УДШ-ийн Ерөнхий шүүгч Д.Ганзоригийн бүрэн эрх өнөөдөр дуусаж байна

Улсын дээд шүүхийн Ерөнхий шүүгч Д.Ганзоригийн бүрэн эрх өнөөдөр |2026.06.02| дууслаа.

Д.Ганзоригийн хувьд, /2013.04.12/-нд Монгол Улсын Ерөнхийлөгч Ц.Элбэгдоржийн 47 дугаар зарлигаар Улсын дээд шүүхийн шүүгчээр томилогдож байлаа. Улмаар Х.Баттулга Ерөнхийлөгч байхдаа буюу /2020.06.02/-нд зарлиг гаргаж, Улсын дээд шүүхийн Ерөнхий шүүгчээр томилсон. УДШ-ийн Ерөнхий шүүгчийн бүрэн эрхийн хугацаа зургаан жил. 

Улиран томилогдож болох эсэх маргаан ҮХЦ хүртэл яригдаж, өнгөрсөн лхагва гарагт ҮХЦ дэнсэлж УДШ-ийн Ерөнхий шүүгчийг улираан томилох эрх зүйн орчин үүсгэчихсэн.

Тодруулбал, Монгол Улсын Үндсэн хуулийн цэцийн 2026 оны 05 дугаар сарын 27-ны өдрийн их суудлын хуралдаанаар Улсын Их Хурлаас 2021 оны 01 дүгээр сарын 15-ны өдөр баталсан Монгол Улсын шүүхийн тухай хуулийн 36 дугаар зүйлийн 36.7 дахь хэсгийн “Улсын дээд шүүхийн Ерөнхий шүүгчийг Улсын дээд шүүх санал болгосноос хойш Ерөнхийлөгч 14 хоногийн дотор зургаан жилийн хугацаагаар, зөвхөн нэг удаа томилно.” гэсэн заалтын “… зөвхөн нэг удаа …” гэсэн хэсэг нь Монгол Улсын Үндсэн хуулийн цэцийн 2016 оны 12 дугаар дүгнэлтийн дагуу хүчингүй болсон зохицуулалтыг агуулгаар нь дахин сэргээсэн гэж үзэн Монгол Улсын шүүхийн тухай хуулийн 36 дугаар зүйлийн 36.7 дахь хэсгийн “… зөвхөн нэг удаа …” гэсэн хэсгийг хүчингүй болгон шийдвэрлэж, Үндсэн хуулийн цэцийн 2026 оны 03 дугаар тогтоол гаргав.

Д.Ганзоригийг УДШ-ийн Ерөнхий шүүгчээр Х.Баттулга томилсон. Өдгөө улираах эрх нь Ерөнхийлөгч У.Хүрэлсүхэд буй.

"Арай ч улираахгүй байлгүй дээ. Дахин ажиллая гэхээс Д.Ганзориг ичих байх. 12 жил ажиллах юм бол шүүхийн хараат бус байдал алдагдана, ашиг сонирхлын зөрчил болно" хэмээн УИХ-ын гишүүд чуулганы үеэр шүүмжилсэн. Мөн АН-ын бүлгээс "Шударга бусын хонгилыг ҮХЦ, УДШ-ээс эхэлж нураах ёстой юм байна. Цаашилбал Ерөнхийлөгчид хариуцлага тооцох хэрэгтэй. Энэ улсад хүний эрх, шударга ёс алдагдсан. Улс төрийн хувьд У.Хүрэлсүхийн дохио зангаагаар ҮХЦ удаа дараалан улс төрийн шийдвэр гаргаж байна. Шүүх шударга бус байна. Үүний төлөө АН тууштай тэмцэнэ. Улс төрийн тэмцэл эхлүүлэхэд бэлэн байна" хэмээн мэдэгдээд байгаа билээ.

Одоо Дээд шүүхээс дараагийн Ерөнхий шүүгчийн нэрийг тодруулан Ерөнхийлөгчид санал болгох бөгөөд Ерөнхийлөгч зөвшөөрч зарлиг буулгасан тохиолдолд томилгоо албажна.

Д.Ганзориг 1976 онд Улаанбаатар хотод төрсөн.

• 1994 онд Өвөрхангай аймгийн нэгдүгээр 10 жилийн дунд сургууль,1998 онд МУИС-ийн Хууль зүйн дээд сургууль төгссөн, 2017 онд  хууль зүйн ухааны магистр хамгаалсан.
• 1999-2004 онд Сонгинохайрхан дүүргийн шүүхэд Шүүгчийн туслах, шүүх хуралдааны нарийн бичгийн дарга
• 2004-2013 онд Сонгинохайрхан дүүргийн шүүхэд шүүгч
• 2013 оны дөрөвдүгээр сараас Улсын Дээд шүүхийн шүүгчээр томилогдон ажиллаж байна.
• 2020 оны  тавдугаар сард Монголын Шүүгчдийн холбооны тэргүүнээр сонгогдсон.
• 2020 оны зургаадугаар сарын 02-нд УДШ-ийн Ерөнхий шүүгчээр томилогдсон.

Ташрамд дурдахад,

• ҮХЦ-ийн дарга Г.Баясгалангийн бүрэн эрхийн хугацаа дуусаад 362 хоног өнгөрч байна.
• ТЕГ-ын дарга П.Одонбаатарын бүрэн эрхийн хугацаа яг гурван сарын дараа дуусна.

О.ОНОН

Өөрийн сэтгэгдлээ илэрхийл

Share Tweet