Зардлыг 50 хувь бууруулсан ч менежментийн гэрээг шинээр байгуулах ёстой

Рио Тинто компанийн төлөөллүүд Монголд ирж, манай Засгийн газрын төлөөллүүд буюу УИХ-ын 120-р тогтоолын дагуу Ерөнхий сайдын захирамжаар байгуулагдсан ажлын хэсгийнхэнтэй хэлэлцээ хийж буй.

Эхний ээлжид менежментийн зардлыг 50 хувь бууруулах дээр талууд тохиролцсон гэдэг нь олон нийтэд ил болсон.

Үүнийг тайлбарлавал,

Оюу Толгой төслийн хөрөнгө оруулалтыг анх дөрвөн тэрбум орчим ам.доллар гэж тооцоолж байсан ч далд уурхайн бүтээн байгуулалт сунжирч, улмаар хөрөнгө оруулалтын дүн 20 гаруй тэрбум ам.доллар болсон. Үүний 18 тэрбум ам.долларыг хувь нийлүүлэгчдийн зүгээс гаргасан болон зээл хэлбэрээр, ингэхдээ 50 гаруй хувийн нийлмэл хүүтэй зээлсэн нь олон улсын стандартыг давсан өндөр буюу манай улсад ирэх өгөөж багасахад нөлөөлөх гол хүчин зүйл болдог.

Хэдийгээр олон улсад уул уурхайн томоохон төслүүдэд ийм төрлийн зээл авах нь хэвийн боловч зээлийн зардлын хэмжээ нийт төсвийн 50 орчим хувийг эзэлж байгаа нь том асуудал.

Энд төслийн менежментийн төлбөрийн хэмжээ буюу Рио Тинто компанийн удирдлагын төлбөр хөрөнгө оруулалт болон үйл ажиллагааны зардлын 6 орчим хувийг эзэлдэг. Төслийн зардал нэмэгдэх тусам менежментийн төлбөр өсдөг зарчмаар Рио Тинто зардлаа тэлэх бүрт Монголын төлөх менежментийн зардал өссөөр байна гэсэн үг.

Ингээд бид энэ зардлын төлбөрийг зээлээр авчихсан. Авахдаа 11.3 хувийн зээлийн хүү төлдөг. Өөрөөр хэлбэл төслийн нийт хугацааны зардлыг Монгол Улс эзэмшлийнхээ хуь хэмжээний дагуу хариуцаж, төлөх учиртай бөгөөд одоогийн бидний төлж буй менежментийн зардлын төлбөр өндөр байгаа нь бидний хүртэх өгөөжийг хойш чангааж ирсэн.

Иймээс үүн дээр Рио Тинто талтай хэлэлцээний ширээний ард сууж, харилцан ойлголцолд хүрэхээр ажиллаж буй.

Гэхдээ яг ямар байдлаар ойлголцолд хүрснийг Ерөнхий сайд Н.Учрал нарийн тайлбарлалгүй, сошиалаар шууд мэдээлэл цацсан. Өмнө нь буюу гуравдугаар сард менежментийн төлбөрийг бууруулахдаа Монголын талаас 50 хувь бууруулах санал тавихад Рио Тинто тал өөрөөр тайлбарлаж, улмаар манай талын хүртэх өгөөж, зардлын дүнд огтын өөрчлөлтгүй хувилбар танилцуулсныг хүлээж аваагүй.

Ингэхээр менежментийн зардлыг дахин үнэлж, зөвшөөрөгдөх суурь зардлыг 50 хувь бууруулсан уу гэдэг асуулт гарч ирнэ. Хэлэлцээний эцсийн шийдвэр гараагүй, талууд уг хэлэлцээг албан ёсны бичиг цаас болгоогүй байхад Ерөнхий сайд нь хэлэлцээний дундаас үр дүнг мэдээлчихсэн нь одоогийн хувилбарыг хүчин төгөлдөр гээд батлачихснаас ялгаагүй юм.

Уг нь менежментийн гэрээг шинээр байгуулж, Оюу Толгой компанийн засаглалыг үр өгөөжтэй болгох ажлыг албажуулах ёстой.

Удалгүй талууд хэлэлцээг олон нийтэд нээлттэйгээр танилцуулах биз ээ.

Т.БАТСҮРЭН

Холбоотой агуулгыг хавсаргаж байна

Өөрийн сэтгэгдлээ илэрхийл

Share Tweet