Эрх баригчид өөрсдийгөө тунхаглах хаалтын чуулган

Монгол Ардын Нам үнэмлэхүй олонхоор хоёр парламент дамнан сууж, сөрөг хүчний гишүүд ердөө 12 дотор хэлбэлзсэн найман жилийн УИХ-ын чуулган энэ хавар хаалтаа хийнэ. Ингэснээр бид аль ч улс төрийн нам ялсан байлаа ч 76 бус 126 гишүүнтэй парламенттай болж, Ардчилсан хувьсгалаас хойших нэг шинэ шилжилт рүү орно.

Энэ шилжилтэд АН, МАН болоод бусад улс төрийн хүчнүүд ямар жин дарах, тэдний оролцоо хэр байх, сонгуульд ард түмэн чухам ямар хандлагаар саналаа өгөхийг бид ердөө 100 гаруйхан хоногийн дараа л харчих юм. Ийм богино хугацаа үлджээ, 2024 оны УИХ-ын сонгуулийн циклд. Чухам тиймээс л айл бүрийн хойморт зурагтаар гарах боломжийг гишүүд энэ хавар сайтар ашиглахыг зорих юм.

Ерөөс сонгуулийн жилийн хаварт УИХ нь ер бусын идэвхтэй юм шиг поп дүртэй, Засгийн газар нь ихээхэн санаачлагатай, өглөгч болдог. Ирэх сард л гэхэд Засгийн газраас төсөвт суулгасны дагуу 1 их наяд орчмоор цалин, тэтгэвэр, халамжийн хэмжээг нэмэгдүүлнэ. Үүнд сонгуулийн насны 880 мянга гаруй иргэд хамрагдах бөгөөд энэ нь нийт санал өгөгчдийн 40 хувьд хүрэх түүн үзүүлэлт юм.

Санаж буй бол, 2016 онд АН хамтарсан Засгийн газар барьж байхдаа сонгуулийн хавар баахан "САЙН" хөтөлбөр зарлаж, айл өрхийн хашаа гудам засаад л бөөн юм болж байв. Харин МАН ялангуутаа "Төсвийн бус зардлаарх бүх хөтөлбөрийг зогсоолоо. Улс тань дампуурах гэж байна" хэмээн зарлаж байв. Харин төсвийн тэлэлтэд шууд нөлөө үзүүлж байгаа дээрх цалин, тэтгэвэр, халамжийн нэмэгдэлд сонгуулийн дараа аль ч нам засагласан хориг тавьж чадахгүй юм.

Энэ мэтээр эл хаваржин л Засгийн газрын нөөц сангаас маш их зардал аймгууд руу урсаж, малчдын зээлийн хүүг төр даах зэргээр уярч хайлсаар таарах нь тодорхой болов. Нөгөө талд хууль тогтоох засаглал хотыг 2040 он хүртэлх хөгжүүлэх ерөнхий төлөвлөгөөг баталж, баялгийн сан, тэтгэврийн агуулгаар бодлогын реформ хийх гэж үзэх нь ээ. Бүр Х.Баттулгад зориулан бичиж байсан Ерөнхийлөгчийн тухай хуулийн төслийн шинэчилсэн найруулгаа ч хэлэлцэхээр зоосон байна.

Хаврын чуулганы хамгийн том хүлээлтүүдийн нэг нь, бас хотын газар олголтын асуудлаар нээлттэй сонсгол хийнэ. Ерөнхийдөө эрх мэдэлтэй, мэдээлэл хаалттай үед М.Энхболд, Г.Мөнхбаяр, С.Батболд, Т.Бадамжунай нарын удирдлагууд хэрхэн тойрон хүрээлэлдээ газар олгосныг нийтээрээ шүүн хэлэлцэнэ гэсэн үг.

Үүний цаад нюанс нь, мэдээлэл ил тод болсон ийм үед Н.Номтойбаяр тал руу баахан налаад буй М.Энхболдын фракцид халуун жин тавьж, Б.Наранхүү тэргүүтэй газрын наймаачдыг нийтэд шарж үзүүлнэ.

Сонгуулийн хавар ингэж л эрх баригчид, түүний лидерүүд нийтэд ойлгогдох, өрсөлдөгч намууд ба доторх нөхдийнхөө хэнийг сонгохгүй байх талаарх ухуулгыг мэдээллээр дамжуулан өгсөөр байх юм. Дээрээс нь нэгж гишүүн бүрийн нийтэд ил харагдах гэсэн оролдлогууд улам идэвхжинэ. Тэгэхээр дагаад мэдээллийн менежерүүдийн торгон мэдрэмж ч ихийг залж болохоор харагдаж буй.

Онцлууштай нь, МАН түүхэндээ хамгийн залуу удирдлагын багтай сонгуульдах гэж байна. Босоо удирдлагатай, намын дарга нь Удирдах зөвлөл, Бага хурал дээрээ асуудлаа оруулж ирээд, шуудхан гар өргүүлчихдэг эл нам гүндээ шуурга ихтэйхэн байна.

Намын залуу дарга нь жагсаалтын дэслэл, мандат хуваарилалт, дотоод хүчнүүдээ бодоод дүмбийчихсэн. Түүнд харагдах, таалагдах, сэтгэгдэл төрүүлэх гэсэн асар олон сүрэг хүмүүс үүсчхээд байна. Ийм битүү ч юм шиг, ил тоглолттой ч юм шиг орчинд МАН үнэмлэхүй олонхиор бүрдүүлсэн сүүлийн чуулганаа хийх гэж байна.

Энэ мэдээнд өгөх таны үнэлгээ

Хуваалцаарай Жиргээрэй