ХӨШИГНИЙ АРД: Хэргээ тусгаарлуулах нэрээр ялаас ӨРШӨӨГДСӨН эрхмүүд

Энэ онд Ерөнхий сайд асан С.Баяр, М.Энхсайхан, Ж.Эрдэнэбат, УИХ-ын гишүүн асан Д.Эрдэнэбат, Н.Номтойбаяр, сайд асан С.Баярцогт, Б.Болор, ТЕГ-ын дарга асан Б.Хурц гэхчлэн улстөрийн хүрээний томчууд ял авч, толгой дарааллан хорих анги руу ачигдсан. Хөшигний ард яригддагаар, өнгөрсөн зун томоохон улс төрийн чанартай хэргүүдийг шүүхээр шийдвэрлэхийн тулд шүүгчид амралтгүй ажилласөн бөгөөд төрд ажилласан түүхтэй эрхмүүдэд толгой дараалан ял оноосон билээ. Уг хоморгон дундаас эвтэйхэн байдлаар сугарч, ялгүй үлдсэн төрд ажилласан түүхтэй хэд хэдэн эрхмийг дор онцлов.

-Ч.ГАНЗОРИГ Ш.БАТХҮҮГИЙН ХЭРГЭЭР ШАЛГАГДСАН Ч, ЯЛГҮЙ ҮЛДСЭН-

Ч.Ганзоригийг Эрдэнэт үйлдвэрийн захирлаар ажиллаж байх үед Ш.Батхүү гадны банканд “Эрдэнэт” үйлдвэрийн 51 хувийг барьцаанд тавьж, 160.1 сая ам.долларын зээл авсан. Уг хэрэг олон улсын Арбитрын шүүхээр шийдэгдэж, Эрдэнэт үйлдвэр эрсдлийн сангаасаа 40 сая ам.доллар, түүнчлэн шүүхийн зардалд 37 тэрбумыг тус тус зарцуулсан юм. Эл хэргийн шүүх хурал орон нутгийн сонгуулийн нүргээнт үеэр 10 хоног үргэлжилж, олон нийт, хэвлэл мэдээллийн хяналтгүй орчинд шийдвэрээ гаргасан юм.

ХӨШИГНИЙ АРД ЯРИГДДАГААР: Ш.Батхүү нь тухайн үеийн Ерөнхий сайд С.Баяртай ойрын харилцаатай байсан тул Ч.Ганзориг, Д.Сугар нарт амаар чиглэл өгснөөр, “Эрдэнэт” үйлдвэрийн захирал асан Ч.Ганзориг үйлдвэрээ барьцаалуулахыг зөвшөөрч гарын үсэг зурсан гэгддэг. Эл логик хэдийгээр шүүх дээр батлагдаагүй ч, процесс дунд Д.Сугар, Ч.Ганзориг нар хэргээс чимээгүй мултарч, уснаас хуурай гарч чадсан юм. Түүнчлэн УИХ-ын гишүүн Г.Тэмүүлэн аавынхаа хэрэг шийдвэрлэлтэд нөлөөлөл үзүүлсэн гэгдэж буй.

-ТӨМӨР ЗАМЫГ ТӨРД АВАХАД ГОЛ ҮҮРГИЙГ ГҮЙЦЭТГЭСЭН Д.ГАНБАТ, ХЭРГИЙГ ТУСГААРЛАХ НЭРЭЭР МУЛТАРСАН-

Зам, тээврийн хөгжлийн сайд асан Д.Ганбатыг өнгөрөгч онд АТГ-аас саатуулан шалгасан. Түүнийг “Монголын төмөр зам” ТӨХК-ийн Гүйцэтгэх захирлаар ажиллаж байхдаа Ерөө сум дахь Хандгайт өртөө хүртэл 33.4 км төмөр замыг концессоор барьж, түүнийгээ төрд хэт өндрөөр буюу 183 тэрбум төгрөгөөр зарсан, “Эрдэнэт” үйлдвэрийн 49 хувийн асуудлаар тус тус шалгасан. Улмаар Эрүүгийн хуулийн Ерөнхий ангийн 1.9-ийн 1 буюу "Эрх мэдэл, албан тушаалын байдлаа урвуулан ашиглах” , Эрүүгийн хуулийн тусгай ангийн 22.1-ийн 2 дахь хэсэг буюу "Гэмт хэргийг улс төрд нөлөө бүхий этгээд үйлдсэн” гэх хэргүүдэд яллах дүгнэлт үйлдсэн юм. Уг хэрэг удаан хугацаанд шалгагдсан бөгөөд түүнийг өнгөрөгч оны 12-р сард нууцаар хил нэвтрэхийг оролдох үед АТГ-аас саатуулж, хилийн хориг тавьж байв.

