Монголын Банкны Холбоо нь 2013 оноос эхлэн Монгол Улсын банк санхүүгийн салбарын хөгжил, эрх, тэгш өсөлтийг хангахад манлайлан оролцсон, банкны байгууллагыг хөгжүүлэх, бэхжүүлэхэд үлэмж их хувь нэмэр оруулсан зүтгэлтэн, банк санхүүгийн салбарын удирдах ажилтанг тодруулан Монголын Банкны Холбооны дээд шагнал “Хаш Эрдэнийн Одон”-г гардуулж эхэлсэн билээ. Энэ жил уг шагналыг Капитрон банкны Гүйцэтгэх захирлын Санхүү хариуцсан орлогч Ч.Энхбатад хүртээж, Монголын банк санхүүгийн салбарын хөгжилд манлайлан оролцсныг нь үнэллээ. Ч.Энхбат нь банкны салбарт 32 жил тасралтгүй ажиллаж, Монгол Улсын банк санхүүгийн хөгжилд хувь нэмрээ оруулсаар байна. Тэрбээр Санхүү, эдийн засгийн дээд сургуулиас ажлын гараагаа эхэлж, Үндэсний аюулгүй байдлын зөвлөл, Сангийн яам, Сэргээн босголт, Хадгаламж, Монгол шуудан зэрэг банканд хэлтсийн дарга, Гүйцэтгэх болон газрын захирлаар ажиллаж байсан юм.
2015 оноос Капитрон банканд Санхүү эрхэлсэн орлогч захирал, Гүйцэтгэх захирлын тэргүүн орлогч, Гүйцэтгэх захирлын орлогчоор томилогдон ажиллаж байсан бөгөөд одоо Гүйцэтгэх захирлын Санхүү хариуцсан орлогчийн алба хашиж байна. Түүний ажиллах хугацаанд Капитрон банкны нийт актив 10 дахин өсөж 1.8 их наяд төгрөгт хүрсэн бөгөөд энэ өсөлтийн хурдаараа банкны салбарыг тэргүүлж, өрсөлдөх чадвар нэмэгдэн, харилцагч нарт хүргэх бүтээгдэхүүн, үйлчилгээний цар хүрээ тасралтгүй өргөжин тэлж байна. Энэ үзүүлэлтээр тус банкийг системийн 6 дахь банк болон өсөж хөгжихөд Ч.Энхбат нь жинтэй хувь нэмэр оруулсан юм.
Түүнчлэн Ч.Энхбат захирал нь банкны 2 шатлалт системд шилжсэний дараах үеийн банкны салбарын шилдэг хүний нөөцийг бэлтгэх, санхүүгийн секторт нөлөө бүхий банкуудад ажиллан үйл ажиллагааг нь өргөжүүлэх, ашигт ажиллагааг нь нэмэгдүүлэх чиглэлээр өөрийн хувь нэмрийг оруулсаар ирсэн мэргэшсэн банкир юм. Иймд Ч.Энхбатын банк санхүүгийн салбарт оруулсан хувь нэмэр, хүчин чармайлт, амжилт бүтээл, тууштай хөдөлмөрийг өндрөөр үнэлж Монголын Банкны Холбооны дээд шагнал “Хаш Эрдэнийн Одон”-гоор шагнажээ.
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.