Ц.Сандуй тэргүүтэй Улаанбаатар хотын төлөөлөгчдийг сард 9-17 сая, жилд тэрбум гаруй төгрөгөөр эрхлүүлдэг

Улаанбаатар хотын төлөөлөгч гэх статусаар амьдрах аргаа олчихсон хэдэн хүн байна. 2015 онд ОХУ-ын Москва, БНСУ-ын Сөүл, Тайванын Тайпэйд төлөөлөгч суужээ. Москва болон Сөүл хот дахь төлөөлөгчөө сар бүр 12, Тайпэй дахь төлөөлөгчөө улиралд 162,5 сая төгрөгөөр санхүүжүүлж байж.

Өдгөө Улаанбаатар хотын төлөөлөгч гэх албыг хашиж, гадаад улсад амьдарч байгаа таван хүн бий. Тэднийг өмнөх Хотын дарга Д.Сумъяабазар томилж байсан ч, Х.Нямбаатарын үед ч нийслэлийн төсвөөс цалинжиж байна.

Нийслэлийн Засаг Даргын Тамгын Газрын шилэн дансны “Цалингийн зардлаас бусад таван сая төгрөгөөс дээш үнийн дүн бүхий зарлагын мөнгөн гүйлгээ”-нд байршуулсан нээлттэй мэдээллээс шүүж үзэв. Чингэхэд 2024 оны V болон VI сард хоёр л удаа таван хүний дансанд 9-17 сая төгрөг шилжүүлжээ. Харин 2023 оны гуравдугаар сард буюу томилогдсон хугацаанаас эхлээд мөнгөн дүн шилжсэн тухай нээлттэй мэдээлэл алга.

Мөн Тайванийн Тайпэйд Улаанбаатар хотыг хэн төлөөлж сууж буй нь тодорхойгүй ч, 2023 оны Х сард дөрөвдүгээр улирлын санхүүжилт хэмээн 383,811,400 төгрөг шилжүүлсэн байна.

Япон дахь Улаанбаатар хотын төлөөлөгч Ц.Сандуй,

“60 тэрбумын хэрэг"-ийг нь бүхэлд нь сэргээн, дахин шалгаж эхэлсэн 2023 оны гуравдугаар сард тухайн үеийн Хотын дарга Д.Сумъяабазар Ц.Сандуйг Япон руу явуулчихсан билээ. Түүний дараа дөрвөн хүн төлөөлөгчөөр явсан.

• 2024 оны V сард 17,238,214 төгрөг
• 2024 оны VI сард 17,235,882 төгрөг

Москва дахь Улаанбаатар хотын төлөөлөгч М.Мөнхцэцэг,

Түүнийг Мөнхчулууны Зоригтын төрсөн эгч гэдэг мэдээлэл бий. Тэрбээр, Москва хот дахь Улаанбаатар хотын төлөөлөгчөөр 2015 оноос эхэлж сууж байна. 2015 онд сар бүр 8-12 сая орчим төгрөгөөр цалинждаг байжээ. Ийнхүү арав дахь жилдээ нийслэлийн төсвөөс цалинжиж буй гэсэн үг.

• 2024 оны V сард 15,547,524 төгрөг
• 2024 оны VI сард 15,545,412 төгрөг

Польш улсын нийслэл Варшав дахь Улаанбаатар хотын төлөөлөгч Э.Цэлмүүн,

• 2024 оны V сард 17,238,214 төгрөг
• 2024 оны VI сард 17,235,882 төгрөг

БНСУ-ын Сөүл дахь Улаанбаатар хотын төлөөлөгч Б.Хажидмаа,

Б.Хажидмаагаас өмнө 2015 онд Сөүл хот дахь төлөөлөгчөөр Баттөмөрийн Дулмаа суудаг байжээ. Түүнийг 8-12 сая төгрөгөөр сар бүр цалинжуулдаг байж. Улмаар 2017 онд МАН-ын Удирдах Зөвлөлийн Ажлын албаны Хэвлэл мэдээлэл, олон нийттэй харилцах газрын дарга асан Б.Хажидмааг БНСУ-ын нийслэл Сөүл дэх Улаанбаатар хотын төлөөлөгчөөр томилсон байдаг. “Өдрийн сонин”-д сэтгүүлчээр ажиллаж байснаас гадна МАН-ын төв хэвлэл болох “Монголын Үнэн” сонины орлогч эрхлэгчээр ажиллаж байсан намтартай аж.

• 2024 оны V сард 13,180,558 төгрөг
• 2024 оны VI сард 13,178,754 төгрөг

Д.Баянмөнх,

Хотын даргын орлогч асан Д.Баянмөнх аль нэг улсад "Улаанбаатар хотын төлөөлөгч" гэх албан тушаалыг хашиж, татвар төлөгчдийн мөнгөнөөс цалин авч байна.

• 2024 оны V сард 9,186,000 төгрөг
• 2024 оны VI сард 9,186,000 төгрөг

Гадаад улсад уг нь ЭСЯ үйл ажиллагаа явуулдаг ч, Улаанбаатар хот тусдаа төлөөлөгч тавьж, төсвийн мөнгөнөөс цалинжуулан гадаад харилцаагаа явуулдагт нь олон нийт эргэлздэг.

Жишээ нь, Ц.Сандуй нийслэлийн төлөөлөгчийн статусаар сард 17 сая, жилд 204 сая төгрөгийн амьдрах зардал аваад сууж байна. М.Мөнхцэцэг 180 сая, Э.Цэлмүүн 200 сая, Б.Хажидмаа 150 сая, Д.Баянмөнх 110 сая гэж бодвол эдгээр таван хүнд жилд бараг тэрбум гаруй төгрөг зарцуулдаг болж таарах уу гэдэг асуулт гарч ирж буй юм.

Гэвч эдгээр хүмүүс үйл ажиллагаа явуулдаг төлөөлөгчийн байртай эсэх нь асар эргэлзээтэй. Нэмээд хэвлэлийн төлөөлөгчгүй, машингүй. Хамгийн хачирхалтай нь наашаа НИТХ-д ч, НЗДТГ-т ч ажлаа тайлагнадаггүй аж. Ямар сайндаа л Хотын дарга Х.Нямбаатар одоо ч тэдэнтэй уулзаагүй гэгдэх вэ.

Ийм амар хялбар суудалд горилогсдын цуваа үүсжээ. Хамтарсан Засгийн газрын үр нөлөөгөөр албан тушаалд сууж чадаагүй заргалдагчид Улаанбаатарын төлөөлөгчөөр гадагшаа явах уртаас урт жагсаалт бий болж. Засгийн газрын түвшинд хүртэл заргалдаж буй гэгдэж байна.

Энэ мэдээнд өгөх таны үнэлгээ

Хуваалцаарай Жиргээрэй