ХӨШИГНИЙ АРД ЯРИГДДАГААР: Түүнийг анхнаасаа уг төмөр замыг төрд авахын тулд "Монголын төмөр зам” ХК-ийн захирлаар томилсон гэх нь ч бий. Учир нь тэрбээр 2015 онд албандаа томилогдсон бөгөөд дараа жилийнхээ зун нь буюу 2016 оны долдугаар сард ажлаа өгсөн. Хэдий богино ч тэрбээр энэ хугацаанд гол ажлаа хэдийн амжуулчихсан гэх логик харагддаг. АН дийлэнх олонхиор төр барьж байхад буюу М.Зоригт Зам тээврийн яамны сайдаар ажиллаж байхад уг асуудлыг халгаагаагүй учир Аж үйлдвэрийн сайд асан Д.Эрдэнэбатын гарын үсгээр төмөр замыг төрд авах ажлыг хийсэн хэмээх нь бий. Ийн хэргийг шалгах явцад Д.Эрдэнэбат шүүхээс ял авч, харин Д.Ганбатын хэргийг тусгаарлах нэрээр цэвэрхэн татаад авчихсан юм.

-Н.ЗОЛЖАРГАЛ ХЭРГЭЭ ХЭРХЭН ТУСГААРЛУУЛАВ-

Н.Золжаргал нь Монгол банкны Ерөнхийлөгчөөр ажиллаж байхдаа “Эрдэнэт” үйлдвэрийн 49 хувийг ОХУ-ын талаас шилжүүлэн авахад хувийн хэвшилд хэт давуу байдал олгосон, тэрчлэн авлигын сүлжээ үүсгэсэн гэх үндэслэлээр шалгагдаж байсан. Гэвч түүний хэргийг мөрдөн шалгах ажиллагаа хийлгэх нэрийдлээр Д.Ганбатын хэрэгтэй хамт тусгаарласан.

ХӨШИГНИЙ АРД ЯРИГДДАГААР: Н.Золжаргалыг сайн эдийн засагч, цаашлаад логик сэтгэлгээ сайтай гэдэг утгаар Монголбанкны Ерөнхийлөгчөөр томилсон гэгддэг. Тэрбээр албандаа томилогдоод ипотекийн зээл, үнэ тогтворжуулах хөтөлбөр зэргээр маш их мөнгийг зах зээл рүү гаргасан. Ингэх явцдаа нэр бүхий компаниудад давуу байдал үүсгэсэн зэрэг хэргүүдээр АТГ дээр шалгагдаж, хожим тусгаарлагдсан. Түүнийг Ц.Элбэгдоржийн хүн гэгддэг ч сүүлийн жилүүдэд өнөөгийн Ерөнхийлөгчтэй ойртох замаар хэргээ тусгаарлуулах гол лоббигоо хийсэн гэгдэж буй.

ДҮГНЭЛТИЙН ОРОНД: Эрдэнэт үйлдвэрийг гадны банканд барьцаанд тавьж, арваад жил дэлхийд булай болгосон түүх эцэстээ тэр үеийн захирал асан Ч.Ганзоригт бус ганцхан Ш.Батхүүд хамаарах болсон нь хачирхалтай. Цаашлаад Д.Ганбатын хэрэг дээр төрд хувийн хэвшлийн барьсан төмөр авахыг зөвшөөрч гарын үсэг зурсан хоёр хүний нэг нь шууд ял авч, нөгөө нь мултарсан нь хачин логик. Түүнчлэн Н.Золжаргал Херо Баатарын нэвтрүүлэгт хөтлөгчөөр ажилласан нь санамсаргүй хэрэг биш болох нь шүүхийн шийдвэрээр нотлогдов.

Энэ мэдээнд өгөх таны үнэлгээ

Хуваалцаарай Жиргээрэй