Чуулган | Д.Жаргалсайхан: Ажил хийхгүйгээр мөнгөө банканд хадгалаад л ашигтай ажиллаж байна

2024.10.17-ны өдрийн УИХ-ын чуулганы нэгдсэн хуралдааны мэдээллийг нэг дороос хүргэж байна.

ҮДЭЭС ХОЙШИХ ХУРАЛДААН:

Төрөөс мөнгөний бодлогын талаар 2025 онд баримтлах үндсэн чиглэлийг хэлэлцэж байна.

НЭМЭЛТ: 15.40 цаг

УИХ-ын гишүүн Д.Жаргалсайхан: "Хүүгийн нэгдсэн бодлого явуулна гээд тодорхой байгаа. Хүүнд анхаарахгүй бол Монгол Улсад өргүй хүн гэж байхаа болилоо. Өрийн дарамтаас гарч чадахгүй байна. Ядуурал тартагтаа туллаа. Амьдрал дээр хөдөөд ЖДҮ сүйрчихсэн шүү дээ. Төсвөөр хэдхэн ажил явагдаж байна".

Монголбанкны Ерөнхийлөгч Б.Лхагвасүрэн: Бодлогын хүү 13 хувь байхад зээлийн дундаж хүү 17 байж ирсэн. Бодлогын хүүгээ 10 хувь болгохоор зээлийн хүү буурах боломжтой гэж Монголбанк харж байна. Иргэдийн харилцах хадгаламж 5 их наядаар өсөж байгаа нь өнгөрсөн онд цалин тэтгэвэр тэтгэмж нэмэгдсэн" гэлээ.

УИХ-ын гишүүн Д.Жаргалсайхан: Хадгаламжийн хүү өнөөдөр 16 хувьд хүрчихлээ. Ажил эрхлэхгүйгээр, бизнес хийхгүйгээр, ЖДҮ хөгжүүлэхгүйгээр мөнгөө банканд хийгээд суухад л ашигтай ажиллаж чадаж байна шүү дээ.

НЭМЭЛТ: 15.20 цаг

-С.Ганбаатар: МАН найман жил эрх барихдаа мөнгө хүүлэгчдийн эх орон болгочихлоо-

УИХ-ын гишүүн С.Ганбаатар: "Мөнгө хүүлэгчдийн эдийн засаг болчхоод байгааг яаж зогсоох вэ. Экспортыг дэмжсэн, импортыг орлосон зээлээ хэзээ өгөх вэ. Монголын мөнгөний бодлого бол вампир. Банкны системийн цэвэр ашиг нь 900,9 тэрбум төгрөг болчхоод байна. Бараг 1 их наяд. Энэ бодлого хэзээ өөрчлөгдөх вэ.

Монголбанкны буянаар 100 төгрөгийг иргэд 130 төгрөгөөр худалдаж авч байна. Яаж инфляц нэг оронтой тоонд байх вэ. Тайлбарла даа. МАН сүүлийн найман жил эрх барихдаа мөнгө хүүлэгчдийн эх орон болгочихлоо. Хадгаламжийн хүү Японд хасахтай байна шүү дээ.

Тог, цахилгааны тарифын нэмбэл инфляцд нөлөөлөхгүй гээд худлаа яриад байх юм" хэмээлээ.

Монголбанк: Цахилгаан, дулааны үнийн өсөлт инфляцд нөлөөлнө гэж үзсэн. Энэ тухай тооцоолол цэнхэр номонд орчихсон байгаа. Цахилгааны үнийг 30%-иар нэмэгдүүлбэл инфляцийг 0,8 хувиар нэмэгдүүлнэ гэсэн тооцоо бий. Зээлийн хүү өндөр байгаатай санал нэг байна" хэмээн хариулав.

НЭМЭЛТ: 15.00 цаг

Б.Лхагвасүрэн: Том мөнгөн дэвсгэрт гаргах боломжтой. Эдийн засгийн сөрөг үр дагаваргүй

УИХ-ын гишүүн Д.Ганбат: Монгол банкны валютын нөөцийнхөө хэчнээнийг нь алтаар хадгалдаг вэ. 50 мянгатын дэвсгэрт хэвлэх үү. Мөнгө авдаг АТМ-ыг нэг стандарттай болгооч ээ. Банк бүр өөр өөр загвартайг тавьчихдаг.

Монголбанкны Ерөнхийлөгч Б.Лхагвасүрэн: Монгол Улсын валютын нөөц түүхэн дээд хэмжээндээ хүрээд байна. Тогтвортой байх боломжтой. Нөөцийнхөө тодорхой хэсгийг алтаар барьдаг. 600 сая ам.долларын нөөц алтаар байршиж байгаа. Монголбанк жилд 20 орчим тонн алт худалдаж авдаг. Алт олборлолт муу байгаа тул энэ онд 20 тоннд хүрэхгүй байх магадлалтай. Алтны үнэ маш сайн өсөж байгаа. Мөнгөн тэмдэгтийнхээ бүтэцтэй холбоотой судалгааг байнга хийдэг. Том мөнгөн дэвсгэрт гаргах боломжтой. Эдийн засгийн ямар нэгэн сөрөг үр дагавар гарахгүй гэдэг дүгнэлт бий. Гэхдээ том дэвсгэрт гаргах, мөнгөний бүтцийг өөрчлөхөөр бол Монголбанк УИХ-аар оруулж шийдүүлдэг" хэмээн хариуллаа.

ЭХЛЭЛ: 10.00 цаг

-УИХ-ын чуулганы хуралдаанаар хэлэлцэх асуудлууд-

Энэ долоо хоногийн пүрэв, баасан /2024.10.17-18/ гарагийн хуралдаанаар дараах асуудлуудыг хэлэлцэхээр товложээ.

•  “Монгол Улсын Их Хурлын хяналтын сонсголыг зохион байгуулах нарийвчилсан журам батлах тухай” Улсын Их Хурлын тогтоолын төсөл
• “Монгол Улсын Их Хурлын 2024 оны намрын ээлжит чуулганы төлөвлөгөөт хяналт шалгалтын цаглавар батлах тухай” Улсын Их Хурлын тогтоолын төсөл
• “Дэд хорооны бүрэлдэхүүний тухай”  Улсын Их Хурлын тогтоолын төсөл
• “Төрөөс мөнгөний бодлогын талаар 2025 онд баримтлах үндсэн чиглэл батлах тухай” Улсын  Их Хурлын тогтоолын төсөл /Монголбанк 2024.09.27-ны өдөр ирүүлсэн/
• “Монгол Улсын хөгжлийн 2025 оны төлөвлөгөө батлах тухай” Улсын Их Хурлын тогтоолын төсөл /Засгийн газар 2024.09.27-ны өдөр өргөн мэдүүлсэн, хоёр дахь хэлэлцүүлэг/
• Монгол Улсын 2025 оны төсвийн тухай, Үндэсний баялгийн сангийн 2025 оны төсвийн тухай, Нийгмийн даатгалын сангийн 2025 оны төсвийн тухай, Эрүүл мэндийн даатгалын сангийн 2025 оны төсвийн тухай хуулийн төслүүд /Засгийн газар 2024.08.30-ны өдөр өргөн мэдүүлсэн, нэг дэх хэлэлцүүлэг, үргэлжилнэ/

Энэ мэдээнд өгөх таны үнэлгээ

Хуваалцаарай Жиргээрэй