УЛС ТӨР

БНАЛАУ-ын Вьентьян хотын ИТХ-ын дэд дарга Ламфой Сиахкачанх айлчилж байна

Бүгд Найрамдах Ардчилсан Лаос Ард Улсын Вьентьян хотын Иргэдийн төлөөлөгчдийн хурлын дэд дарга Ламфой Сиахкачанх тэргүүтэй төлөөлөгчид Монгол Улсын нийслэл Улаанбаатар хотод ажлын айлчлал хийж байна. Нийслэлийн ИТХ-ын дарга Ж.Батбаясгалан өнөөдөр Вьентьян хотын төлөөлөгчдийг хүлээн авч уулзлаа. Уулзалтын үеэр Монгол Улс, БНАЛАУ-ын нийслэл хотуудын харилцаа, хамтын ажиллагааны талаар санал солилцов.

Нийслэлийн ИТХ-ын дарга Ж.Батбаясгалан хоёр хотын хамтын ажиллагаа, тэр тусмаа уламжлалт ёс заншил, соёл, боловсролын салбарт иргэд хоорондын харилцааг өргөжүүлэн хөгжүүлэх, танин мэдэхэд хурлын байгууллагууд гүүр болон ажиллах нь чухлыг онцлов. 

Вьентьян хотын ИТХ нь 41 төлөөлөгчтэй бөгөөд нийслэлийнхээ хөгжлийн бодлого, тулгамдсан асуудлын талаар хамтын шийдвэр гаргадаг. 3800 км/кв газар нутагтай Вьентьян хот нь хүн ам ихтэй. Ойрын үед коронавируст цар тахал болон олон улс, бүс нутгийн өмнө тулгамдсан ээдрээт нөхцөл байдлаас шалтгаалсан эдийн засгийн сорилт бэрхшээлийг давж байгаа талаар дэд дарга Ламфой Сиахкачанх уулзалтын үеэр хэлсэн юм. Улмаар олон улсын болон бүс нутгийн ИТХ-тай хамтын ажиллагаагаа сайжруулан ажиллахыг зорьж байгаа бөгөөд энэ хүрээнд Улаанбаатар хотод хийж буй ажлын айлчлалаар талууд харилцан туршлага солилцож, хамтран ажиллана гэдэгт итгэлтэй байгааг тодотгов. 

Монгол Улсын Ерөнхийлөгч У.Хүрэлсүх 2023 онд тус улсад төрийн айлчлал хийсэн бөгөөд, БНАЛАУ-ын Үндэсний Ассамблейн дарга Сайсумпон Фумвихан мөн манай улсад албан ёсны айлчлал хийсэн. Хоёр орны харилцаа бүх түвшиндээ ийнхүү гүнзгийрэн хөгжинө гэдэгт итгэлтэй байгаагаа Нийслэлийн ИТХ-ын дарга Ж.Батбаясгалан онцлоод, хатагтай Ламфой Сиахкачанх болон дагалдан яваа төлөөлөгчдийн манай хотод хийж буй ажлын айлчлалд нь амжилт хүслээ. Уулзалтад Нийслэлийн ИТХ-ын дахь намуудын бүлгийн дарга болох Д.Ихбаяр, Б.Эрдэнэсүх, Д.Гантулга, төлөөлөгч Л.Ариунтуяа, Д.Энхтуяа, Г.Гангөмөрөн болон Хурлын Ажлын албаны удирдлагууд байлцлаа. 

Энэ мэдээнд өгөх таны үнэлгээ
Like
Love
Haha
Wow
Sad
Angry

Д. Мөнхбат

Утга зохиол судлаач, сэтгүүлч мэргэжилтэй. МҮОНР-ийн Урлаг соёлын алба болон МҮОНТ-ийн Нийгэм, эдийн засаг, бодлогын нэвтрүүлгийн редакцад сэтгүүлчээр ажиллаж байсан. Сэтгүүл зүйн салбарт гурав дахь жилдээ ажиллаж байна.

АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.

guest
0 Сэтгэгдэл
Inline Feedbacks
View all comments

Холбоотой мэдээ

Back to top button