Д.Батгэрэл UFC холбооны анхны тулаандаа ялагдав
Холимог тулааны тамирчдын мөрөөдөл, хамгийн өндөр оргил болох UFC холбоонд Данаагийн Батгэрэл Монголоос анх удаа хөл тавьж, гэрээ байгуулсан билээ. Сүхбаатар аймгийн Эрдэнэцагаан сумын харьяат, UFC холбоо, “Team Tungaa” “One team” клубийн тамирчин тэрбээр тус холбоотой 20 сарын гэрээ үзэглэсэн юм.
Мэргэжлийн дэвжээнд долоо тулалдахдаа зургаад нь ялсан Д.Батгэрэл UFC-ийн анхны тулаанаа ӨМӨЗО-ы тамирчин Алтанхилтэй хийлээ. Тэд дотнын найзууд. Алтанхил өмнө нь “Road FC” холбооны аваргын төлөө хоёр ч удаа өрсөлдсөн туршлагатай. Д.Батгэрэл “The HU” хамтлагийн “Wolf totem” дууг эгшиглүүлэн дэвжээнд гарсан юм.
Эл тулаанд манай тамирчин өрсөлдөгчдөө 29:27-гоор ялагдав.
Д.Батгэрэл Гавьяат тамирчин Ж.Нарантунгалаг, “One team” клубийн дасгалжуулагч Ш.Ганбаатарын шавь юм. Хэдийгээр тэрбээр дийлдсэн ч монгол хүн UFC холбоонд анх удаа тулалдсан нь яах аргагүй түүхэн үйл явдал.
Б.БУЯНДАЛАЙ
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.