. Өөрсдөө замын зардал, унаа, буудал, хоолны төлбөрөө төлсөн. Бид түүнийг хайж байх хугацаанд эгч маань гудамжинд гадаа хонож өдрийг аргацаасан юм билээ.

Тэр сэтгэцийн өвчтэй. Шизофрени өвчинтэй хэмээн оношлогдсон тул СЭМҮТ-ийн хяналтад байдаг. Одоо эмнэлэгт хэвтэж байгаа. Олон нийтийн бичсэн сөрөг сэтгэгдлүүдийг уншаад ойлгож чадна. Хүмүүс таагүй сэтгэгдэл их бичсэн байна. Тэр энэ бүгдийг уншаад сэтгэл зүйн хямралд орох вий гэж болгоомжилж байгаа. Мөн асаргаа шаардлагатайгаас гадна хүн дагалдаж явах хэрэгтэй байдгийг дурдъя. Түүнийг хилээр танихгүй хүмүүс авч гарсан тул холбогдох байгууллагууд шалгаж байгаа. Гэсэн ч хэрэгт холбогдсон гэх этгээд олдохгүй бол энэ хэргийг хаах байх" хэмээх тайлбарыг өгсөн юм.

А.ДАВАА

Энэ мэдээнд өгөх таны үнэлгээ

Хуваалцаарай Жиргээрэй