Зүүн Азийн Супер Лиг буюу "EASL"-ийн 2026-2027 оны шинэ улирлын хэсгийн шатны сугалаа албан ёсоор гарчээ. Тус лигт манай улсаас Монголын үндэсний дээд лигийн есөн удаагийн аварга, "BCL Asia East" тэмцээний аварга, "BCL Asia" тэмцээний хүрэл медалийн эзэд Хасын хүлэгүүд баг тоглох юм. Тэд энэ улиралд "А" хэсэгт багтсан бөгөөд Азийн шилдэг 12 клуб гурван хэсэгт хуваагдан өрсөлдөнө.
Тухайлбал, "А" хэсэгт:
- Улаанбаатар Хас Бронкос (Монгол улс)
- Алварк Токио (Япон улс )
- Гоянг Соно Скайганнерс (Өмнөд Солонгос улс)
- Тайганг Гост Хокс (Тайвань улс ) зэрэг багууд багтжээ.
Сонирхолтой нь Хүлэгүүдтэй нэг хэсэгт таарсан Тайваний "TSG Ghosthawks" багт Монгол Улсын шигшээ багийн тамирчин Д.Баясгалан тоглох юм. Ингэснээр шигшээ багийн хамтрагчид өрсөлдөгчийн дүрээр "тулах" болж байна. Тус лигийн шинэ улирал ирэх сарын 3-нд буюу бямба гарагт Филиппиний Себу хотод албан ёсоор эхэлнэ. Хэсгийн тоглолтуудын хуваарийг удахгүй зарлах аж.
Б.САНАА
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.