Демаркус Казинс: Талбай, шийд, хөгжөөн дэмжигчид гээд бүгд соньхон байлаа

NBA-д өөрийн авьяас чадвараа гайхуулж байсан 34 настай Демаркус Казинс монголд анхны талбайн тоглолтоо /2025.03.10/ өчигдөр хийлээ.

Сэлэнгэ Бодонс багтай энэ улирлын лиг дуустал гэрээлснээр тус багийг аваргын цом өргүүлэхийн төлөө зорьж буй. Өчигдөр BCH Knights багтай поэй-оффын эхний тоглолтоо хийж 77/66 гэх оноогоор Сэлэнгэ Бодонс тэргүүлэв.

Талбай дээр ширүүхэн өрсөлдөөн дүүрэн байсан бөгөөд Демаркус Казинст ч үзэгчид болон талбай сонихон байх нь аргагүй. Ийнхүү түүнийг сэтгэгдлийг хуваалцаж байна.

-Монгол дахь эхний тоглолтоо хийж, ялалт байгууллаа. Та сэтгэгдлээсээ хуваалцвал?

-Бүх зүйл сонин байлаа. Шийд, талбай, хөгжөөн дэмжигчид гээд бүгд өөр байлаа. Анхны талбай нэлээн сандралтай ч байлаа. Энэ талбай болон хөгжөөн дэмжигчдэдээ дасчихвал цаашдаа илүү гал халуун тоглолтуудыг үзүүлэх болно.

-BCH Knights багийг буулгаж авах тактик юу байсан бэ?

-Тэд маш сайн өрсөлдөгчид байлаа. Бидний хувьд илүү ойлголцсон байж магадгүй. Бөмбөг дамжуулалт, хугацаа алдахгүй хэн шидэх вэ зэргээр сайн ойлголцсон гэж бодож байна.

-Багийн тамирчдыг бэлтгэл хэр санагдаж байна вэ?

-Ирснээснээ хойш хэд хэдэн бэлтгэлд хамт орсон. Мөн эхний тоглолтдоо ч ялалт байгууллаа. Багийнхантайгаа бэлтгэл сургуулилтаа дахиад сайн хийгээд ерөнхий формдоо орох хэрэгтэй байна. Манай багийнхан ч чадварлаг тамирчидтай юм байна.

-Аваргын цом хэр ойрхон санагдаж байна вэ?

-Би анх ирэхдээ л хэлсэн. Сэлэнгэ Бодонс багтаа аваргын цом өргүүлэхийн төлөө хичээнэ. Чадах бүхнээ хийнэ. Бид цаашдаа энэ талбайд гайхалтай, гал халуун тоглолтуудыг үзүүлнэ.

-Монголд ирсэн сэтгэгдэл?

-Би энд байгаа дээрээ бүхий л зүйлийг хиймээр байна. Нэг ч өдрийг тайван өнгөрүүлэхгүй гэж бодож байна

Б.НОМТ

Энэ мэдээнд өгөх таны үнэлгээ

Хуваалцаарай Жиргээрэй