"Антре Ресурс" Монголын талыг хүлээлгүйгээр Шивээ толгойн лицензийг "Оюу Толгой" руу шилжүүлэв

Канадын Ванкуверт төвтэй ““Entrée Resources” /Антре Ресурс/, “Оюу Толгой”-той хамтарсан компанийг 2008 онд байгуулж байсан юм.

Антре ресурс өөрсдийн ашгийн хувийг нарийн тодорхой тусгасан

"Оюу Толгой" ордын Хойд Хюго талбай дахь Шивээ Толгой болон Жавхлант уурхай нэртэй талбайн тусгай зөвшөөрлөөс хоёр компани хамтарч хувь эзэмшдэг бөгөөд 2004 онд “Айвенхоу Майнз” буюу одоогийн “Оюу Толгой” ХХК-тай ашиг хуваах гэрээ байгуулж Антрегийн талбай дахь геологийн судалгаа, хайгуулын ажлын зардалд "Туркойз хилл ресурс" компани 35.0 сая ам.долларын хөрөнгө оруулалт хийсэн. Гэрээнд 35 болон түүнээс дээш хэмжээний хөрөнгө оруулалт хийсэн тохиолдолд болон талбайн гүний 560 метрээс газрын гадарга хүртэлх баялгийн 70 хувь, дооших 80 хувийг эзэмшихээр тусгасан байдаг.

Уг хоёр тусгай зөвшөөрлийг хөрөнгө оруулалтын гэрээнд ганц л заалтаар тусгасан байдаг аж. Үүнийг Оюу Толгойн гэрээнээс харвал,

“15.7.8. Антре гоулд компанийн эзэмшиж буй 3148Х, 3150Х тоот хайгуулын тусгай зөвшөөрлийн талаар Айвенхоу Майнз Лимитед компанийн өнөөгийн эдэлж буй эрхийг гэрээгээр баталгаажуулах, эсхүл холбогдох эрхийг Хөрөнгө оруулагчид шилжүүлж /ийнхүү шилжүүлсний дараа Засгийн газар уг эрхийн 34 /гучин дөрөв/ хувийг эзэмшинэ/ улмаар Засгийн газар уг хайгуулын тусгай зөвшөөрлүүдийн хугацаа дуусахаас өмнө ашиглалтын тусгай зөвшөөрөл болгох” хэмээн заасан байдаг.

"Оюу Толгой"-н гэрээнд Монголын тал зэсээ борлуулах эрхгүй атал Антре-д өөрөө авч борлуулах эрхтэй гэж тусгажээ

Өөрөөр хэлбэл “Антре Гоулд”-ын 80 хувийг “Оюу Толгой”, Монголын Засгийн газар үүний 34 хувийг эзэмшдэг гэсэн үг юм.

2025 оны эхний улиралд багтаан "Антре Ресурс" 100 хувийн эзэмшлийн “Шивээ толгой” тусгай зөвшөөрлийнхөө дийлэнх буюу 80 хувийг “Оюу Толгой” компанид амжилттай шилжүүлсэн гэдгээ тайландаа дурджээ.

“Шивээ толгой” болон “Жавхлант” тусгай зөвшөөрлүүдээ "Антрэ ресурс болон Оюу Толгой” хамтарсан компанид шилжүүлэх арбитрын шийдвэр гарсны дагуу лиценз шилжүүлэх ажил үргэлжилсээр байгаа гэдгийг тодотгожээ.

Өнөөдрийн байдлаар Монголын тал "Оюу Толгой" орд дээр 34 хувь эзэмшиж байгаа боловч 34 хувьд ноогдох зэсийн баяжмалаа өөрсдөө борлуулах эрхгүй байдаг бөгөөд харин “Антре ресурс-т ногдох зэсийн баяжмалын бүтээгдэхүүнээ өөрөө авч, борлуулах бүрэн эрхийг гэрээгээр олгосон байдаг аж.

Өөрөөр хэлбэл "Антре ресурс"-т ашигтай заалтууд уг гэрээнд тусгагдсан бөгөөд Монголын талын хувь эзэмшилд ашиг хүртэх боломжийг нь хумьсан байна.

Т.БАТСҮРЭН

Энэ мэдээнд өгөх таны үнэлгээ

Хуваалцаарай Жиргээрэй