Х.Нямбаатарт хяналт тавих Х.Баттулгын тоглолт

Хоёр үнэн төлөв байна.

Нэг. Ирэх дөрвөн жилд хотод хамгийн их бүтээн байгуулалт өрнөнө. Нийслэлийн төсөв тэлж, хөрөнгө оруулалтууд гаднаас ч үлэмж нэмэгдэнэ. Аж ахуйн чанартай томоохон мөнгөний ажлууд хотоо түшиглэх юм. Тэгэхээр хот эрх мэдэлтнүүдийн анхаарлыг хамгийн их татах бас төвлөрөх цэг болчхоод байна.

Хоёр. Ил далд байдлаар ирэх дөрвөн жилд төрийн инститүц хоорондын хагарал хамгийн их явагдахаар байна. Ерөнхийлөгчөө парлемантаас сонгодог болох уу. У.Хүрэлсүх дахин нэр дэвших эрхийг эсвэл эцэг хуулиар нээх үү. Хотын статусууд яаж тэлэх үү. УИХ, Засгийн газрын дундах хяналт ямар байх уу зэрэг. Эдгээрийг төлөөлж буй эрхмүүд эдүгээ хөшигний ард хэдийнэ байлдаж эхэлсэн. Тэд улам хурцаар цаашид ч үзэлцэх юм.

Төсөв мөнгө тэлэлт, эрх мэдлийн булаацалдаан дунд гол дүрүүдийн нэгээр нэрлэгдсээр байгаа нь ХОТ. Хотын иргэдийг нийслэлд төлөөлөх эрхмүүд дунд томчуудын хүмүүс сууж, тэдний эрх ашгийг хамгаалах шаардлага, хэрэгцээ ирэх жилүүдэд улам ихсэх юм.

Энэ утгаараа саях МАН, АН-ын зарласан НИТХ-ын төлөөлөгчид өрсөлдөх 45 нэрсийн үнэ цэнэ бараг л парламенттайгаа зэрэгцэж, нэр двэших эрх хэдэн тэрбум хүрсэн гэх яриа ч байна.

МАН, АН-ыг нийлүүлж тоолбол, энэ хэд 90 хүн. Гэвчиг үнэндээ АН, МАН-ын хэдхэн томчуудын тархинд зурагдаж, тэдний дэмжлэгээр нэр дэвших эрхээ авцгаав. Ерөнхий байдлаар нь АН, МАН-ыг төлөөлж, хотод өрсөлдөх төлөөлөгчдийн ард хэн хэн дэмжиж буйг тайлбарлаж байна.

АН: Т.Батцогтын ард Х.Баттулга хамгийн хүчтэй нөлөө үзүүллээ

УИХ-аас өөр нь НИТХ-д өрсөлдөгчдийг гол тодруулах эрх хотын намын хорооны даргадаа байдаг. Намын дарга, генсек зэрэг томчууд нь ерөнхий зангидах авчиг хотын намын хорооны дарга багаа бүрдүүлж орно. Энэ жишгээр хотын АН-ын хорооны дарга Т.Батцогт голчлон НИТХ-д өрсөлдөх дүрүүдээ эрэмбэлжээ.

Гэхдээ түүний ард Ерөнхийлөгч асан Х.Баттулга хамгийн өндөр нөлөөг үзүүлэв. Тэрбээр,

• Х.Баттулгын төрсөн дүү Х.Баттуулын хүү Б.Оргилбат,
• Туслах Б.Саруул,
• “Талх чихэр” ХК-ийн Санхүү хариуцсан захирал Б.Бурмаа,
• “Хиам консервийн үйлдвэр” компанийн захирал Б.Бадмаа,
• Х.Баттулгын хэвлэлийн төлөөлөгч асан о.Батханд,
• "Цензурьгүй" багийн сэтгүүлч Ж.Баттуул,
• УИХ-ын сонгуулиар Ч.Хүрэлбаатарын эсрэг ажилласан О.Отгонтөгс, Э.Энхзориг зэрэг 20 орчим нэр дэвшигч сойхоор нөлөөлөв.

