Үндэслэлүүд: Э.Цэндбаатар, З.Шинэчагтга нарын хэн нь ялах вэ

Хэн ялах бол?

Цэндээ ялна...

Үгүй Шинээ ялна...

Цэндээ, Шинээ, Цэндээ, Шинээ... гэсэн маргаан тулаан сонирхогчдын дунд нэлээдгүй хэд хоног өрнөлөө. Тулалдах тамирчин болох МУГТ Э.Цэндбаатар, З.Шинэчагтга нарын маркетинг сайн байлаа, алга ташья. Арга ч үгүй биз Монголын анхны хагас тэрбум төгрөг давсан бооцоо бүхий тулаан хийх гэж байгаа залуус маркетингаа ингэж хийхгүй бол өөр яалтай билээ.

Тэд нэгнийхээ ар гэр, хувийн амьдрал руу орж хор шараа малталцсангүй. Харин ч тулааны ур чадвар, бяр хэмжээгээ л ярьж байна. Ёстой онц дүн тавъя. Цааш цаашдаа Монгол Улсад дэлхийн хэмжээний шоу болох анхны алхам тавигдлаа ч гэж хэлж болохуйц.

Тэгвэл өнөөдөр /2022.09.09/ хоёр тамирчны хэн нь ялахыг ур чадвар, болон давуу талтай нь харьцуулан бодитой нүдээр харж таамаглах гээд  үзье.

-МЭРГЭЖЛИЙН БОКСООР ӨРСӨЛДӨЖ БАЙГАА ТАЛААС НЬ ХАРВАЛ Э.ЦЭНДБААТАР ЯЛНА-

Э.Цэндбаатар, З.Шинэчагтга нарын хувьд хоёулаа бокс суурьтай тамирчин хэдий ч өнөөгийн кареартаа хүрсэн спорт нь тэс ондоо. МУГТ Э.Цэндбаатарын хувьд өөрийн өрсөлддөг төрлөөрөө тулаанд дуудсан нь том давуу тал болж таарч байна. Дээрээс нь боксын ДАШТ-ий хүрэл медальтай, хоёр олимпод оролцсон. Бэлтгэл, форм сайтай байгаа гэдэг утгаараа тэр ялах магадлал тун чиг өндөр.

Мөн өмнө нь тэд нэг удаа сонирхогчдын боксоор өрсөлдөхөд Э.Цэндбаатар ялж байсан. Э.Цэндбаатарын мэргэжлийн боксоор хийсэн сүүлийн тулаанууд гаргасан амжилт талаас нь харвал тэр ялах болов уу. Мөн гурван өдрийн өмнө  манай eguur.mn сайтад өгсөн ярилцлагадаа “Түүнд зориулсан галзуу цохиолт надад бий. З.Шинэчагтга надаас өндөр гэдэг утгаараа түүний сул тал болох болно. Би өндөр өрсөлдөгчөө амархан ялдаг” хэмээж байсан юм. Уг ярилцлагыг энд дарж уншина уу.

Үүнийг үгүйсгэх аргагүй. Учир нь хамгийн сүүлд мэргэжлийн боксын WBA холбооны Ази тивийн аваргын бүсийн төлөө Аслан Кабисовтой тулалдаж ялсан. Өрсөлдөгч тамирчин нь түүнээс тохой өндөр байсан хэдий ч буулган авсан билээ.

Хоёр тамирчныг жин нэмж хассан талаас нь харьцуулж үзвэл Э.Цэндбаатар султай. Учир нь тэр 66 кг-аас дөрвөн кг нэмж тулаанд орж буй. Энэ утгаараа хөдөлгөөн удааширдаг, амархан цуцчих гээд байдаг нигууртай.

-СЭТГЭЛ ЗҮЙН БАЙДЛЫН ХУВЬД З.ШИНЭЧАГТГА ЯЛНА-

Хоёр тамирчны тулааныг энэ өдрийн тэнгэр л мэдэх байх. Гэхдээ тулаанаас хоёр, гуравхан хоногийн өмнө З.Шинэчагтга, Э.Цэндбаатар нартай хоёулантай нь ярилцсаны хувьд сэтгэл зүйн байдлыг өөрийн хэмжээнд дүгнэн бичих эрхийг “өөртөө” олгоё. З.Шинэчагтгын ярилцлагыг энд дарж уншина уу.

Хэдий мэргэжлийн боксоор өрсөлдөж буй хэдий ч “Ширэн бээлий”, “Zorky’s MMA” клубийн тамирчин З.Шинэчагтга бол тийм ч зөөлөн боорцог биш. Сэтгэл зүйн хувьд тогтвортой, олон тулаанд ур чадвар, хурд хүч, авхаалж самбаагаараа өрсөлдөгч тамирчнаа нам цохидог хурц ааш авираараа өрсөлдөгчийнхөө сэтгэл зүйг унагаад нэгэн.

Тэрбээр юунаас ч айлгүйгээр Э.Цэндбаатар өөрийн төрлөөр тулаанд дуудаж байхад хүлээж авсан нь өрсөлдөгч тамирчныхаа сэтгэл зүйд хүчтэй дарамт болсон гэж хэлж болно. Учир нь Э.Цэндбаатар хожвол “Өөрийн төрлөөрөө дуудаад яллаа. Одоо Шинээгийн төрлөөр үзээд барахгүй” гэх яриа төдий зүйл дэгдээд л дуусна. Үүнийг ч З.Шинэчагтга овжин ашиглаж хэвлэлийн хурлын үеэр олонтоо хэлээд байгаа юм. Харин З.Шинэчагтга ялагдвал дараагийн удаа өөрийн төрлөөрөө дуудаж “нэг минут ч тэсгээхгүй” гэдгээ хэлсэн. Энэ ч үнэний ортой. Учир нь чоно үүрэндээ өлзийтэй гэдэг биз дээ.

Ямартай ч Э.Цэндбаатарын сэтгэл зүй хөвсөлзүүр, З.Шинэчагтгынх маш тогтвортой бясалгагч шиг байсныг нуух аргагүй. Тулаанд биеийн хүчнээс илүү сэтгэл зүй нөлөөлдөг гэдэг утгаараа З.Шинэчагтга ялах болов уу.

ТЭМДЭГЛЭЛ: Ямартай ч үзэгч олныг олон хоног хүлээлгэсэн гал авалцсан тулаан өнөөдөр болно. Хүмүүс суудлаасаа өндөлзөж үзэх шинжтэй. Гэхдээ энэ тулаан яаж ч өндөрлөсөн манай улсын нэрийг өндөрт өргөж яваа хоёр тамирчны карьер цаашдаа үргэлжлэх л болно.

Энэ мэдээнд өгөх таны үнэлгээ

Хуваалцаарай Жиргээрэй