₮3 тэрбумын барьцаа өгөөд гадагш зугтсан Д.Эрдэнэбилэг 4.2 жилийн дараа эх орондоо ирэв

Гадагш ниссэн шувууд эргэн ирж, "Би буруугүй, шалгаад юу ч илрээгүй" гэх үгтэй дээр тухалдаг болох нь. Ерөнхийлөгч асан Ц.Элбэгдорж наадмын өмнөхөн эх орондоо ирсэн. Өнгөндөө Төрийн далбааны өдрийн хүндэтгэлийн ёслол, Эрдэнэтийн 50 жилийн ойн арга хэмжээнд оролцов. Энэ үест далд тохироогоо хийснээр, Сингапурт 4.2 жил бүгсэн "Сахал" Д.Эрдэнэбилэг хоёр хоногийн өмнө Монголын хилээр орж ирэв.

-Д.Эрдэнэбилэгийн ирсэн зориг | тохироо-

9 жилийн өмнөөс мөрдөгдөж, 3 жилийн өмнө шүүхэд шилжсэн Эрдэнэт үйлдвэрийн 49 хувийн гэх хэргийн загалмайлсан эцэг гэгддэг хүн бол яах аргагүй сахал Б.Эрдэнэбилэг.

Түүний хувьд гурван үйлдвэрийг хууль бусаар авсан талаар найман жилийн турш яригдаж, Засгийн газар тэдний мөнгө хүүлсэн, угаасан схемийг ээлж дараалан танилцуулсаар ирсэн. Гэвч түүнийг хоёр удаа сүр дуулиантайгаар цагдан хориод сулласнаар өөрөөр яллаж чадалгүй өдий хүрэв.

Хамгийн сүүлд эрүүл мэндийн шалтгаанаар гадаад явахдаа барьцаа болгож тавьсан гурван тэрбумыг нь улсын орлого болгож, шүүх түүнд цагдан хорих таслан сэргийлэх арга хэмжээг авч байлаа. Үүнээс хойш Монголд ирэх чимээ дуулдалгүй, АТГ-ын "шувуу ажиллагаа" ч дийлээгүй. Харин зориг гарган ирсэн шалтгаан нь Ц.Элбэгдоржтой холбогдож байна.

Наадмын өмнө Ц.Элбэгдорж эх орондоо ирснээр хилийн дээс даван 10 жил болсон Ч.Сайханбилэг, Сингапурт 4.2 жил бүгсэн Д.Эрдэнэбилэг нар нааш хөдлөх чиг гарав.

Ц.Элбэгдорж бол Д.Эрдэнэбилэгийг "Эрдэнэт үйлдвэр"-ийг Монголд хувийн хэвшлийн хөрөнгөөр оруулж ирэхэд улс төрийн бүхий л дэмжлэгийг нь хийж өгч, Ч.Сайханбилэгээр гүйцэтгүүлсэн нэгэн юм. Тэгвэл Ерөнхийлөгч асан Ц.Элбэгдорж Монголд ирж, хөшигний ард энэ өдрүүдэд ямар тохироо хийсэн бэ.

Нэг. "Эрдэнэт үйлдвэр"-ийн 20 хувийг Д.Эрдэнэбилэгт өгч, 400 сая ам.долларын хэлцлийг хаах хувилбар

Хоёр. Д.Эрдэнэбилэг нарын хэргийг шүүхээр эцэслэж, торгуулийн шийтгэлээр хаах санал

Гурав. Төмөртэйн ордыг эзэмшдэг "Дархан төмөрлөгийн үйлдвэр"-ийг Д.Эрдэнэбилэгт шилжүүлэх хувилбар

Дээрх агуулгын дэлгэрэнгүйг дараах линкээс унших боломжтой

-Түүнийг хүлээж буй холбогдсон хэрэг нь, шүүх хурал-

Хамгийн сүүлд |2025.04.10|-нд Эрдэнэт үйлдвэрийн 49 хувийн гэх хэргийг нийслэлийн Эрүүгийн хэргийн давж заалдах шатны шүүхэд хэлэлцсэн. Энэ үеэр шүүхээс "Монгол Улсад байхгүй эрэн сурвалжилж байгаа яллагдагчийг байлцуулахгүйгээр хэргийг нь эцэслэн шийдвэрлэх хууль зүйн үндэслэлгүй тул бусад яллагдагч нарт холбогдох хэргийг тусгаарлан шийдвэрлэх нь хуульд нийцнэ" хэмээн дүгнэсэн.

Ингэхдээ "тухайн үед энэ хэрэгт холбогдсон эрх бүхий байгууллагаас гадаад руу оргон зайлсан улс төрийн нөлөө бүхий этгээдийг барих ажиллагаа явагдаж, зарим үр дүн гарсан учир шүүх найдаж, хамтад нь шүүх шийдвэр гаргаж байсан. Гэтэл одоогоор ямар ч үр дүнд хүрээгүй учир нэгтгэх гэхээр хэрэг шийдвэрлэлт удааширч, холбогдох зарим нэг хүн гадагшаа хил давж явсан учир салган шийдвэрлэх нь зөв" гэж үзсэн юм.

Одоо түүнийг холбогдсон хэрэг нь, тусгаарлан хэлэлцэхээр шийдвэрлэсэн шүүх хурал нь хүлээж байна.

Д.Эрдэнэбилэгийг Эрүүгийн хуулийн тусгай ангийн 22.1 дүгээр зүйлийн 1 дэх хэсэгт /Эрх мэдэл, албан тушаалын байдлаа урвуулан ашиглах/ заасан гэмт хэрэгт холбогдуулан яллагдагчаар татсан юм.

22.1 дүгээр зүйл.Эрх мэдэл, албан тушаалын байдлаа урвуулан ашиглах

1.Нийтийн албан тушаалтан албан үүрэг, бүрэн эрх, албан тушаалын байдлаа урвуулан ашиглаж, эсхүл зориуд хэрэгжүүлэхгүй байж өөртөө, эсхүл бусдад давуу байдал бий болгосон бол нийтийн албанд ажиллах эрхийг хоёр жилээс таван жил хүртэл хугацаагаар хасаж нэг жилээс таван жил хүртэл хугацаагаар зорчих эрхийг хязгаарлах, эсхүл нэг жилээс таван жил хүртэл хугацаагаар хорих ял шийтгэнэ.

Өөрийн сэтгэгдлээ илэрхийл

Share Tweet