Авлига, албан тушаалын гэмт хэрэг үйлдсэн Ж.Соронзонг ажлаас чөлөөлсөн шийдвэр хэвээр үлдлээ

Нөхөр Н.Лүндэндорж, дүү Ж.Содбилэг нартаа давуу байдал олгож, 3.3 тэрбум төгрөгийн асуудалд холбогдсон хэргээр ажлаасаа чөлөөлөгдсөн Монгол, Оросын хамтарсан III сургуулийн захирал асан Ж.Соронзонгийн нэхэмжлэлийг Захиргааны хэргийн давж заалдах шатны шүүх наймдугаар сарын 27-ны өдөр хэлэлцсэн байна. Энэ талаар албаныхнаас тодруулахад "анхан шатны шүүхийн шийдвэрийг хэвээр үлдээсэн. Хэрэгт холбогдогчдоос Улсын дээд шүүхэд гомдол гаргах эрх нээлттэй" хэмээсэн юм.

Тус асуудлыг тодруулбал, Монгол, Оросын хамтарсан III сургуулийн захирал асан Ж.Соронзонд холбогдох хэргийг өнгөрсөн оны арваннэгдүгээр сарын 30-ны /2023.11.30/ өдөр Нийслэл дэх Захиргааны хэргийн шүүх хэлэлцээд "Ж.Соронзонг ажлаас нь чөлөөлсөн Л.Энх-Амгалангийн шийдвэрийг зөв" гэж үзсэн байдаг.

Анх Монгол, Оросын хамтарсан III сургуулийн Удирдах зөвлөлийн 2022 оны хоёрдугаар сарын 16-ны өдрийн тогтоолоор байгуулагдсан ажлын хэсгийн тус сургуулийн удирдлага, санхүүгийн үйл ажиллагаанд хийсэн хяналт шинжилгээний тайланд захирал Ж.Соронзонг Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуулийг зөрчсөн гэж дүгнэж, улмаар Боловсрол, шинжлэх ухааны сайд Л.Энх-Амгалан 2022 оны 09 дүгээр сарын 07-ны өдрийн Б/72 дугаар тушаалаар тус сургуулийн захирлын үүрэгт ажлаас Ж.Соронзонг чөлөөлсөн юм. 

Харин Монгол, Оросын хамтарсан III сургуулийн захирал асан Ж.Соронзон нь Нийслэл дэх Захиргааны хэргийн анхан шатны шүүхэд "Боловсрол, шинжлэх ухааны сайдын 2022 оны есдүгээр сарын 07-ны өдрийн Б/72 дугаар тушаалыг хүчингүй болгуулж, урьд эрхэлж байсан Орос-Монголын хамтарсан сургуулийн захирлын ажилд эгүүлэн тогтоолгох, ажилгүй байсан хугацааны цалин гаргуулах, эрүүл мэнд, нийгмийн даатгалын шимтгэлийг нөхөн төлүүлэх" нэхэмжлэл гаргасан ч ийнхүү анхан шатны шийдвэрийг хэвээр үлдээсэн юм.

Давж заалдах шатны шүүхээр "Ж.Соронзон нь 3 тэрбум 30 сая төгрөгийн хүүгийн орлого, зарлагыг Удирдах зөвлөлөөр тодорхой шийдвэр гаргуулаагүй” санхүүгийн зөрчил, мөн “сургуулийн захирлаар ажиллаж байсан Ж.Соронзон нь өөрийн гэр бүлийн хүнийг гэрээт багшаар ажиллуулж сард 4,160,000 төгрөгийн цалин олгож ажиллуулсан”, “өөрийн төрсөн дүүгийн Эрхга компанид сургуулийн өдөр өнжүүлэхийн байрыг сонгон шалгаруулалтгүйгээр зах зээлийн үнээс доогуур үнээр түрээслүүлсэн” зөрчлийг “мөнгө эд хөрөнгө захиран зарцуулахдаа итгэл алдсан буруутай үйлдэл гаргасан” үндэслэлд тооцож захиргааны санаачлагаар хөдөлмөрийн харилцааг дуусгавар болгож шийдвэрлэснийг хууль бус гэж үзэхээргүй байна" хэмээн үзжээ.

З.УЧРАЛ

Энэ мэдээнд өгөх таны үнэлгээ

Хуваалцаарай Жиргээрэй