Хөшигний ард: С.Баярцогт У.Хүрэлсүхэд бүрэн эрхийг нь сунгаж өгөхөөр "амлажээ"

АН-ын Тэргүүн дэд дарга С.Баярцогт Ерөнхийлөгч У.Хүрэлсүхтэй хачин ойр нөхөрлөж, олон удаагийн уулзалт хийдэг болжээ. Төрийн тэргүүнтэй С.Баярцогт ингэж ойр нөхөрлөхийн тулд "Ирэх парламентын хугацаанд бүрэн эрхийг тань сунгах |дахин нэр дэвших| боломжийг Үндсэн хуулиар үүсгэж өгье" гэж амласан гэх. Тэдэнд ийн нэгдэх нь хэн хэнд нь ямар ашигтай вэ.

У.Хүрэлсүх

У.Хүрэлсүхийн хувь улс төрчийн намтрыг харахад, маш хурдан тактикаа өөрчлөөд, хэрэгтэй үедээ улс төрд ороод ирдэг. Бас нэр төртэйгөөр гараад явчихдаг амбицаар өөдөө өгсөх стратеги хэрэгжүүлдэг. Углааштай ээжээр шалтаг хийж, ЗГ-ын тэргүүний суудлаа өгснөө Ерөнхийлөгчид нэр дэвшсэн. УИХ-ын гишүүнээс ч татгалзаж байв. Хэнтийд Д.Гантулгад нэр дэвших мандатаа өгснийхөө хариуд Шадар сайд болоод, ЗГ-аа дотроос нь задалж, өөрөө тэргүүнээр түүх зэргээр. Яг өөр лүүгээ чиглэсэн ийм тоглолтууд хийдэг.

Ингэж ахиж ирсэн У.Хүрэлсүхийг намынх нь залуус төрийн тэргүүнд дэвшүүлэнгээ улс төрөөс бүр мөсөн явуулахаар тооцоод байв. Үндсэн хуулиндаа Ерөнхийлөгчийг зургаан жилийн хугацаатай, нэг удаа сонгогдох заалтаа ч тэд иймэрхүү алсын санаатайгаар суулгаж байв. Гэвч У.Хүрэлсүх угийн тэргүүлэгч амбицаа яг энэ хүрээд алдахыг хүссэнгүй.

Тэр "Эрдэнэт үйлдвэр"-т өөрийн найзаа аваачиж, "Эрдэнэс Тавантолгойд Хэнтийн хүнээ томилж, том өмчүүдээ атгав. ЗГ-таа шууд 600 тэрбумаар төсвөө данхайлгах чиглэл өгөөд, ахмадын тэтгэврийг нэмж, "Тэрбум мод", "Хүсний хувьсгал" зэрэг аж ахуйн асар их ажлууд руу оров. ҮАБ-аа тэр энэ үедээ хамгийн сайн барьж, гадаад орчинд сайхан имидж үзүүлж, урагштай ажиллаж байна.

Улмаар хувь улс төрчийнхөө рейтингэд үлэмж ихээр анхаарах болов. Уг нь дахин Ерөнхийлөгчид нэр дэвших боломжгүй хүнд одоо нэг их рейтингийн араас хөөцөлдөх шаардлага үгүй баймаар. Гэтэл эсрэгээрээ тэр улам вакумжиж, АН, МАН дамнасан УИХ-ын гишүүдтэй болж, улмаар ирэх сонгуулийн үр дүнгээр байгуулагдах ЗГ-ын бүтцийн төлөө шатраа нүүж буй. Энэ нь их хичээл зүтгэл нь, түүний эрх мэдлээ удаан барих амбицтай холбоотой гэж харагдсаар.

Тиймээс ч С.Баярцогтын бүрэн эрхийг нь сунгаж өгнө гэсэн амлалтаар, түүнтэй нэгдэж, баруун солгойгүй улс төрийн өрөг өрж эхэлсэн үү гэх агуулга анхаарал татаж байна. Энэ өндөрт ирсэн хойноо тэр хэсэг саатмаар, ер Ерөнхийлөгчөөс хойших хугацаандаа улс төрөөс ангид өөрийгөө төсөөлж чадахгүй яваа У.Хүрэлсүхэд С.Баярцогт яг хэрэгтэй саналыг нь тавьсан ч байж болох.

С.Баярцогт

Гурван шатны шүүхээр Оюутолгой төслөөс үндсэндээ авлига авсан нь нотлогдоод байсан С.Баярцогтыг охиных нь хуримнаар хөлөмцүү томчууд өршөөлгөж өгөх амлалт өгөөд, түүнийгээ биелүүлсэн гэгддэг. Эдүгээ Дээд шүүхийн түүнд хамаарах хэргийг хэрэгсэхгүй болгосон асуудлаар УИХ-ын түвшинд нээлттэй сонсгол явуулахаар гарын үсэг зурж эхлүүлсэн талаар яригдаж буй.

Одоогоор 6-8 гишүүн зурсан гэгдэх цаас үнэндээ хэний бланк дээр үйлдэгдсэн нь ч тодорхойгүй. Барагцаалж бодоход, Ерөнхийлөгч асан Х.Баттулгатай ойр байдаг гишүүдээр, эсвэл Ерөнхий сайд л.Оюун-Эрдэнийн хатгаасаар гарын үсэг зурах ажил эхэлсэн ч зогссон байж болох логик харагдана. Үүн дээр Ерөнхийлөгч У.Хүрэлсүхийн хөшигний ар дахь хориглолт гишүүдийг эмээлгэж, гарын үсгийн тоог нэмэгдүүлэхгүй царцаасан байж болох хувилбартай.

С.Баярцогтод наанадаж л дээрх бичгээ зогсоолгохын тулд одоо хамгийн хүчтэй буй дүрийг бараадахаас аргагүй. Түүнд нь МАН-ын угшилтай төрийн тэргүүний хувилбар нийцэх.

Нөгөө талаар Л.Гантөмөртэй зэрэгцээ шугмаар намынхаа мандат, жагсаалтыг хуваарилах эрхийг С.Баярцогт атгасан. Л.Гантөмөр өөрийгөө шүдгүй арслангаар зарлаж, С.Баярцогтыг өргөх болсон шалтгааны ард мэдээж Ерөнхийлөгч асан Ц.Элбэгдорж, ТЕГ-ын дарга асан Б.Хурц, АПУ, Таванбогд, Эм Си Эс дамнасан бизнес бүлэглэлүүд байв. Эдгээрийн төлөөлөл ирэх парламентад ахиухан суухын тулд МАН-ын мандат ба жагсаалт дээр нөлөө өндөр оролцох У.Хүрэлсүхийг түшсэн логик харагдана.

АН дотор одоо Х.Баттулгын МоАХ хүчээ авах уу. С.Баярцогтоор өнгөлөн далдлалт хийсэн бүлэглэлүүд нь хүчтэй байх уу гэдэг өрсөлдөөн өрнөж байна. Тэд ийм үед МАН-той тойргийн тохироо хийх, замаар хүчтэй ба хүчгүй улсуудаа сөөлжин байршуулах арга хэрэглэж байж л, төлөөллүүдээ арай олноор нь урагш явуулах боломжтой. Ийм гарцаар сийрэг толгойтой С.Баярцогт Ерөнхийлөгч У.Хүрэлсүхийг жим гаргагчаар түшиж, өнөөх том амлалтаа түүнд өгсөн байж болох юм.

Энэ агуулгаарх төстэй контент

Энэ мэдээнд өгөх таны үнэлгээ

Хуваалцаарай Жиргээрэй