Тамирчдаа ч эгнээндээ нэгтгэдэггүй хөл бөмбөгийн холбоонд Ц.Анандбазар эзэн суух уу

Монголын хөл бөмбөгийн холбооны ээлжит бус их хурал ирэх долоо хоногт болохоор товлогдсон. Энэ хурлаар холбооны Ерөнхийлөгчийг сонгох сонгууль болох учиртай. Үүнтэй холбоотойгоор Монголын хөл бөмбөгийн тоглогчдын холбооноос мэдээлэл хийв. Мөн тэд зарим хууль бус үйл ажиллагааны эсрэг мэдэгдэл гаргаад буй.

Тодруулбал, "Монголын нийт хөл бөмбөгийн тамирчдыг албан ёсоор төлөөлдөг тоглогчдын холбооны зүгээс удахгүй болох хөл бөмбөгийн холбооны ерөнхийлөгчийн сонгуулийг эрс эсэргүүцэж байна.

Нэр дэвшигч Ц.Анандбазарыг хууль бусаар бүртгэсэн, шударга бус сонгуулийн хорооны үйл ажиллагааг эрс буруушааж тухайн нэр дэвшигчийн нэр дэвших эрхийг түдгэлзүүлэхийг шаардаж байна. Бид спортын ёс зүй, шударга байдал, ил тод байдлыг нэн тэргүүнд эрхэмлэдэг. Иймд Монголын Хөл бөмбөгийн Холбооны үндсэн дүрэм, сонгуулийн дүрэм болон холбогдох журмыг Олон Улсын Хөл бөмбөгийн Холбооны (FIFA) зарчмын дагуу шинэчлэн найруулж, тухайн шинэчилсэн дүрэм, журмын хүрээнд шинээр сонгууль зохион байгуулахыг шаардаж байна.

Монголын хөл бөмбөгийг улс төрөөс ангид, шударга, ил тод зарчмаар хөгжүүлж тамирчид, тоглогчдын эрх ашгийг хамгаалах нь бидний зорилго юм. Иймд бид хөл бөмбөгийн холбооноос зохион байгуулж буй бүх тэмцээн уралдаанд оролцохгүй болохыг мэдэгдэж байна" хэмээсэн.

Харин өнөөдөр хэвлэлийн хурал зарлаж энэ байр сууриа мөн л бататгалаа.

Тухайлбал, "Монголын хөл бөмбөгийн холбоо бол олон улсаас хамгийн өндөр санхүүжилт авдаг байгууллага. Гэтэл өнөөдөр өртэй сууж байна гэдгийг хараад гайхаж байна. Энэ нь Монголын хөл бөмбөгийн холбоо үеийн үед улстөрчдийн дамждаг шат болж ирсэнтэй холбоотой. Хамгийн өндөр санхүүжилтийг гаднаас авдаг хэр нь тамирчид асар ихээр хохирч байгааг бид дуугай өнгөрч болохгүй. Өнөөдөр шигшээ багийн чансаа ямар түвшинд байгааг бүгд харж байгаа. Олон улсын байгууллагаас ирж буй санхүүжилтийг яагаад зөв зарцуулж чадахгүй байна вэ. Өмнө нь ярьдаг байсан зүйл одоо ч давтагдсаар байна. Бид оройтоогүй байгаа дээрээ энэ байдлыг засах ёстой. Хөлбөмбөгийн холбооны дотоод асуудал хэрээс хэтэрсэн. Бид холбоондоо гишүүн болж оръё гэсэн ч зөвшөөрөөгүй. Тиймээс өнөөдөр хэвлэл мэдээллийнхэнд хандаж мэдээлэл хийлээ" гэсэн юм.

Хөгжүүлэх хэмжээний санхүүжилт гадаад, дотоодоос олддог ч хөгжихгүй байгаа шалтгааныг улс төрчид, тэдний хүрээлэлтэй холбон тайлбарлаж байна. Өөрөөр хэлбэл их хэмжээний санхүүжилт олгогддог ч зориулалтын бусаар зарцуулдаг. Үүнийг ам ташсан мэргэжлийн бус бүлэг хийдэг гэдгийг ч нуухгүй тодотгосоор буй. Иймээс дээрх холбооны залуус, салбарын учир мэдэх хүмүүс ийн салбараа хамгаалсаар. Хэрэв тэд ялагдвал дахиад л ухрах тул мэргэжлийн удирдлагын хүслэн болоод байгаа юм.

Ц.Анандбазарын хувьд мэргэжлийн бус. Түүнийг бизнесмен, улс төрч л гэж мэднэ. Өдийг хүртэл явж ирсэн зам нь ийм. Гэтэл хөндлөнгийн, огт хөгжөөгүй салбар руу хошуу дүрэх гээд байгаа нь ашиг сонирхлын зөрчилтэй гэж сэрдэгдээд байгаа юм.

Д.УЛСАА

Энэ мэдээнд өгөх таны үнэлгээ

Хуваалцаарай Жиргээрэй