Өнгөрсөн онд брент газрын тос баррель нь 85 ам.долларт хүрч, харьцангуй өсөлт мэдрэгдэж байсан билээ. Харин 2025 оны эхэн үеэс газрын тосны үнэ унасаар байна. OPEC-ийн бүлгийн шийдвэрээс хамаарч оны эхний гурван сарын байдлаар брент газрын тосны үнэ баррель нь 70.56 ам.долларын ханштай байна.
АНУ-ын Ерөнхийлөгч Дональд Трамп, ОХУ-ын Ерөнхийлөгч Владимир Путин нар гурван жил үргэлжилж буй Украины дайныг зогсоох талаар хэлэлцсэний дараа Оросын шатахууны экспортод тавьсан хориг арга хэмжээнүүдийг сулруулж магадгүй байгаатай холбоотойгоор газрын тосны үнэ нэг хувиар буурав.
Орос, Украины талууд эрчим хүчний дэд бүтцэд харилцан цохилт өгөх асуудлыг 30 хоногийн турш зогсоох Трампын саналыг Путин хүлээн авсан юм. Уг мэдээ гарсны дараа брент газрын тосны үнэ 51 цент буюу 0.7 хувиар буурч 70.56 ам.долларт хүрэв.
Украинд гал зогсоох талаар АНУ, Оросын талууд тохиролцоонд хүрсэн ч Оросын эрчим хүчний экспорт нэмэгдэх хүртэл хугацаа шаардагдана хэмээн шинжээчид онцлов. АНУ-ын Эрчим хүчний мэдээллийн агентлагийн зүгээс Орос улс 2024 онд өдөрт 9.2 сая торх түүхий газрын тос олборлосон нь 2022 оныхтой харьцуулахад буурсандүн. Уг үзүүлэлт 2016 онд 10.6 саяд буюу түүхэн дээд хэмжээнд хүрч байсан гэв.
Оросоос газрын тосны нийлүүлэлт нэмэгдэх магадлалтай төдийгзй Трампын ногдуулж буй татвараас үүдэлтэй эдийн засгийн болгоомжлол нь түүхий газрын тосны үнэд нөлөөлж байна. Татвар ногдуулах шийдвэр Америк, Канад, Мексикийн эдийн засгийн өсөлтийг сааруулж, дэлхийн эрчим хүчний эрэлтэд сөргөөр нөлөөлнө гэж Эдийн засгийн хамтын ажиллагаа, хөгжлийн байгууллага анхааруулав.
“Wood Mackenzie” фирмийн шинжээчид 2025 онд Брент маркийн газрын тосны үнэ дунджаар нэг торх нь 73 ам.доллар байна гэж урьдчилан тооцоолсон нь 2024 оныхоос долоон ам.доллараар буурсан дүн юм. Энэ сарын эхээр ОПЕК болон Оросын холбоотнууд багтдаг ОПЕК+ ирэх дөрөвдүгээр сард газрын тосны олборлолтоо нэмэгдүүлэхээр шийдвэрлэсэн байна.
Т.БАТСҮРЭН
Эх сурвалж: Ройтерс
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.