УИХ-ын сонгуулиар мандат хуваарилалт, жагсаалтын дэс АН дотор Л.Гантөмөр, Х.Баттулга, Ц.Элбэгдорж, "Нэг монгол" фракц зэрэг тархмал шинжтэй хуваарилалт явагдсан. Тэгвэл энэ удаа 45 нэр дэвшигчийн бараг тал хувийг нь Ерөнхийлөгч асан Х.Баттулга авчихсаныг харж болно.

АН-ын дарга Л.Гантөмөр өөрийнхөө талаас П.Бадарсан тэргүүтэй цөөхөн дүр сойв. Хамтарсан Засгийн газарт багтаж, ирэх жилүүдэд бүтээн байгуулалтын том төслүүдэд эрх өгөх түүнд нам дотроо Х.Баттулгатай тохиролцох, түүнийг зөөлрүүлж авах хэрэгцээ байв. Сайн ч буулт хийлээ, өнөөх нь ч сайтар ашиглав.

МАН: Х.Нямбаатар томчууддаа бага боломж олгож, өөрийн хүслээр багаа зангидах гэж эрмэлзэв

Х.Нямбаатар сайд, УИХ-ын гишүүний давхар суудлаас буухдаа сонгуулийн дараа ч хотын даргаа хийнэ гэсэн улс төрч хүний зорилго өвөртөлсөн. Энэ нь ч буруу биш. Хоёр том суудлыг хоёр дараалсан хотын даргын ажлаар тэр жигнэжээ. Тийм учраас Х.Нямбаатарт одоо "Тэр минь, энэ минь" гэж сул хүн өрсөлдүүлбэл өөрт нь халгаатай юм.

Тэр ч утгаараа хуучин МАН-ын НИТХ-ын төлөөлөгчдийн талаас их хувийг нь хяргаж орхив. Зөрүүлээд Хөгжлийн банкны асуудлаагр нийтэд танигдсан Н.Мандуул, хамаг л том төслүүдийг нь хөдөлгөж ирсэн Л.Хосбаяр, наадмаар нүүрийг нь тахалсан Ж.Энхжаргалан зэрэг шинэ дүрүүд оруулж ирэв.

Хуучнуудаас масс танигдалт харьцангуй сайн Ж.Батбаясгалан, Э.Энххулан нарыг нэгэн цагт хотын фракц үүсгэж явсан М.Энхболдын нөлөөллөөр, МАН-ын генсек Д.Амарбаясгалангийн оролцоог хангаж, эдийн засагч Б.Дөлгөөнийг, ЗГХЭГ-ын дарга Н.Учраас М.Говьсайхан зэрэг дүрүүдийг авчээ.

Тэр ерөнхийдөө намын томчууд, хотод нөлөө бүхий эрхмүүдийн хүмүүсийг авахдаа Т.Батцогт шигээ нэг хүнээс олон төлөөлөл авсангүй. Эхийг нь эцээж, туглыг нь тураахгүй байх аргачлалаар томчууддаа цөөн бусаг тоо өгсөн нь харагдана.

Яг хотын дарга Х.Нямбаатарын дэмжлэгтэйгээр Ж.Сандагсүрэн, Ц.Төрхүү, Б.Сэргэлэнбаатар зэрэг шинэ дүрүүд өрсөлдөнө. Тэд сонгогдлоо гэхэд яг л түүнийг үгээр явах хүмүүс. Тийм баг ч Х.Нямбаатарт НИТХ-д хэрэгтэй юм.

Ийм байдлаар харвал, АН талаас Ерөнхийлөгч асан Х.Баттулга, МАН талаас хотын дарга Х.Нямбаатар нарын хүмүүс хамгийн олноороо нэр дэвшиж байна. НИТХ олон нийт талдаа бол сөрөг хүчинтэй байх нь хамгийн чухал. Ер нь таалагдаагүй бүх хууль, дүрмээ өөрчилж байгаад, ажлаа хийх гэж үздэг Х.Нямбаатарт НИТХ-д хяналт байх нь ч зөв юм. Тэр хяналтыг харин АН талаас Х.Баттулгын баг тавьж чадахуйц ялалт байгуулах уу гэдэг хүлээлт үүсэв.

Энэ мэдээнд өгөх таны үнэлгээ

Хуваалцаарай Жиргээрэй